ລັດຖະບານ​ອາກ​ຊັງ​ຕິນ ອອກດຳລັດ​ກ່ຽວ​ກັບ​ການ​ຕັດ​ຫຼຸດ​ການ​ໃຊ້​ຈ່າຍ​ຂອງ​ພາກ​ລັດ

68 16 ກ.ກ. 2018 ຂ່າວຕ່າງປະເທດ
ລັດຖະບານ​ອາກ​ຊັງ​ຕິນ ອອກດຳລັດ​ກ່ຽວ​ກັບ​ການ​ຕັດ​ຫຼຸດ​ການ​ໃຊ້​ຈ່າຍ​ຂອງ​ພາກ​ລັດ

      ວັນ​ທີ 10 ກໍລະກົດ​ທີ່​ຜ່ານ​ມາ ລັດຖະບານ​ອາກ​ຊັງ​ຕິນ ໄດ້​ປະກາດ​ໃຊ້​ດຳລັດ​ສະບັບ​ໜຶ່ງ ກ່ຽວ​ກັບ​ການ​ຕັດ​ຫຼຸດ​ການ​ໃຊ້​ຈ່າຍ​ຂອງ​ພາກ​ລັດ ງົດ​ການ​ຮັບ​ສະໝັກ​ບຸກ​ຄະລາ​ກອນ​ໃຫ້​ແກ່​ອົງການ​ຕ່າງໆ​ຂອງ​ລັດ ທັງ​ນີ້​ກໍ​ເພື່ອ​ເປັນ​ການ​ປະຢັດ​ງົບປະມານ​ກວ່າ 860 ລ້ານ​ໂດ​ລາ​ສະຫະລັດ ທ່າມກາງ​ທີ່​ອາກ​ຊັງ​ຕິນ ພວມ​ປະ​ເຊີນ​ກັບ​ອັດຕາ​ເງິນ​ເຟີ້​ສູງ ຄວາມ​ເຕີບ​ໂຕ​ຫຼຸດ​ລົງ ແລະ​ເງິນ​ເປ​ໂຊ (ສະກຸນ​ເງິນ​ພາຍ​ໃນ​ຂອງ​ອາກ​ຊັງ​ຕິນ) ຕົກ​ຄ່າ​ຢ່າງ​ແຮງ.

    ດຳລັດ​ໃໝ່​ດັ່ງກ່າວ ລະບຸ​ວ່າ ບັນດາ​ອົງການ​ຂອງ​ລັດ ຈະ​ງົດ​ການ​ຮັບ​ບຸກ​ຄະ​ລະ​ກອນ​ໄປ​ຮອດ​ວັນ​ທີ 31 ທັນວາ​ປີໜ້າ ໂດຍ​ຍົກເວັ້ນ​ແຕ່​ອົງການ​ສືບ​ລາຊະການ​ລັບ​ສ່ວນ​ກາງ ຄັງ​ເງິນ ກົມ​ຄຸ້ມ​ຄອງ​ຄ້າຍ​ກັກ​ຂັງ​ສ່ວນ​ກາງ ບັນດາ​ໜ່ວຍ​ງານ​ຄົ້ນຄວ້າ​ການ​ພັດທະນາ​ວິທະຍາສາດ​ເຕັກ​ໂນ​ໂລ​ຊີ ມະຫາວິທະຍາໄລ​ແຫ່ງ​ຊາດ ກອງ​ກຳລັງ​ປະກອບ​ອາວຸດ ແລະ​ກອງ​ກຳລັງ​ຮັກສາ​ຄວາມ​ສະຫງົບ.

    ລັດຖະບານ​ອາກ​ຊັງ​ຕິນ ກໍ​ຈະ​ບໍ່​ສະໜອງ​ການ​ບໍລິການ​ໜູນ​ຊ່ວຍ​ທາງ​ດ້ານ​ເຕັກນິກ ໃຫ້​ແກ່​ບັນດາ​ມະຫາວິທະຍາໄລ​ແຫ່ງ​ຊາດ ສູນ​ການ​ສຶກ​ສາ​ພາກ​ເອກະ​ຊົນ ແລະ ​ຂອງ​ແຂວງ​ຕ່າງໆ ນັບ​ແຕ່​ວັນ​ທີ 1 ມັງກອນ ປີ 2019 ເປັນຕົ້ນ​ໄປ. ຄຽງ​ຄູ່​ກັນ​ນັ້ນ ດຳລັດ​ດັ່ງກ່າວ​ກໍ​ຫ້າມ​ການ​ໃຫ້​ເງິນ​ລາງວັນ ໃຫ້​ລາງວັນ ບ້ວງ​ເງິນ​ພິເສດ ແລະ ເພີ່ມ​ເຕີມ​ງົບປະມານ ໃຫ້​ແກ່​ບັນດາ​ອົງການ ແລະ ​ບຸກຄົນ ນັບ​ແຕ່​ນີ້​ໄປ​ຮອດ​ທ້າຍ​ປີໜ້າ.

    ຕົວ​ເລກ​ສະຖິຕິ ໃຫ້​ຮູ້​ວ່າ ສະເພາະ​ແຕ່​ໃນ​ໄຕ​ມາດ I/2016 ເທົ່າ​ນັ້ນ ເງິນ​ເຟີ້​ຂອງ​ອາກ​ຊັງ​ຕິນ ໄດ້​ຢູ່​ທີ່​ລະດັບ 12,5% ແລະ​ຄາດ​ວ່າ​ຈະ​ຂຶ້ນ​ສູ່​ລະດັບ 30% ໃນ​ປີ​ນີ້.

 

ຂ່າວທີ່ກ່ຽວຂ້ອງ