ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ກູ​ບາ ຮັບ​ຮູ້​ບົດບາດ​ຂອງ​ຕະຫຼາດ ແລະ ການ​ຄອບ​ຄອງ​ຂອງ​ເອກະ​ຊົນ

112 17 ກ.ກ. 2018 ຂ່າວຕ່າງປະເທດ
ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ກູ​ບາ ຮັບ​ຮູ້​ບົດບາດ​ຂອງ​ຕະຫຼາດ ແລະ ການ​ຄອບ​ຄອງ​ຂອງ​ເອກະ​ຊົນ

    ໜັງສືພິມ ກຣານ​ມາ ລາຍ​ວັນ ຊຶ່ງ​ເປັນ​ກະບອກ​ສຽງ​ຂອງ​ພັກ​ກອມ​ມູ​ນິດ​ກູ​ບາ ສະບັບ​ອອກ ວັນ​ທີ 14 ກໍລະກົດ​ທີ່​ຜ່ານ​ມາ​ໃຫ້​ຮູ້​ວ່າ ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ກູ​ບາ ທີ່​ຈະ​ນຳ​ສະເໜີ ຕໍ່​ສະພາ​ແຫ່ງ​ຊາດ ເພື່ອ​ພິຈາລະນາ ໃນ​ທ້າຍ​ເດືອນ​ກໍລະກົດ​ນີ້ ຈະ​ໄດ້​ຍອມຮັບ​ບົດບາດ​ຂອງ​ຕະຫຼາດ ແລະ​ການ​ຄອບ​ຄອງ​ຂອງ​ພາກ​ເອກະ​ຊົນ.

    ໃນ​ການ​ນຳ​ສະເໜີ​ລາຍ​ລະອຽດ ກ່ຽວ​ກັບ​ຮ່າງ​ລັດ​ຖະ​ທຳ​ມະນູນ​ໃໝ່​ນັ້ນ ໜັງສືພິມ​ດັ່ງກ່າວ ໄດ້​ຄັດ​ສະເໜີ​ໃຫ້​ຮູ້​ວ່າ: “ລະບົບ​ເສດຖະກິດ (ຂອງ​ກູ​ບາ) ຈະ​ຮັກສາ​ໄວ້​ຊຶ່ງ​ຫຼັກການ​ອັນ​ເປັນ​ພື້ນຖານ ກ່ຽວ​ກັບ​ການ​ຄອບ​ຄອງ​ສັງຄົມ​ນິຍົມ​ຂອງ​ທົ່ວ​ປວງ​ຊົນ ແຕ່​ວ່າ​ຈະ​ເພີ່ມ​ເຕີມ​ການ​ຮັບ​ຮູ້​ບົດບາດ ຂອງ​ຕະຫຼາດ ແລະ​ຂອງ​ບັນດາ​ຮູບ​ການ​ຄອບ​ຄອງ​ໃໝ່ ໃນ​ນັ້ນ​ມີ​ການ​ຄອບ​ຄອງ​ຂອງ​ເອກະ​ຊົນ.”

    ໃນ​ເດືອນ​ມິຖຸນາ​ທີ່​ຜ່ານ​ມາ ທ່ານ ຣາ​ອູນ ​ກັສ​ໂຕຣ ເລຂາ​ທີ​ໜຶ່ງ ຂອງ​ພັກ​ກອມ​ມູ​ນິດ​ກູ​ບາ ໄດ້​ຊີ້​ນຳ​ໂດຍ​ກົງ​ຕໍ່​​​ຄະນະ​ກຳມະການ​ຮ່າງ​ລັດ​ຖະ​ທຳ​ມະນູນ ຊຶ່ງ​ເປັນ​ທີ່​ຄອງ​ຄອຍ ວ່າ​ຈະ​ມີ​ການ ປ່ຽນແປງ​ທີ່​ສຳຄັນ​ຫຼາຍ​ປະການ ເມື່ອ​ທຽບໃສ່​ລັດ​ຖະ​ທຳ​ມະນູນ​ສະບັບ​ປີ 1976 ທີ່​ໃຊ້​ຢູ່​ໃນ​ປັດຈຸບັນ ຊຶ່ງ​ໄດ້​ຮັບ​ການ​ດັດແກ້​ພຽງ​ເທື່ອ​ດຽວ​ໃນ​ປີ 2002 ນັ້ນ.

    ທ່ານ ຣາ​ອູນ ​ກັສ​ໂຕຣ ໄດ້​ປະກາດ​ກ່ຽວ​ກັບ​ຄວາມ​ຕ້ອງການ​ປ່ຽນແປງ​ລັດ​ຖະ​ທຳ​ມະນູນ ເມ​​ື່ີອ​ປີ 2011 (ໃນ​ຖານະ​ທີ່​​ີ​ທ່ານ​ເປັນ​ປະທານ​ສະພາ​ແຫ່ງ​ລັດ ແລະ ​ສະພາ​ລັດຖະມົນຕີ) ຫຼັງ​ຈາກ​ທີ່​ໄດ້​ດຳເນີນ ການ​ປ່ຽນແປງ ທາງ​ດ້ານ​ເສດຖະກິດ​ຫຼາຍ​ລາຍການ ໄປ​ໃນ​ທິດ​ທາງ​ເປີດ​ປະຕູ​ໃຫ້​ແກ່​ການ​ລົງທຶນ ຈາກ​ຕ່າງປະເທດ ແລະ​ອະນຸຍາດ​ໃຫ້​ມີ​ຮູບ​ການ “ແຮງ​ງານ​ເຮັດ​ທຸລະ​ກິດ​ດ້ວຍ​ຕົນ​ເອງ” ສາມາດ ເຄື່ອນ​ໄຫວ​ໄດ້.

    ຕົວ​ເລກ​ຢ່າງ​ເປັນ​ທາງ​ການ​ຂອງ​ກູ​​​ບາ ທີ່​ຫາ​ກໍ​ໄດ້​ນຳ​ອອກ​ມາ​ປະກາດ​ນັ້ນ ໃຫ້​ຮູ້​ວ່າ ປັດຈຸບັນ​ນີ້ ຈຳນວນ  “ແຮງ​ງານ​ເຮັດ​ທຸລະ​ກິດ​ດ້ວຍ​ຕົນ​ເອງ”  ຢູ່​ໃນ​ກູ​ບາ ພວມ​ມີ​ຢູ່​ທີ່​ລະດັບ 591.000 ຄົນ ກວມ​ເອົາ​ປະມານ 13% ຂອງ​ກຳລັງ​ແຮງ​ງານ​ໃນ​ທົ່ວ​ປະເທດ.

 

ຂ່າວທີ່ກ່ຽວຂ້ອງ