ປີ 2018 ຂະແໜງການເງິນ ສູ້ຊົນເກັບລາຍຮັບໃຫ້ໄດ້ຫຼາຍກວ່າ 25 ພັນຕື້ກີບ

381 17 ກ.ກ. 2018 ຂ່າວໜ້າ​ໜຶ່ງ
ປີ 2018 ຂະແໜງການເງິນ ສູ້ຊົນເກັບລາຍຮັບໃຫ້ໄດ້ຫຼາຍກວ່າ 25 ພັນຕື້ກີບ

    ກອງ​ປະ­ຊຸມ​ເປີດ​ກວ້າງ​ຄົບ​ຄະ­ນະ​ບໍ­ລິ­ຫານ​ງານ​ພັກ ກະ­ຊວງ​ການ​ເງິນ ຄັ້ງ​ທີ 6 ສະ­ໄໝ ທີ  II ຈັດ​ຂຶ້ນ​ວັນ​ທີ 16-18 ກໍ­ລະ­ກົດ 2018 ເປັນ​ປະ­ທານ​ຂອງ​ສະ­ຫາຍ ສົມ​ດີ ດວງ​ດີ ກຳ­ມະ­ການ​ສູນ​ກາງ​ພັກ  ເລ­ຂາ​ຄະ­ນະ​ພັກ  ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ໃຫ້​ກຽດ​ເຂົ້າ​ຮ່ວມ​ໂດຍ​ສະ­ຫາຍ ບຸນ​ທອງ ຈິດ​ມະ­ນີ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ປະ­ທານ​ກວດ­ກາ​ສູນ​ກາງ​ພັກ ຮອງ​ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ບັນ­ດາ​ຄະ­ນະ​ພັກ ສະ­ມາ­ຊິກ​ພັກ ແລະ ພະ­ນັກ­ງານ​ຫຼັກ​ແຫຼ່ງ​ອ້ອມ​ຂ້າງ​ກະ­ຊວງ.

    ສະ­ຫາຍ ສົມ​ດີ ດວງ​ດີ ໄດ້​ໃຫ້​ຮູ້​ວ່າ: ຄະ­ນະ​ພັກ​ກະ­ຊວງ​ການ​ເງິນ​ໄດ້​ເອົາ­ໃຈ­ໃສ່​ຢ່າງ​ຕັ້ງ­ໜ້າ​ເຂົ້າ​ໃນ​ການ­ຈັດ­ຕັ້ງ​ຜັນ​ຂະ­ຫຍາຍ ແລະ ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ II ອົງ­ຄະ​ນະ​ພັກ​ກະ­ຊວງ​ການ​ເງິນ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ 5 ປີ ຄັ້ງ​ທີ VIII (2016-2020) ໃນ 2 ປີ​ເຄິ່ງ​ຜ່ານ​ມາ ໂດຍ​ສະ­ເພາະ ແມ່ນ​ການ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ​ແຕ່​ປີ 2015 ຮອດ​ປີ 2018 ຢູ່​ໃນ​ສະ­ພາບ​ແວດ​ລ້ອມ​ທັງ​ພາຍ​ໃນ-ສາ­ກົນ ມີ​ຄວາມ​ບໍ່​ແນ່­ນອນ ແລະ ຄາດ​ຄະ­ເນ​ໄດ້​ຍາກ ການ​ຂາດ​ສະ­ພາບ​ຄ່ອງ​ຂອງ​ງົບ­ປະ­ມານ​ແຫ່ງ​ລັດ​ທີ່​ເປັນ​ຜົນ​ພວງ​ມາ​ຫຼາຍ​ປີ ເປັນ­ຕົ້ນ​ແມ່ນ​ການ​ປະ­ຕິ­ບັດ​ແຜນ​ລາຍ​ຮັບ-ລາຍ​ຈ່າຍ ບໍ່​ໄດ້​ຕາມ​ແຜນ ເຮັດ​ໃຫ້­ການ​ຂາດ​ດຸນ​ງົບ­ປະ­ມານ​ສູງ ບັນ­ຫາ​ການ​ເພີ່ມ​ຂຶ້ນ​ຂອງ​ໜີ້​ສາ­ທາ­ລະ­ນະ ແລະ ໜີ້​ຄ້າງ​ຈ່າຍ​ຂອງ ໂຄງ­ການ​ລົງ­ທຶນ​ລັດ ແຕ່​ເຖິງ​ຢ່າງ­ໃດ​ກໍ່​ຕາມ​ຈາກ​ຄວາມ​ເອົາ­ໃຈ­ໃສ່​ຢ່າງ​ຕັ້ງ­ໜ້າ​ຂອງ​ຄະ­ນະ​ພັກ ຄະ­ນະ ນຳ​ຂອງ​ຂະ­ແໜງ­ການ​ເງິນ ທີ່​ມີ​ຄວາມ​ເຂັ້ມ​ງວດ ແລະ ປອດ​ໃສ​ໄດ້​ເຮັດ​ໃຫ້​ຫຼາຍ​ວຽກ​ງານ​ປະ­ສົບ​ຜົນ ສຳ­ເລັດ​ຕາມ​ແຜນ ເຊິ່ງ​ຂະ­ແໜງ­ການ​ເງິນ​ໄດ້​ສູ້​ຊົນ​ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ເຮັດ​ໃຫ້​ອັດ­ຕາ​ການ​ເຕີບ​ໂຕ​ນັບ​ແຕ່​ສົກ​ປີ 2015-2016 ຈົນ​ເຖິງ​ປັດ­ຈຸ­ບັນ​ຍັງ​ສາ­ມາດ​ຮັກ­ສາ​ຢູ່ ໃນ​ລະ­ດັບ​ສູງ​ຄື: ສົກ​ປີ 2015-2016 ບັນ­ລຸ​ໄດ້ 7,2% ປີ 2017 ບັນ­ລຸ 6,9% ແລະ 6 ເດືອນ​ຕົ້ນ​ປີ 2018 ບັນ­ລຸ 6,7% ອັດ­ຕາ​ເງິນ​ເຟີ້​ສະ­ເລ່ຍ​ຢູ່​ໃນ​ລະ­ດັບ​ຕ່ຳ ແລະ ອັດ­ຕາ​ແລກ­ປ່ຽນ​ມີ​ຄວາມ​ໝັ້ນ​ທ່ຽງ ແລະ ເຂັ້ມ­ແຂງ.

    ຄຽງ​ຄູ່​ກັນ​ນັ້ນ ການ​ປະ­ຕິ​ແຜນ​ລາຍ​ຮັບ​ງົບ­ປະ­ມານ​ສົກ​ປີ 2015-2016 ສາ­ມາດ​ປະ­ຕິ­ບັດ​ໄດ້​ທັງ​ໝົດ 21.961,73 ຕື້​ກີບ ເທົ່າ​ກັບ 92,67% ຂອງ​ແຜນ­ການ​ປີ ໃນ​ນັ້ນ ລາຍ​ຮັບ​ພາຍ​ໃນ 20.041,19 ຕື້​ກີບ ເທົ່າ​ກັບ 94,56% ໄລ­ຍະ 3 ເດືອນ​ຂ້າມ​ຜ່ານ​ທ້າຍ​ປີ 2016 ສາ­ມາດ​ປະ­ຕິ­ບັດ​ລາຍ​ຮັບ​ໄດ້​ທັງ​ໝົດ 4.023,79 ຕື້​ກີບ ເທົ່າ​ກັບ 109,3% ຂອງ​ແຜນ​ດັດ­ແກ້ ໃນ​ນັ້ນ ລາຍ​ຮັບ​ພາຍ​ໃນ 3.811,98 ຕື້​ກີບ ເທົ່າ​ກັບ 109,03% ທຽບ­ໃສ່​ຕົວ​ເລກ​ປະ­ຕິ­ບັດ​ສົກ​ປີ​ເພີ່ມ​ຂຶ້ນ 5,23% ສະ­ເພາະ​ລາຍ​ຮັບ​ປີ 2017 ປະ­ຕິ­ບັດ​ໄດ້ 20.765,26 ຕື້​ກີບ ເທົ່າ​ກັບ 96,75% ຂອງ​ແຜນ­ການ ເພີ່ມ​ຂຶ້ນ 3,61% ແລະ ປີ 2018 ມີ​ແຜນ​ເກັບ​ລາຍ​ຮັບ​ທັງ​ໝົດ 25.452 ຕື້​ກີບ ເພີ່ມ​ຂຶ້ນ​ຈາກ​ປີ 2017 ປະ­ມານ 10,13% ແລະ ລາຍ​ຮັບ​ພາຍ​ໃນ​ມີ​ແຜນ​ຈັດ​ເກັບ​ໃຫ້​ໄດ້​ທັງ​ໝົດ 22.700 ຕື້​ກີບ ເພີ່ມ​ຂຶ້ນ 9,32%.

ຂ່າວທີ່ກ່ຽວຂ້ອງ