“ອານຸສອນ” ຕັ້ງເປົ້າຄວ້າຫຼຽນໃດໜຶ່ງ ແຂ່ງຂັນແລ່ນທີ່ຫວຽດນາມ

69 16 ກ.ກ. 2018 ວົງຈອນກີລາ
“ອານຸສອນ” ຕັ້ງເປົ້າຄວ້າຫຼຽນໃດໜຶ່ງ ແຂ່ງຂັນແລ່ນທີ່ຫວຽດນາມ

   ອີງ​ຕາມ​ການ​ໃຫ້​ສຳ­ພາດ​ຂອງ ອາ​ນຸ​ສອນ ໄຊ​ສາ ນັກ­ກີ­ລາ​ແລ່ນ​ຂ້າມ​ຮົ້ວ 110 ແມັດ​ຊາຍ ທີມ ຊາດ​ລາວ ໃນ​ວັນ​ທີ 12 ກໍ­ລະ­ກົດ ຜ່ານ​ມາ ໃຫ້​ຊາບ​ວ່າ: ປັດ­ຈຸ­ບັນ​ແມ່ນ​ໄດ້​ມາ​ເກັບ​ຕົວ​ເຝິກ­ຊ້ອມ​ຢູ່​ສະ­ໜາມ​ກີ­ລາ​ທຳ​ມະ​ສາດ​ລັງ​ສິດ ປະ­ເທດ​ໄທ ຕັ້ງ­ແຕ່​ວັນ​ທີ 23 ມິ­ຖຸ­ນາ ຜ່ານ​ມາ ເພື່ອ​ກະ­ກຽມ​ຄວາມ​ພ້ອມ​ເຂົ້າ​ຮ່ວມ 5 ລາຍ​ງານ ປະ­ກອບ​ມີ: ແລ່ນ ຫວຽດ­ນາມ ໂອ​ເພັນ 2018 ເອ​ຊຽນ ເກມ 2018 ມະ­ຫາ​ໄລ​ອາ​ຊຽນ 2018 ກີ­ລາ​ແຫ່ງ​ຊາດ 2018 ແລະ ຊີງ​ແຊັມ​ໂລກ 2019 ທີ່​ປະ­ເທດ​ກາ​ຕາ ເຊິ່ງ​ຜ່ານ​ການ​ເຝິກ­ຊ້ອມ​ຢູ່​ປະ­ເທດ​ໄທ ເຫັນ​ວ່າ​ທຳ​ເວ­ລາ​ໄດ້​ດີ​ຂຶ້ນ​ຫຼາຍ​ກວ່າ​ເກົ່າ ເພາະ​ໄດ້​ເຝິກ­ຊ້ອມ​ກັບ​ຄູ​ເຝິກ​ສະ­ຫະ­ລັດ​ອາ​ເມ​ຣິ​ກາ ຜູ້​ທີ່​ມີ​ເທັກ​ນິກ​ໃໝ່ໆ ແລະ ເອົາ­ໃຈ­ໃສ່​ທຸກໆ​ບາດ​ແລ່ນ ເພື່ອ​ບໍ່​ໃຫ້​ມີ​ຈຸດ​ບົກ​ຜ່ອງ ພ້ອມ​ກັບ​ໄດ້​ປັບ­ປຸງ​ເທັກ​ນິກ​ໃນ​ການ​ຂຶ້ນ​ຮົ້ວ​ໄດ້​ໄວ ແລະ ການ​ສະ​ປີດ​ໃນ​ລະ­ຫວ່າງ​ການ​ຂຶ້ນ​ຮົ້ວ ໃຫ້​ມີ​ຄຸ­ນະ­ພາບ.

   ສະ­ນັ້ນ ເຊື່ອ​ວ່າ​ໃນ​ລາຍ­ການ​ທຳ​ອິດ​ກໍ່​ຄື ລາຍ­ການ​ແລ່ນ ຫວຽດ­ນາມ ໂອ​ເພັນ 2018 ທີ່​ປະ­ເທດ ຫວຽດ­ນາມ ເປັນ​ເຈົ້າ­ພາບ ໃນ​ວັນ​ທີ 26-27 ກໍ­ລະ­ກົດ​ນີ້ ມີ​ຄວາມ​ໝັ້ນ​ໃຈ​ວ່າ ຈະ​ສ້າງ​ສະ­ຖິ­ຕິ​ໃໝ່​ທີ່​ດີ​ຂຶ້ນ​ໄດ້ ແລະ ຈະ​ມີ​ຫຼຽນ​ໃດ​ຫຼຽນ​ໜຶ່ງ​ຕິດ​ມື​ກັບ​ມາ ກ່ອນ​ລຸຍ​ງານ​ມະ​ຫະ​ກຳ​ກີ­ລາ​ເອ​ຊຽນ ເກມ ຄັ້ງ​ທີ 18 ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ໃນ​ລະ­ຫວ່າງ​ວັນ​ທີ 18 ສິງ­ຫາ ຫາ 2 ກັນ­ຍາ​ນີ້.

   ສຳ­ລັບ​ການ​ມາ​ເກັບ​ຕົວ​ເຝິກ­ຊ້ອມ​ໃນ​ຄັ້ງ​ນີ້ ແມ່ນ​ໄດ້​ຮັບ​ການ​ຊ່ວຍ­ເຫຼືອ​ຈາກ​ສະ­ມາ­ຄົມ​ກຣີ​ທາ​ແຫ່ງ​ປະ­ເທດ​ໄທ ເລີ່ມ​ຕັ້ງ­ແຕ່​ວັນ​ທີ 23 ມິ­ຖຸ­ນາ ຫາ ວັນ​ທີ 15 ສິງ­ຫາ 2018 ໂດຍ​ມີ​ນັກ­ກີ­ລາ​ແລ່ນ​ຂ້າມ​ຮົ້ວ​ຊາຍ​ອີກ 1 ຄົນ ມາ​ຮ່ວມ​ເຝິກ­ຊ້ອມ​ນຳ​ຄື ທ້າວ ສະ­ຖາ­ພອນ ໄຊ​ຍະ​ພອນ ທີ່​ກະ­ກຽມ​ເຂົ້າ​ຮ່ວມ​ງານ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 10 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ໃນ​ລະ­ຫວ່າງ​ວັນ​ທີ 19-27 ກໍ­ລະ­ກົດ​ນີ້.

ຂ່າວທີ່ກ່ຽວຂ້ອງ