ຂ່າວຫຼ້າສຸດ

ການຂົນສົ່ງສິນຄ້າໃນ ສປປ ລາວ ໃຊ້ເວລາດົນ ເຮັດໃຫ້ຜູ້ປະກອບການພົບຄວາມຫຍຸ້ງຍາກ

257 17 ກ.ກ. 2018 ຂ່າວໜ້າ​ໜຶ່ງ

    ທ່ານ ໄຊ​ບັນ­ດິດ ຣາ​ຊະ​ພົນ ຄະ­ນະ​ບໍ­ລິ­ຫານ​ງານ​ສະ­ພາ​ການ​ຄ້າ ແລະ ອຸດ​ສະ­ຫະ​ກຳ​ແຫ່ງ​ຊາດ​ລາວ ທັງ​ເປັນ​ປະ­ທານ​ສະ­ມາ­ຄົມ​ຕັດ­ຫຍິບ​ລາວ ໄດ້​ຂຶ້ນ​ສະ­ເໜີ​ກ່ຽວ​ກັບ​ບັນ­ຫາ​ການ​ອຳ­ນວຍ​ຄວາມ​ສະ­ດວກ ແລະ ການ​ຂົນ­ສົ່ງ​ໃນ ສປປ ລາວ ຕໍ່​ກອງ​ປະ­ຊຸມ​ທຸ­ລະ​ກິດ​ລາວ​ຄັ້ງ​ທີ 11 ວ່າ: ຂັ້ນ​ຕອນ​ການ​ຂົນ­ສົ່ງ ນຳ​ເຂົ້າ ແລະ ສົ່ງ​ອອກ​ສິນ­ຄ້າ ປັດ​ຈຸ ບັນ​ຍັງ​ມີ​ຫຼາຍ​ຂອດ​ຂັ້ນ​ຍັງ​ເປັນ​ສິ່ງ​ທ້າ​ທາຍ​ຢູ່ ຜ່ານ​ການ​ລົງ​ເກັບ​ກຳ​ຂໍ້​ມູນ​ຕົວ​ຈິງ​ຈາກ​ຕົວ​ແທນ​ສະ­ມາ­ຄົມ​ຂົນ­ສົ່ງ​ລະ­ຫວ່າງ​ປະ­ເທດ​ລາວ ສະ­ມາ­ຄົມ​ຕັດ­ຫຍິບ​ລາວ ແລະ ຜູ້​ປະ­ກອບ​ການ​ອື່ນໆ ເຫັນ​ວ່າ​ບາງ​ກໍ­ລະ­ນີ​ແມ່ນ​ຍັງ​ໃຊ້​ເວ­ລາ​ຫຼາຍ​ສົມ­ຄວນ​ເຖິງ​ແມ່ນ​ວ່າ​ຈະ​ມີ​ການ​ປະ­ກອບ​ເອ­ກະ­ສານ​ຄົບ​ຖ້ວນ​ແລ້ວ​ກໍ່​ຕາມ ໃນ​ນີ້ ການ​ນຳ​ເຂົ້າ​ສິນ­ຄ້າ​ທີ່​ໄດ້​ຮັບ​ການ​ຍົກ­ເວັ້ນ​ພາ­ສີ ອາ­ກອນ​ມູນ​ຄ່າ​ເພີ່ມ ພາຍ​ໃຕ້​ກົດ­ໝາຍ​ສົ່ງ­ເສີມ​ການ​ລົງ­ທຶນ ຜ່ານ​ມາ​ແມ່ນ​ກົມ​ພາ­ສີ​ເປັນ​ຜູ້​ຮັບ­ຜິດ­ຊອບ​ຫຼັກ​ໃນ​ການ​ຄົ້ນ­ຄວ້າ​ເອ­ກະ­ສານ ເຊິ່ງ​ໂດຍ​ລວມ​ສະ­ເລ່ຍ​ແມ່ນ​ໃຊ້​ເວ­ລາ​ປະ­ມານ 2 ອາ­ທິດ ໃນ​ປີ 2017 ແມ່ນ​ໄດ້​ມີ​ການ​ມອບ​ຮັບ​ວຽກ​ງານ ການ​ຂໍ­ອະ­ນຸ­ຍາດ​ແຜນ​ນຳ​ເຂົ້າ ຫຼື Master List ຈາກ​ກະ­ຊວງ​ການ​ເງິນ ມາ​ໃຫ້​ກະ­ຊວງ​ແຜນ­ການ ແລະ ການ​ລົງ­ທຶນ ປັດ­ຈຸ­ບັນ​ແມ່ນ​ກະ­ຊວງ​ແຜນ­ການ ແລະ ການ​ລົງ­ທຶນ​ເປັນ​ຜູ້​ຄົ້ນ­ຄວ້າ​ອະ­ນຸ­ມັດ​ຂໍ້​ຕົກ­ລົງ​ແຜນ​ນຳ​ເຂົ້າ ຫຼັງ​ຈາກ​ຂໍ້​ຕົກ­ລົງ​ອະ­ນຸ­ມັດ​ແລ້ວ ກົມ​ພາ­ສີ​ຈະ​ເປັນ​ຜູ້​ຄຸ້ມ​ຄອງ​ການ​ຫັກ​ລົບ​ແຜນ.

    ສະ­ພາບ​ການ­ຈັດ­ຕັ້ງ​ປະ­ຕິ­ບັດ​ຜ່ານ​ມາ​ເຫັນ​ວ່າ ການ​ອະ­ນຸ­ມັດ​ຂໍ້​ຕົກ­ລົງ​ແຜນ​ນຳ​ເຂົ້າ​ໂດຍ​ກົມ​ສົ່ງ­ເສີມ​ການ​ລົງ­ທຶນ ແມ່ນ​ໃຊ້​ເວ­ລາ​ຂ້ອນ​ຂ້າງ​ຫຼາຍ ເຊິ່ງ​ມີ​ຫຼາຍ​ກໍ­ລະ­ນີ​ທີ່​ໃຊ້​ເວ­ລາ​ເຖິງ 3 ເດືອນ​ຈິ່ງ​ສຳ­ເລັດ ບາງ​ກໍ­ລະ­ນີ​ກໍ່​ຍັງ​ບໍ່​ສຳ­ເລັດ ມາ​ຮອດ​ປັດ­ຈຸ­ບັນ​ກົມ​ແຜນ­ການ ແລະ ການ​ຮ່ວມ​ມື​ກໍ່​ຍັງ​ບໍ່​ທັນ​ອອກ​ຄຳ​ແນະ­ນຳ ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ​ສົ່ງ­ເສີມ​ການ​ລົງ­ທຶນ ເພື່ອ​ໃຊ້​ເປັນ​ບ່ອນ​ອີງ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ ການ​ອະ­ນຸ­ມັດ​ແຜນ​ນຳ​ເຂົ້າ​ເທື່ອ.

    ສ່ວນ​ການ​ນຳ​ເຂົ້າ​ສິນ­ຄ້າ​ຜ່ານ​ດ່ານ​ປະ­ເພ­ນີ​ທີ່​ມີ​ລັກ­ສະ­ນະ​ການ​ຄ້າ ຜ່ານ​ມາ​ໄດ້​ມີ​ແຈ້ງ​ການ ເລກ​ທີ 4115/ກງ ວ່າ​ດ້ວຍ​ການ​ຄຸ້ມ​ຄອງ​ການ​ສົ່ງ​ອອກ-ນຳ​ເຂົ້າ​ສິນ­ຄ້າ ເຄື່ອງ​ຂອງ​ຜ່ານ​ດ່ານ​ພາ­ສີ​ທ້ອງ­ຖິ່ນ ແລະ ດ່ານ​ປະ­ເພ­ນີ​ທີ່​ລະ­ບຸ​ວ່າ ການ​ນຳ​ເຂົ້າ​ຜ່ານ​ດ່ານ​ທ້ອງ­ຖິ່ນ ແລະ ດ່ານ​ປະ­ເພ­ນີ ແມ່ນ​ອະ­ນຸ­ຍາດ​ໃຫ້​ສະ­ເພາະ​ເຄື່ອງ­ໃຊ້​ສອຍ ເຄື່ອງ​ອຸ­ປະ­ໂພກ-ບໍ­ລິ­ໂພກ​ທີ່​ຈຳ­ເປັນ​ຂອງ​ຄົວ​ເຮືອນ​ທີ່​ບໍ່​ມີ​ລັກ­ສະ­ນະ​ທາງ​ດ້ານ​ການ​ຄ້າ​ຜ່ານ​ໄດ້ ແຕ່​ຍັງ​ເຫັນ​ວ່າ​ມີ​ການ​ນຳ​ເຂົ້າ​ສິນ­ຄ້າ​ທີ່​ມີ​ລັກ­ສະ­ນະ​ທາງ​ການ​ຄ້າ​ຜ່ານ​ດ່ານ​ປະ­ເພ­ນີ​ຢູ່ ສາ­ເຫດ​ດັ່ງ­ກ່າວ​ເຮັດ​ໃຫ້​ເກີດ​ການ​ແຂ່ງ­ຂັນ​ທີ່​ບໍ່​ຍຸ­ຕິ​ທຳ​ລະ­ຫວ່າງ​ຜູ້​ປະ­ກອບ​ການ​ທີ່​ນຳ​ເຂົ້າ​ສົ່ງ​ອອກ​ສິນ­ຄ້າ​ຢ່າງ​ຖືກ­ຕ້ອງ ແລະ ຜູ້​ທີ່​ນຳ​ເຂົ້າ​ສິນ­ຄ້າ​ຜ່ານ​ດ່ານ​ປະ­ເພ­ນີ ສະ­ນັ້ນ ສະ­ເໜີ​ໃຫ້​ມີ​ການ​ທົບ​ທວນ­ຄືນ ການ­ຈັດ­ຕັ້ງ​ປະ­ຕິ­ບັດ​ຕາມ​ການ​ແຈ້ງ​ການ ການ​ຄຸ້ມ​ຄອງ​ການ​ສົ່ງ​ອອກ-ນຳ​ເຂົ້າ​ສິນ­ຄ້າ ເຄື່ອງ​ຂອງ​ຜ່ານ​ດ່ານ​ພາ­ສີ​ທ້ອງ­ຖິ່ນ ແລະ ດ່ານ​ປະ­ເພ­ນີ.

ຂ່າວທີ່ກ່ຽວຂ້ອງ