ອັງກິດ ປະກາດ​ປຶ້ມ​ປົກ​ຂາວ​ກ່ຽວ​ກັບ​ການ​ພົວພັນ​ກັບ EU ໃນ​ຍຸກ​ຫຼັງ Brexit

153 16 ກ.ກ. 2018 ຂ່າວຕ່າງປະເທດ
ອັງກິດ ປະກາດ​ປຶ້ມ​ປົກ​ຂາວ​ກ່ຽວ​ກັບ​ການ​ພົວພັນ​ກັບ EU ໃນ​ຍຸກ​ຫຼັງ Brexit

   ຫຼັງ​ຈາກ​ທີ່​ໄດ້​ໂຈະ​ມາ​ເປັນ​ເວລາ​ຫຼາຍ​ເດືອນ ລັດຖະບານ​ອັງກິດ​ກໍ​ໄດ້​ປະກາດ “ປຶ້ມ​ປົກ​ຂາວ Brexit” ຢ່າງ​ເປັນ​ທາງ​ການ ໃນ​ວັນ​ທີ 12 ກໍລະກົດ​ນີ້ (ເວລາ​ໃນ​ອັງກິດ). ເອກະສານ​ດັ່ງກ່າວ ທີ່​ມີ​ຄວາມ​ຍາວ 98 ໜ້າ​ເຈ້ຍ ໄດ້​ຮັບ​ການ​ຕີ​ລາຄາ​ວ່າ​ເປັນ​ເອກະສານ​ທີ່ “ມີ​ຄວາມ​ໝາຍ​ທີ່​ສຸດ” ກ່ຽວ​ກັບ​ເລື່ອງ​ອັງກິດ​ຖອນ​ອອກ​ຈາກ​ສະຫະພາບ​ເອີ​ຣົບ ຫຼື​ທີ່​ເອີ້ນ​ວ່າ Brexit ນັບ​ແຕ່​ຫຼັງ​ການ​ຢັ່ງ​ສຽງ​ປະຊາ​ມະຕິ​ກ່ຽວ​ກັບ Brexit ເມື່ອ​ປີ 2016 ເປັນຕົ້ນ​ມາ.

    ປຶ້ມ​ດັ່ງກ່າວ ໄດ້​ທ້ອນໂຮມ​ເອົາ​ການ​ການ​ສະເໜີ​ຕ່າງໆ ຊຶ່ງ​ລັດຖະບານ​ອັງກິດ​ນຳ​ອອກ​ມາ ດ້ວຍ​ຄວາມ​ຫວັງ​ເພື່ອ​ສ້າງ​ປຶກ​ແຜ່ນ ໃຫ້​ແກ່​ການ​ພົວພັນ​ໃນ​ທຸກໆ​ຂົງເຂດ​ກັບ EU ໃນ​ອະນາຄົດ ໃນ​ນັ້ນ​ໄດ້​ສຸມ​ໃສ່​ການ​ພົວພັນ​ທາງ​ດ້ານ​ການ​ຄ້າ ແລະ ​ການ​ຮ່ວມ​ມື​ກັບ EU ໃນ​ຊຸມ​ປີ​ຕໍ່ໜ້າ ດ້ວຍ​ການ​ສະເໜີ​ເປັນ​ຈຸດ​ໃຈກາງ​ກໍ​ແມ່ນ​ແຜນການ​ກໍ່ສ້າງ​ເຂດ​ການ​ຄ້າ​ເສລີ​ໃນ​ດ້ານ​ສິນຄ້າ​ຮ່ວມ​ກັບ EU ໂດຍ​ບໍ່​ເອົາ​ຫົວຊາ​ຕໍ່​ສຽງ​ຄັດຄ້ານ ຢູ່​ໃນ​ພັກ​ຄອງ​ເດີມ​ທີ່​ເປັນ​ພັກ​ກຳ​ອຳນາດ​ໃນ​ອັງກິດ​ນັ້ນ.

    ເນື້ອ​ໃນ​ຕົວ​ຈິງ​ຂອງ​ປຶ້ມ​ປົກ​ຂາວ​ດັ່ງກ່າວ ປະກອບ​ມີ​ບັນດາ​ຂໍ້​ສະເໜີ​ຕົ້ນຕໍ ທີ່​ສະແດງ​ໃຫ້​ເຫັນ​ເຖິງ​ຫຼັກ​ໝັ້ນ​ການ​ເຈລະຈາ​ຂອງ​ລັດຖະບານ​ອັງກິດ ຄື: ອັງກິດ​ຈະ​ຮັກສາ “ປະມວນ​ຂໍ້​ກຳນົດ​ລວມ” ກັບ​ສິນຄ້າ​ທຸກໆ​ຢ່າງ ຢູ່​ໃນ​ການ​ຄ້າ​ກັບ EU ທີ່​ປະກອບ​ມີ​ບັນດາ​ຜະລິດ​ຕະ​ພັນ​ກະສິກຳ. ສັນຍາ​ສະບັບ​ໜຶ່ງ​ຈະ​ໄດ້​ຮັບ​ການ​ລົງ​ນາມ ເພື່ອ​ຮັບປະກັນ​ວ່າ​ອັງກິດ​ຈະ​ສືບຕໍ່ “ປະຕິບັດ​ຢ່າງ​ກົມກຽວ” ຕໍ່​ຂໍ້​ຕົກລົງ​ຕ່າງໆ​ຂອງ EU.

 

ຂ່າວທີ່ກ່ຽວຂ້ອງ