ຂ່າວຫຼ້າສຸດ

ເສັ້ນທາງສີເກີດຫາໂພນໂຮງ ຄາດຈະລົງມືກໍ່ສ້າງຕົ້ນປີ 2019

272 17 ກ.ກ. 2018 ຂ່າວໜ້າ​ໜຶ່ງ
ເສັ້ນທາງສີເກີດຫາໂພນໂຮງ ຄາດຈະລົງມືກໍ່ສ້າງຕົ້ນປີ 2019

   ໂຄງ­ການ​ປັບ­ປຸງ​ທາງ​ຫຼວງ​ແຫ່ງ​ຊາດ​ເລກ​ທີ 13 ເໜືອ ໄດ້​ມີ​ການ​ສຶກ​ສາ ສຳ​ຫຼວດ ອອກ​ແບບ​ມາ​ແຕ່​ປີ 2015 ໂດຍ​ການ​ສະ­ໜັບ­ສະ­ໜູນ​ທີ່​ປຶກ­ສາ​ຈາກ​ທະ­ນາ­ຄານ​ໂລກ ຜ່ານ​ການ​ກະ­ກຽມ ແລະ ປຶກ­ສາ​ຫາ­ລື​ກັບ​ຫຼາຍ​ພາກ­ສ່ວນ​ທີ່​ກ່ຽວ­ຂ້ອງ​ຈາກ​ຜູ້​ໃຫ້​ທຶນ ບັນ­ດາ​ກະ­ຊວງ ແລະ ບໍ­ລິ­ສັດ​ລົງ­ທຶນ ມາ​ຮອດ​ເດືອນ​ສິງ­ຫາ 2017 ລັດ­ຖະ­ບານ​ເຫັນ​ດີ​ດ້ານ​ຫຼັກ­ການ​ຮັບ­ຮອງ​ເອົາ​ໂຄງ­ການ ແລະ ເຫັນ​ດີ​ໃຫ້​ກະ­ຊວງ​ການ​ເງິນ​ທາບ​ທາມ​ເງິນ​ກູ້​ຈາກ​ສະ​ຖາ​ບັນ​ການ​ເງິນ​ສາ­ກົນ ຄື:ທະ­ນາ­ຄານ​ໂລກ ກອງ​ທຶນ​ນໍ​ດິກ ແລະ ທະ­ນາ­ຄານ​ການ​ລົງ­ທຶນ​ໂຄງ​ລ່າງ​ພື້ນ­ຖານ​ອາ­ຊີ ຄາດ​ຄະ­ເນ​ໂຄງ­ການ​ນີ້​ມີ​ມູນຄ່າປະ­ມານ 10 ພັນ​ກວ່າ​ຕື້​ກີບ ຫຼື ​ປະ­ມານ 128 ລ້ານ​ໂດ​ລາ​ສະ­ຫະ­ລັດ ໃນ​ນີ້ ທະ­ນາ­ຄານ​ໂລກ​ໃຫ້​ທຶນ ປະ¬ມານ 320 ຕື້ກີບ ຫຼື 40 ລ້ານໂດລາ (ໄດ້​ເຈລະ­ຈາ ແລະ ຜ່ານ​ຜູ້​ບໍ­ລິ­ຫານ​ທະ­ນາ­ຄານ​ໂລກ​ແລ້ວ ແລະ ຈະ​ໄດ້​ເຊັນ​ສັນ­ຍາ​ກູ້​ຢືມ​ໃນ​ເດືອນ​ສິງ­ຫາ 2018) ກອງ​ທຶນ​ນໍ​ດິກ ໃຫ້​ທຶນ ປະ¬ມານ 70 ກວ່າຕື້ກີບ ຫຼື 9,5 ລ້ານໂດລາ ເພື່ອ​ມາ​ຈ້າງ​ທີ່​ປຶກ­ສາ​ຄຸມ​ງານ​ກໍ່­ສ້າງວຽກ​ຕ້ານ​ໄພ­ພິ­ບັດ ແລະ ຈ່າຍ​ຄ່າ​ຊົດ​ເຊີຍ​ສິ່ງ​ກີດ­ຂວາງ ທະ­ນາ­ຄານ​ລົງ­ທຶນ​ໂຄງ​ລ່າງ​ພື້ນ­ຖານ​ອາ­ຊີ 40 ລ້ານ​ໂດ​ລາ (ຄາດ​ວ່າ​ສະ­ເໜີ​ອະ­ນຸ­ມັດ​ຈາກ​ຜູ້​ບໍ­ລິ­ຫານ​ໃນ​ເດືອນ​ກັນ­ຍາ 2018) ແລະ ລັດ­ຖະ­ບານ​ລາວ ປະ¬ມານ 310 ຕື້ກີບ ຫຼື 38,5 ລ້ານໂດລາ (ໃນ​ນີ້ 14,5 ລ້ານ​ໂດ​ລາ ຈ່າຍ​ຄ່າ​ຊົດ​ເຊີຍ ແລະ 24 ລ້ານ​ໂດ​ລາ ຈ່າຍ​ໃນ​ໄລ­ຍະ​ບູ​ລະນະ​ຮັກ­ສາ).

    ນອກ­ຈາກ​ມູນ​ຄ່າ 128 ລ້ານ​ໂດ​ລາ​ນີ້​ແລ້ວ ທະ­ນາ­ຄານ​ການ​ລົງ­ທຶນ​ໂຄງ​ລ່າງ​ພື້ນ­ຖານ​ອາ­ຊີ ຍັງ​ໃຫ້​ງົບ​ກອງ​ທຶນ​ພິ­ເສດ ເພື່ອ​ຈ້າງ​ທີ່​ປຶກ­ສາ​ຊ່ວຍ​ວຽກ​ຄະ­ນະ​ໄກ່​ເກ່ຍ​ສິ່ງ​ກີດ­ຂວາງ​ທາງ 13 ເໜືອ ແລະ ກະ­ກຽມ​ສຳ​ຫຼວດ ອອກ​ແບບ​ໄລ­ຍະ​ທາງ 13 ໃຕ້ ແຕ່ ກມ 21 ນະ­ຄອນ­ຫຼວງ​ວຽງ​ຈັນ ຫາ ກມ 71 ເພີ່ມ​ອີກ​ຈຳ­ນວນ ປະ¬ມານ 8 ຕື້ກີບ ຫຼື 995.000 ລ້ານໂດລາ.

    ປັດ­ຈຸ­ບັນ ສາ­ມາດ​ເຮັດ​ສຳ­ເລັດ​ໄດ້​ຫຼາຍ​ໜ້າ​ວຽກ ເຊັ່ນ: ໄດ້​ວ່າ​ຈ້າງ​ບໍ­ລິ­ສັດ​ທີ່​ປຶກ­ສາ LCG ເພື່ອ​ດຳ­ເນີນ​ການ​ສຶກ​ສາ­ຜົນ​ກະ­ທົບ​ດ້ານ​ສິ່ງ­ແວ­ດລ້ອມ ແລະ ສັງ­ຄົມ​ແບບ​ຄົບ​ຊຸດ ແລະ ວ່າ​ຈ້າງ​ລັດ​ວິ​ສາ​ຫະ​ກິດ ວິ­ສະ­ວະ­ກຳ ຄົມ­ມະ­ນາ­ຄົມ (ລ.ວ.ຄ) ດຳ­ເນີນ​ວຽກ​ສຳ​ຫຼວດ-ອອກ​ແບບ​ລະ­ອຽດ​ດ້ານ​ວິ​ສະ​ວະ​ກະ​ທາງ​ເລກ​ທີ 13 ເໜືອ ຈາກ​ສາມ​ແຍກ​ສີ​ເກີດ​ຫາ​ໂພນ​ໂຮງ ລວງ​ຍາວ 58 ກິ­ໂລ­ແມັດ ແລະ ອື່ນໆ ຕາມ​ແຜນ­ການ​ລົງ­ມື​ກໍ່­ສ້າງ​ໂຄງ­ການ​ດັ່ງ­ກ່າວ​ນີ້ ແມ່ນ​ເດືອນ​ມັງ­ກອນ 2019 ແລະ ສຳ­ເລັດ​ໃນ​ປີ 2021 (ກຳ­ນົດ 3 ປີ) ຈາກ​ນັ້ນ ບູ­ລະ­ນະ​ຮັກ­ສາ 7 ປີ ເລີ່ມ 2022-2028.

    ກອງ​ປະ­ຊຸມ​ຂອງ​ຄະ­ນະ​ຊີ້​ນຳ​ໂຄງ­ການ​ຂັ້ນ​ສູນ​ກາງ ໂຄງ­ການ​ປັບ­ປຸງ ແລະ ສ້ອມ­ແປງ​ທາງ​ຫຼວງ​ແຫ່ງ​ຊາດ 13 ເໜືອ ໄລ­ຍະ​ສີ​ເກີດ-ໂພນ​ໂຮງ ຈັດ​ຂຶ້ນ​ວັນ​ທີ 12 ກໍ­ລະ­ກົດ 2018 ທີ່​ກະ­ຊວງ ຍທຂ ໂດຍ​ເປັນ​ປະ­ທານ​ຂອງ​ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ເປັນ​ປະ­ທານ​ມີ​ຄະ­ນະ​ຊີ້​ນຳ ຄະ­ນະ​ກຳ­ມະ­ການ​ໄກ່​ເກ່ຍ​ນະ­ຄອນ­ຫຼວງ​ວຽງ​ຈັນ ແລະ ແຂວງ​ວຽງ​ຈັນ ມີ​ຜູ້​ຊ່ຽວ­ຊານ​ດ້ານ​ໂຄງ​ລ່າງ​ພື້ນ­ຖານ​ຈາກ​ທະ­ນາ­ຄານ​ໂລກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ