ຣິວ ມາດຣິດ ທຸ່ມງົບ 200 ລ້ານປອນຂໍຊື້ ອາຊາ

81 16 ກ.ກ. 2018 ວົງຈອນກີລາ
ຣິວ ມາດຣິດ ທຸ່ມງົບ  200 ລ້ານປອນຂໍຊື້ ອາຊາ

          ກອງເຊຍບານເຊວຊີ ສໍ່ແວວຕ້ອງປ່ອຍໃຈໄປກັບການເສຍດາວດັງ 2 ຄົນໄປໃຫ້ ຣິວ ມາດຣິດ ຫຼັງຈາກ ຣິວ ມາດຣິດ ເລັງທຸ່ມເງິນກ້ອນໃຫຍ່ຊື້ທັງ ເອແດັນ ອາຊາ ແລະ ຕິໂບ ກູກຕົວ.

          ຣິວ ມາດຣິດ ມະຫາອໍານາດວົງການເຕະບານແຫ່ງເວທີ ລາ ລີກາ ແອັດສະປາຍ ພ້ອມທຸ່ມເງິນກ້ອນໃຫຍ່ເຖິງ 200 ລ້ານປອນ ເພື່ອດຶງ ເອແດັນ ອາຊາ ປີກຄົນເກ່ງຂອງ ເຊວຊີ ຫຼັງນັກເຕະຢືນຢັນແລ້ວວ່າ ພ້ອມທີ່ຈະອໍາລາຖິ່ນສະແຕມຟອດ ບຣິດ ໄລຍະພັກຮ້ອນນີ້ ເພາະເຖິງເວລາທີ່ຈະໄດ້ພົບເຈິະປະສົບການແປກໃໝ່.

          ດາວເຕະທີມຊາດແບນຊິກ ໄວ 27 ປີ ມີຂ່າວກ່ຽວໂຍງກັບ ຣິວ ມາດຣິດ ຢ່າງຕໍ່ເນື່ອງ ຫຼັງຈາກປະສົບຄວາມສໍາເລັດຢ່າງສູງກັບ 6 ປີ ໃນສີເສື້ອເຊວຊີ ດ້ວຍຕໍາແໜ່ງແຊັມ ພຣີເມຍລີກ 2 ສະໄໝ ເອຟເອ ຄັບ 1 ສະໄໝ ອີເອຟແອວ ຄັພ 1 ສະໄໝ ແລະ ຢູໂຣປາ ລີກ ອີກ 1 ສະໄໝ.

          "ເດລີ່ ເມລ" ສື່ອັງກິດ ລາຍງານຂ່າວເມື່ອວັນອາທິດທີ 15 ກໍລະກົດທີ່ຜ່ານມາວ່າ ຣິວ ມາດຣິດ ພ້ອມແລ້ວທີ່ຈະຢື່ນຂໍ້ສະເໜີຢ່າງຈິງຈັງໃຫ້ກັບ ເຊວຊີ ເພື່ອຊື້ ອາຊາ ມາເສີມທັບໃນລາຄາ 200 ລ້ານປອນ ຫຼັງຈາກທີ່ຫາກໍປ່ອຍ ຄຣິສເຕຍໂນ່ ໂຣນັນໂດ ໄປໃຫ້ ຢູເວນຕຸສ ດ້ວຍຄ່າຕົວ 105 ລ້ານເອີໂຣ.

          ຂະນະດຽວກັນ ຣິວ ມາດຣິດ ຍັງຕ້ອງການດຶງ ຕິໂບ ກູກຕົວ ຜູ້ຮັກສາປະຕູຂອງເຊວຊີ ເຂົ້າໄປຮ່ວມທີມ ຣິວ ມາດຣິດ ອີກຄົນດ້ວຍ ໂດຍຄາດວ່າ ຄ່າຕົວຢູ່ທີ່ 35 ລ້ານເອີໂຣ.

ຂ່າວທີ່ກ່ຽວຂ້ອງ