ມີ​ແມ່ຍິງ​ປະມານ 214 ລ້ານ​ຄົນ ຂາດ​ຄວາມ​ຮູ້​ກ່ຽວ​ກັບ​ການ​ວາງ​ແຜນ​ຄອບຄົວ

71 16 ກ.ກ. 2018 ຂ່າວຕ່າງປະເທດ
ມີ​ແມ່ຍິງ​ປະມານ 214 ລ້ານ​ຄົນ ຂາດ​ຄວາມ​ຮູ້​ກ່ຽວ​ກັບ​ການ​ວາງ​ແຜນ​ຄອບຄົວ

    ເນື່ອງ​ໃນ​ໂອກາດ​ວັນ​ປະຊາກອນ​ໂລກ (11 ກໍລະກົດ) ປີ​ນີ້ ອົງການ​ສະຫະ​ປະຊາ​ຊາດ (​ສປຊ) ໄດ້​ຍົກ​ສູງ​ບົດບາດ​ຂອງ​ການ​ວາງ​ແຜນ​ຄອບຄົວ ໂດຍ​ຖື​ວ່າ​ນີ້​ເປັນ​ປັດ​ໄຈ​ທີ່​ມີ​ຄວາມ​ໝາຍ​ຕັດສິນ ຕໍ່​ການ​ມອບ​ສິດ​ໃຫ້​ແກ່​ແມ່ຍິງ.

    ທ່ານ​ນາງ ຕາ​ຕາ​ເລຍ ກາ​ເນມ ຜູ້ອຳນວຍການ​ຝ່າຍ​ບໍລິຫານ​ຂອງ​ກອງ​ທຶນ​ປະຊາກອນ​ຂອງ ​ສປຊ (UNFPA) ເວົ້າ​ວ່າການ​ວາງ​ແຜນ​ຄອບຄົວ ບໍ່​ສະເພາະ​ແຕ່​ເປັນ​ບັນຫາ​ສິດທິ​ມະນຸດ​ເທົ່າ​ນັ້ນ ຫາກ​ຍັງ​ເປັນ​ປັດ​ໄຈ​ທີ່​​ີ​ສຳຄັນ ໃນ​ການ​ມອບ​ສິດ​ໃຫ້​ແກ່​ແມ່ຍິງ ເປັນ​ການ​ຊ່ວຍ​ຫຼຸດຜ່ອນ​ຄວາມທຸກ​ຍາກ ແລະ​ບັນລຸ​ການ​ພັດທະນາ​ແບບ​ຍືນ​ຍົງ​ນຳ​ອີກ.

    ເຖິງ​ຢ່າງໃດ​ກໍ​ຕາມ ທ່ານ​ນາງ ຕາ​ຕາ​ເລຍ ກາ​ເນມ ກໍ​ໃຫ້​ຮູ້​ວ່າ ຢູ່​ໃນ​ບັນດາ​ປະເທດ​ພວມ​ພັດທະນາ​ນັ້ນ ມີ​ແມ່ຍິງ​ປະມານ 214 ລ້ານ​ຄົນ ຍັງ​ບໍ່​ທັນ​ໄດ້​ຮັບ​ການ​ປະກອບ​ຄວາມ​ຮູ້​ກ່ຽວ​ກັບ​ການ​ວາງ​ແຜນ​ຄອບຄົວ​ທີ່​ປອດ​ໄພ ແລະ​ມີ​ປະ​ສິດທິ​ຜົນ ໂດຍ​ເກີດ​ຈາກ​ການ​ຂາດ​ຂໍ້​ມູນ​ຂ່າວສານ ຫຼື​ການ​ບໍລິການ​ທີ່​ກ່ຽວຂ້ອງ ພ້ອມ​ທັງ​ຂາດ​ການ​ສະໜັບສະໜູນ​ຈາກ​ຄູ່​ຮ່ວມ ຫຼື​ເຂດ​ຊຸມ​ຊົນ​ພວກ​ເຂົາ​ທີ່​ອາໄສ.

    ທ່ານ​ນາງ ຕາ​ຕາ​ເລຍ ກາ​ເນມ ເວົ້າ​ວ່າ ວຽກ​ງານ​ວາງ​ແຜນ​ຄອບຄົວ ກໍ​ມີ​ຄວາມ​ຕ້ອງການ​ເຖິງ​ການ​ມີ​ສ່ວນ​ຮ່ວມ​ຂອງ​ລັດຖະບານ ສະພາ​ແຫ່ງ​ຊາດ​ຂອງ​ປະເທດ​ຕ່າງໆ ແລະ​ຂອງ​ທົ່ວ​ສັງຄົມ.

    ພົນລະເມືອງ​ຂອງ​ໂລກ​ຄົນທີ 5 ຕື້ ໄດ້​ມືນ​ຕາ​ຂຶ້ນ​ມາ​ມອງ​ໂລກ ໃນ​ວັນ​ທີ 11 ກໍລະກົດ ປີ 1987. ເຫດການ​ນີ້​ຖື​ວ່າ​ເປັນ​ຂີດ​ໝາຍ ໃຫ້​ແກ່​ການ​ອື້ນ​ຂຶ້ນ​ຂອງ​ປະຊາກອນ​ໂລກ ແລະ ​ສປຊ ໄດ້​ຕົກລົງ​ເລືອກ​ເອົາ​ວັນ​ດັ່ງກ່າວ (11 ກໍລະກົດ) ເປັນ​ວັນ​ປະຊາກອນ​ໂລກ.

 

ຂ່າວທີ່ກ່ຽວຂ້ອງ