Samsung ເປີດໂຮງງານຜະລິດໂທລະສັບແຫ່ງໃຫຍ່ສຸດໃນໂລກ ຢູ່ທີ່ອິນເດຍ

75 16 ກ.ກ. 2018 ຂ່າວຕ່າງປະເທດ
Samsung ເປີດໂຮງງານຜະລິດໂທລະສັບແຫ່ງໃຫຍ່ສຸດໃນໂລກ ຢູ່ທີ່ອິນເດຍ

   ເມື່ອ​ບໍ່​ດົນ​ມາ​ນີ້ Samsung ໄດ້ຈັດພິທີເປີດຕົວໂຮງງານຜະລິດໂທລະສັບມືຖືແຫ່ງໃຫຍ່ສຸດໃນໂລກ ຢູ່ທີ່ປະເທດອິນເດຍ ຊຶ່ງເປັນຕະຫຼາດໂທລະສັບມືຖືທີ່ພວມພັດທະນາໄວສຸດໃນໂລກນັ້ນ ໂດຍມີນາຍົກລັດຖະມົນຕີອິນເດຍ ນາເຣນດຣາ ໂມດີ ແລະ ປະທານາທິບໍດີ ສ ເກົາຫຼີ ມູນເຈອິນ ທີ່ພວມຢູ່ລະຫວ່າງການຢ້ຽມຢາມອິນເດຍ ເຂົ້າຮ່ວມໃນພິທີ.

    ໂຮງງານຜະລິດໂທລະສັບຂອງ Samsung ຕັ້ງຢູ່ໃນເຂດ ນອຍດາ (ຊານເມືອງນະຄອນຫຼວງ ນີວແດນລີ) ໂດຍຈະຜະລິດໂທລະສັບທີ່ມີຄ່າໃຊ້ຈ່າຍຕ່ຳກວ່າ ທ່າມກາງທີ່ຄ່າໃຊ້ຈ່າຍໃນການຜະລິດ ຢູ່ໃນສູນຜະລິດໂທລະສັບອື່ນໆ ເຊັ່ນຢູ່ໃນຈີນ ພວມນັບມື້ນັບແພງຂຶ້ນ.

   Samsung ໄດ້ປະກອບໂທລະສັບຢູ່ໃນອິນເດຍ ມາຕັ້ງແຕ່ປີ 2007 ແລະ ກໍມີແຜນການ ສົ່ງອອກບັນດາຜະລິດຕະພັນທີ່ຜະລິດຢູ່ໃນອິນເດຍ. Samsung ແຈ້ງໃຫ້ຮູ້ເມື່ອປີກາຍວ່າ ເຂົາເຈົ້າຈະ ໃຊ້ຈ່າຍເງິນປະມານ 716,57 ລ້ານໂດລາສະຫະລັດ ພາຍໃນເວລາ 3 ປີ ເພື່ອເປີດກວ້າງ ກຳລັງການຜະລິດຢູ່ໃນໂຮງງານທີ່ເຂດ ນອຍດາ. ພື້ນຖານການຜະລິດແຫ່ງໃໝ່ດັ່ງກ່າວ ຈະຊ່ວຍໃຫ້ Samsung ເພີ່ມກຳລັງການຜະລິດຂຶ້ນທົບສອງເທົ່າຕົວທີ່ຜະລິດຢູ່ ນອຍດາ ໃນເວລານີ້ຂຶ້ນເປັນ 120 ລ້ານຫົວໜ່ວຍໃນແຕ່ລະປີ ຫຼັງຈາກທີ່ສຳເລັດແຜນການເປີດກວ້າງແຕ່ລະໄລຍະ.

 

ຂ່າວທີ່ກ່ຽວຂ້ອງ