ຂ່າວຫຼ້າສຸດ

ພ້ອມສູ້ຊົນສ້າງຜົນງານ ໃນກີລານັກຮຽນອາຊຽນ

290 16 ກ.ກ. 2018 ວົງຈອນກີລາ
ພ້ອມສູ້ຊົນສ້າງຜົນງານ ໃນກີລານັກຮຽນອາຊຽນ

   ພິ­ທີ​ພົບ​ປະ​ໂອ້​ລົມ​ບັນ­ດາ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ທີ່​ຈະ​ເຂົ້າ​ຮ່ວມ​ແຂ່ງ­ຂັນ​ງານ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 10 ຈັດ​ຂຶ້ນ​ວັນ​ທີ 12 ກໍ­ລະ­ກົດ 2018 ທີ່​ຫ້ອງ​ປະ­ຊຸມ​ວິ­ທະ­ຍາ­ໄລ ສິ­ລະ​ປະ​ສຶກ​ສາ ມີ​ທ່ານ ກອງ​ສີ ແສງ​ມະ­ນີ ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ປະ­ທານ​ສະ­ຫະ­ພັນ​ກີ­ລາ​ນັກ­ຮຽນ​ສາ­ມັນ​ລາວ ມີ​ທ່ານ ບຸນ​ສຸກ ທິ​ລະ​ສັກ ຫົວ­ໜ້າ​ກົມ​ພະ­ລະ ແລະ ສິ­ລະ​ປະ​ສຶກ​ສາ ທັງ​ເປັນ​ຄະ­ນະ​ຮັບ­ຜິດ­ຊອບ​ນັກ­ກີ­ລາ​ນັກ­ຮຽນ​ລາວ ພ້ອມ​ດ້ວຍ​ບັນ­ດາ​ຮອງ​ຫົວ­ໜ້າ​ກົມ ຫົວ­ໜ້າ​ພະ​ແນກ ຂະ­ແໜງ­ການ​ທີ່​ກ່ຽວ­ຂ້ອງ ຜູ້­ອຳ­ນວຍ­ການ​ວິ­ທະ­ຍາ­ໄລ​ສິ­ລະ​ປະ ຕະ­ຫຼອດ​ຮອດ​ຄູ​ເຝິກ ຄະ­ນະ​ຮັບ­ຜິດ­ຊອບ ແລະ ນັກ­ກີ­ລາ ເຂົ້າ​ຮ່ວມ.

   ໂອ­ກາດ​ນີ້ ທ່ານ ບຸນ​ສຸກ ທິ​ລະ​ສັກ ໄດ້​ກ່າວ​ໃຫ້​ຮູ້​ວ່າ: ມາ​ຮອດ​ປັດ­ຈຸ­ບັນ ການ​ກະ­ກຽມ​ຄວາມ​ພ້ອມ​ທາງ​ດ້ານ​ຕ່າງໆ​ຂອງ​ແຕ່​ລະ​ພາກ­ສ່ວນ ທີ່​ຈະ​ເຂົ້າ​ຮ່ວມ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 10 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ລະ­ຫວ່າງ​ວັນ​ທີ 19-27 ກໍ­ລະ­ກົດ 2018 ແມ່ນ​ມີ​ຄວາມ​ພ້ອມ​ເກືອບ 100% ໂດຍ​ສະ­ເພາະ​ແຕ່​ລະ​ຫະ​ພັນ​ທີ່​ຈະ​ສົ່ງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ ແມ່ນ​ໄດ້​ພ້ອມ​ກັນ​ຂຸ້ນ­ຂ້ຽວ​ເຝິກ­ຊ້ອມ​ຢ່າງ​ເປັນ​ປົກ­ກະ­ຕິ ແລະ ເອົາ­ໃຈ­ໃສ່​ຢ່າງ​ຈິງ​ຈັງ ເຊິ່ງ​ການ​ແຂ່ງ­ຂັນ​ໃນ​ຄັ້ງ​ນີ້ ປະ­ເທດ​ເຈົ້າ­ພາບ ໄດ້​ກຳ­ນົດ​ເອົາ 11 ປະ­ເພດ​ກີ­ລາ​ບັນ­ຈຸ​ເຂົ້າ​ແຂ່ງ­ຂັນ ຄື: ກິ­ລາ​ແລ່ນ-ລານ ລອຍ­ນ້ຳ ກະ­ຕໍ້ ດອກ​ປີກ​ໄກ່ ບານ­ບ້ວງ ກາ​ຍະ​ກຳ​ປະ­ກອບ​ອຸ­ປະ­ກອນ ກາ​ຍະ​ກຳ​ເສລີ ປິ່ງ​ປ່ອງ ບານ­ສົ່ງ ເນັດ​ບານ ແລະ ກີ­ລາ​ສະ​ຄວຊ ສະ­ເພາະ ສປປ ລາວ ຈະ​ສົ່ງ​ຄະ​ນຳ ຄູ​ເຝິກ ແລະ ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ ທັງ​ໝົດ 77 ທ່ານ ໃນ​ນັ້ນ ມີ​ຄະ­ນະ​ນຳ 17 ທ່ານ ຄູ​ເຝິກ 13 ທ່ານ ແລະ ນັກ­ກີ­ລາ 47 ຄົນ ຍິງ 16 ຄົນ ໃນ 4 ປະ­ເພດ​ກີ­ລາ ຄື: ແລ່ນ-ລານ ລອຍ­ນ້ຳ ດອກ​ປີກ​ໄກ່ ແລະ ກະ­ຕໍ້.

   ທ່ານ ກອງ​ສີ ແສງ​ມະ­ນີ ກໍ່​ໄດ້​ຮຽກ­ຮ້ອງ​ໃຫ້​ນັກ­ກີ­ລາ​ທຸກ​ຄົນ ຈົ່ງ​ພ້ອມ​ກັນ​ຮັກ­ສາ​ສຸ­ຂະ­ພາບ​ໃຫ້​ດີ ກ່ອນ​ເຂົ້າ​ຮ່ວມ​ແຂ່ງ­ຂັນ​ກໍ່​ພ້ອມ​ກັນ​ເອົາ­ໃຈ­ໃສ່​ເຝິກ­ຊ້ອມ ເບິ່ງ​ເລື່ອງ​ອາ­ຫານ​ການ​ກິນ ການ​ເດີນ­ທາງ​ກໍ່​ໃຫ້​ຢູ່​ໃນ​ລະ­ບຽບ​ວິ­ໄນ ຮັກ­ສາ​ລະ­ບຽບ​ວິ­ໄນ​ການ​ກິນ​ຢູ່​ໄປ-ມາ ຕ້ອງ​ຟັງ​ຄຳ​ສັ່ງ­ສອນ​ຂອງ​ຄູ-ອາ­ຈານ ເອົາ­ໃຈ­ໃສ່​ປະ­ຕິ­ບັດ​ເລື່ອງ​ຮີດ­ຄອງ​ປະ­ເພ­ນີ​ພາຍ​ໃນ​ປະ­ເທດ​ຂອງ​ເຂົາ­ເຈົ້າ ສ່ວນ​ຄະ­ນະ​ຮັບ­ຜິດ­ຊອບ ແລະ ຄູ​ເຝິກ​ກໍ່​ຕ້ອງ​ຕິດ­ຕາມ​ຕາງ​ລະ​ລາງ​ການ​ແຂ່ງ­ຂັນ​ໃຫ້​ລະ­ອຽດ ເຖິງ​ຢ່າງ­ໃດ​ກໍ່​ຕາມ ເຊື່ອ​ວ່າ​ທຸກ​ພາກ­ສ່ວນ​ຈະ​ຕັ້ງ­ໃຈ ມີ​ສະ­ມາ­ທິ​ໃນ​ການ​ແຂ່ງ­ຂັນ ສູ້​ຊົນ​ຍາດ​ໃຫ້​ໄດ້​ຫຼຽນ​ໃດ​ຫຼຽນ​ໜຶ່ງ ເພື່ອ​ເປັນ​ຜົນ­ງານ​ໃຫ້​ກັບ​ປະ­ເທດ​ຊາດ.

ຂ່າວທີ່ກ່ຽວຂ້ອງ