ຂ່າວຫຼ້າສຸດ

ປະລິມານ​ການ​ຜະລິດ​ນ້ຳມັນ​ຂອງ​ເວ​ເນ​ຊູ​ເອ​ລາ ຫຼຸດ​ລົງ​ສູ່​ລະດັບ​ຕ່ຳ​ສຸດ​ໃນ​ຮອບ 30 ປີ

139 16 ກ.ກ. 2018 ຂ່າວຕ່າງປະເທດ
ປະລິມານ​ການ​ຜະລິດ​ນ້ຳມັນ​ຂອງ​ເວ​ເນ​ຊູ​ເອ​ລາ ຫຼຸດ​ລົງ​ສູ່​ລະດັບ​ຕ່ຳ​ສຸດ​ໃນ​ຮອບ 30 ປີ

    ອົງການ​ບັນດາ​ປະເທດ​ຜູ້​ສົ່ງ​ອອກ​ນ້ຳມັນ (OPEC) ແຈ້ງ​ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ ປະລິມານ​ການ​ຜະລິດ​ນ້ຳມັນ​ຂອງ​ເວ​ເນ​ຊູ​ເອ​ລາ ໃນ​ເດືອນ​ມິຖຸນາ ປີ 2018 ໄດ້​ຫຼຸດ​ລົງ​ໄປ​ຍັງ​ເຫຼືອ​ທີ່ 1,5 ລ້ານ​ບາ​ເຣນ/ວັນ ນັບ​ວ່າ​ເປັນ​ລະດັບ​ຕ່ຳ​ສຸດ​ໃນ​ຮອບ 30 ປີ​ທີ່​ຜ່ານ​ມາ.

    ຂົງເຂດ​ນ້ຳມັນ ປະກອບສ່ວນ​ເຖິງ 96% ຂອງ​ລາຍ​ຮັບ​ງົບປະມານ​ຂອງ​ເວ​ເນ​ຊູ​ເອ​ລາ ແລະ ​ການ​ຂາດແຄນ​ເງິນຕາ​ຕ່າງປະເທດ ໄດ້​ນຳໄປ​ສູ່​ສະພາບ​ເສດຖະກິດ​ເປັນ “ອຳມະພາດ” ເຮັດ​ໃຫ້​ປະເທດ​ນີ້​ຕົກ​ຢູ່​ໃນ​ສະພາບ​ຂາດແຄນ​ສະບຽງ​ອາຫານ ແລະ ຜະລິດ​ຕະ​ພັນ​ການ​ຢາ ຢ່າງ​ຮ້າຍ​ແຮງ.

    ກອງ​ທຶນ​ເງິນຕາ​ສາກົນ (IMF) ໃຫ້​ຮູ້​ວ່າ ສະພາບ​ຫຼຸດ​ຖອຍ​ທາງ​ດ້ານ​ເສດຖະກິດ​ຂອງ​ເວ​ເນ​ຊູ​ເອ​ລາ ນັບ​ວ່າ​ຂີ້ຮ້າຍ​ທີ່​ສຸດ ຢູ່​ໃນ​ປະຫວັດສາດ​ຂອງ​ເສດຖະກິດ​ໂລກ​ທີ່​ທັນ​ສະໄໝ. ເສດຖະກິດ​ຂອງ​ເວ​ເນ​ຊູ​ເອ​ລາ ໄດ້​ຫຼຸດ​ຖອຍ​ລົງ 45% ນັບ​ແຕ່​ປີ 2013 ເປັນຕົ້ນ​ມາ ແລະ  IMF ໃຫ້ການ​ຄ່າດ​ຄະເນ​ວ່າ​ເສດຖະກິດ​ຂອງ​ເວ​ເນ​ຊູ​ເອ​ລາ ຈະ​ຫຼຸດ​ຖອຍ​ລົງ 15% ໃນ​ປີ 2018 ດ້ວຍ​ອັດຕາ​ເງິນ​ເຟີ້​ຂຶ້ນ​ເຖິງ  13.800%.

    ມີ​ຂ່າວ​ວ່າ ທ່ານ ຊູ​ຮາ​ອີ​​ລ ອາ​​ລ-ມາ​ສຣູ​ເອ ປະທານ OPEC ໃຫ້​ຮູ້​ວ່າ ການ​ຜັນ​ຜວນ​ຢູ່​ໃນ​ຕະຫຼາດ​ນ້ຳມັນ​ດິບ​ຂອງ​ໂລກ ເປັນ​ເລື່ອງ​ທີ່​ບໍ່​ເພິ່ງ​ປາຖະໜາ ແລະ ​ວ່າ OPEC ຫວັງ​ຢາກ​ໃຫ້​ລາຄາ​ນ້ຳມັນ​ມີ​ຄວາມ​ໝັ້ນຄົງ. ທ່ານ ຊູ​ຮາ​ອີ​​ລ ອາ​​ລ-ມາ​ສຣູ​ເອ ກໍ​ເວົ້າ​ວ່າ OPEC ແລະ​ບັນດາ​ປະເທດ​ຜູ້​ຜະລິດ​ນ້ຳມັນ​ທີ່​ບໍ່​ເປັນ​ສະມາຊິກ OPEC ພວມ​ເຮັດ​ວຽກ​ກ່ຽວ​ກັບ​ແຜນການ​ໄລຍະ​ຍາວ ເພື່ອ​ສ້າງ​ກຳລັງ​ການ​ຜະລິດ​ສຳຮອງ ທີ່​ສາມາດ​ຊ່ວຍ​ໃຫ້​ຕະຫຼາດ​ຮອງ​ຮັບ​ກໍລະນີ​ຂາດແຄນ​ແຫຼ່ງ​ສະໜອງ​ທີ່ຢູ່​ນອກ​ເໜືອ​ການ​ຄາດ​ຄະເນ.

 

ຂ່າວທີ່ກ່ຽວຂ້ອງ