ຜັນຂະຫຍາຍກ່ຽວກັບມາດຕະຖານພົ້ນທຸກ ແລະ ມາດຕະຖານພັດທະນາ

221 17 ກ.ກ. 2018 ຂ່າວໜ້າ​ໜຶ່ງ
ຜັນຂະຫຍາຍກ່ຽວກັບມາດຕະຖານພົ້ນທຸກ ແລະ ມາດຕະຖານພັດທະນາ

   ກະ­ຊວງ​ກະ­ສິ­ກຳ ແລະ ປ່າ­ໄມ້ ຈັດ​ກອງ​ປະ­ຊຸມ​ເຜີຍ­ແຜ່ ແນະ­ນຳ​ການ​ຜັນ​ຂະ­ຫຍາຍ​ຈັດ​ຕັ້ງ​ປະ­ຕິ­ບັດ​ດຳ­ລັດ 348/ລບ ວ່າ​ດ້ວຍ​ມາດ­ຕະ­ຖານ​ພົ້ນ​ທຸກ ແລະ ມາດ­ຕະ­ຖານ​ພັດ­ທະ­ນາ ຂຶ້ນ​ໃນ​ວັນ​ທີ 16-17 ກໍ­ລະ­ກົດ 2018 ທີ່​ຫໍ​ປະ­ຊຸມ​ແຫ່ງ​ຊາດ ເປັນ​ປະ­ທານ​ຂອງ​ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ມີ​ບັນ­ດາ​ຮອງ​ລັດ­ຖະ­ມົນ­ຕີ ຮອງ​ເຈົ້າ​ຄອງ ຮອງ​ເຈົ້າ­ແຂວງ ຫ້ອງ­ການ ກົມ ສູນ ສະ​ຖາ​ບັນ ແລະ ພະ­ແນກ­ການ​ທົ່ວ​ກະ­ຊວງ​ເຂົ້າ​ຮ່ວມ.

   ທ່ານ ລຽນ ທິ​ແກ້ວ ກ່າວ​ວ່າ: ເພື່ອ​ເຜີຍ­ແຜ່​ເນື້ອ​ໃນ ຂອງ​ດຳ­ລັດ 348/ລບ ແລະ ບົດ​ແນະ­ນຳ 0830/ກປ ໃຫ້​ບັນ­ດາ​ກະ­ຊວງ ອົງ­ການ​ທຽບ​ເທົ່າ ແລະ ອົງ­ການ​ປົກ­ຄອງ​ທ້ອງ­ຖິ່ນ ຮັບ​ຮູ້ ເຂົ້າ­ໃຈ​ເປັນ​ເອ­ກະ​ພາບ ແລະ ດຳ­ເນີນ​ການ­ຈັດ­ຕັ້ງ​ຜັນ​ຂະ­ຫຍາຍ ຕາມ​ພາ­ລະ​ບົດ­ບາດ​ໜ້າ­ທີ່​ຂອງ​ຕົນ ເຮັດ​ໃຫ້​ບັນ­ດາ​ເປົ້າ​ໝາຍ​ຈັດ​ຕັ້ງ​ປະ­ຕິ­ບັດ ນັບ​ແຕ່​ບັນ­ດາ​ຂະ­ແໜງ­ການ ອົງ­ການ​ທຽບ​ເທົ່າ​ຂັ້ນ​ສູນ​ກາງ ມີ​ບ່ອນ​ອີງ​ສຳ­ລັບ​ປັບ­ປຸງ​ມາດ­ຕະ­ຖານ​ຂອງ​ຕົນ ບັນ­ດາ​ທ້ອງ­ຖິ່ນ ແລະ ຮາກ​ຖານ ມີ​ເນື້ອ​ໃນ​ພື້ນ­ຖານ ເພື່ອ​ກະ­ກຽມ​ໃຫ້​ແກ່​ການ​ດຳ­ເນີນ​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ທ້ອງ­ຖິ່ນ.

   ກອງ​ປະ­ຊຸມ​ແມ່ນ​ໄດ້​ຮັບ​ຟັງ​ການ​ເຜີຍ­ແຜ່ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ມາດ­ຕະ­ຖານ​ພົ້ນ​ທຸກ ແລະ ມາດ​ຕະ ຖານ​ພັດ­ທະ­ນາ ເຊິ່ງ​ປະ­ກອບ​ມີ 6 ໝວດ 19 ມາດ­ຕາ ໃນ​ນີ້ ບັນ­ຫາ​ທີ່​ເປັນ­ໃຈ​ກາງ​ກວ່າ​ໝູ່​ແມ່ນ​ໝວດ​ທີ 3 ການ​ກຳ­ນົດ​ມາດ­ຕະ­ຖານ​ພັດ­ທະ­ນາ ມາດ­ຕາ​ທີ 7 ໄດ້​ກຳ­ນົດ​ມາດ­ຕະ­ຖານ​ຄອບ­ຄົວ​ພັດ­ທະ­ນາ ປະ­ກອບ​ມີ 5 ເງື່ອນ­ໄຂ ມາດ­ຕາ​ທີ 8 ມາດ­ຕະ­ຖານ​ບ້ານ​ພັດ­ທະ­ນາ ປະ­ກອບ​ດ້ວຍ 11 ເງື່ອນ­ໄຂ ມາດ­ຕາ 9 ມາດ­ຕະ­ຖານ​ເມືອງ​ເຂັ້ມ­ແຂງ​ຮອບ­ດ້ານ ປະ­ກອບ​ດ້ວຍ 10 ເງື່ອນ­ໄຂ ມາດ­ຕາ​ທີ 10  ມາດ­ຕະ­ຖານ​ບ້ານ​ໃຫຍ່ ເປັນ​ຕົວ​ເມືອງ​ນ້ອຍ​ໃນ​ຊົນ­ນະ­ບົດ ປະ­ກອບ​ດ້ວຍ 14 ເງື່ອນ­ໄຂ ຈຸດ­ປະ­ສົງ ດຳ­ລັດ​ສະ­ບັບ​ນີ້​ແມ່ນ​ກຳ­ນົດ​ມາດ­ຕະ­ຖານ​ພົ້ນ​ທຸກ ແລະ ມາດ­ຕະ­ຖານ​ພັດ­ທະ­ນາ ເພື່ອ​ເປັນ​ພື້ນ­ຖານ ໃຫ້​ແກ່​ການ​ກຳ­ນົດ​ເປົ້າ​ໝາຍ​ແກ້​ໄຂ​ຄວາມ­ທຸກ​ຍາກ ໂດຍ​ເລີ່ມ​ຈາກ​ການ​ສ້າງ​ຄອບ­ຄົວ​ໃຫ້​ພົ້ນ​ທຸກ ສ້າງ​ຄອບ­ຄົວ​ພັດ­ທະ­ນາ ບ້ານ​ພັດ­ທະ­ນາ ບ້ານ​ໃຫຍ່​ເປັນ​ຕົວ​ເມືອງ​ນ້ອຍ ທີ່​ບໍ່​ແມ່ນ​ການ­ຈັດ­ຕັ້ງ​ລັດ​ຂັ້ນ​ໜຶ່ງ ລະ­ຫວ່າງ ເມືອງ​ກັບ​ບ້ານ​ຢູ່​ຊົນ­ນະ­ບົດ ແລະ ສ້າງ​ເມືອງ​ເຂັ້ມ­ແຂງ​ຮອບ­ດ້ານ​ໃຫ້​ສອດ­ຄ່ອງ​ກັບ​ມະ­ຕິ​ກອງ​ປະ­ຊຸມ​ໃຫຍ່ ຜູ້​ແທນ​ທົ່ວ​ປະ­ເທດ​ຂອງ​ພັກ ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຫ່ງ​ຊາດ ແຕ່​ລະ​ໄລ­ຍະ​ໃຫ້​ປາ­ກົດ​ຜົນ​ເປັນ​ຈິງ.

ຂ່າວທີ່ກ່ຽວຂ້ອງ