ຂ່າວຫຼ້າສຸດ

EU ກັງວົນ​ເລື່ອງ​ຄວາມ​ເຄັ່ງ​ຕຶງ​ດ້ານ​ການ​ຄ້າ​ກັບ ສ ອາ​ເມ​ຣິ​ກາ

124 16 ກ.ກ. 2018 ຂ່າວຕ່າງປະເທດ
EU ກັງວົນ​ເລື່ອງ​ຄວາມ​ເຄັ່ງ​ຕຶງ​ດ້ານ​ການ​ຄ້າ​ກັບ ສ ອາ​ເມ​ຣິ​ກາ

     ເມື່ອ​ວັນ​ທີ 12 ກໍລະກົດ​ທີ່​ຜ່ານ​ມາ ສະຫະພາບ​ເອີ​ຣົບ (EU) ໄດ້​ປັບ​ຫຼຸດ​ການ​ຄາດ​ຄະເນ​ຄວາມ​ເຕີບ​ໂຕ ສຳລັບ​ເຂດ​ໃຊ້​ເງິນ​ເອີ​ໂຣ (Eurozone) ໃນ​ປີ 2018 ພ້ອມ​ທັງ​ແຈ້ງ​ເຕືອນ​ວ່າ ຄວາມ​ເຄັ່ງ​ຕຶງ​ທາງ​ດ້ານ​ການ​ຄ້າ​ກັບ ສ ອາ​ເມ​ຣິ​ກາ ພວມ​ກະທົບ​ຕໍ່​ພື້ນຖານ​ເສດຖະກິດ​ຂອງ​ເຂດ​ດັ່ງກ່າວ.

    ໃນ​ບົດ​ລາຍ​ງານ​ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 12 ກໍລະກົດ​ນັ້ນ ຄະນະ​ກຳມະການ​ເອີ​ຣົບ (EC) ຊຶ່ງ​ເປັນ​ອົງການ​ປະຕິບັດ​ກົດໝາຍ​ຂອງ EU ໃຫ້ການ​ຄາດ​ຄະເນ​ວ່າ ເສດຖະກິດ  Eurozone ທີ່​ປະກອບ​ມີ 19 ປະເທດ​ເປັນ​ສະມາຊິກ ຈະ​ເພີ່ມ​ຂຶ້ນ 2,1% ໃນ​ປີ​ນີ້ ເປັນ​ຕົວ​ເລກ​ທີ່​ຫຼຸດ​ລົງ​ເມື່ອ​ທຽບໃສ່​ລະດັບ 2,3% ທີ່​ໄດ້​ຄາດ​ຄະເນ​ອອກ​ມາ​ເມື່ອ​ຕົ້ນ​ເດືອນ​ພຶດສະພາ​ທີ່​ຜ່ານ​ມາ.

    ເຖິງ​ຢ່າງໃດ​ກໍ​ຕາມ ເສດຖະກິດ​ຂອງ Eurozone ຄາດ​ວ່າ​ຈະ​ເພີ່ມ​ຂຶ້ນ 2% ໃນ​ປີ 2019 ດັ່ງ​ທີ່​ໄດ້​ຄາດ​ຄະເນ​ໄວ້​ກ່ອນ​ໜ້າ​ນີ້. ເຢຍ​ລະ​ມັນ ແລະ​ຝຣັ່ງ ຊຶ່ງ​ເປັນ​ພື້ນຖານ​ເສດຖະກິດ​ອັນ​ກັບ​ແຖວ​ໜ້າ​ຂອງ Eurozone ໄດ້​ຮັບ​ການ​ຄາດ​ຄະເນ​ວ່າ ຈະ​ເສຍ​ທ່ວງ​ທ່າ​ຄວາມ​ເຕີບ​ໂຕ ໃນ​ປີ​ນີ້ ແລະ​ປີໜ້າ. ໃນ​ນັ້ນ ຄວາມ​ເຕີບ​ໂຕ​ຍອດ​ຜະ​ລິ​ດະ​ພັນ​ພາຍ​ໃນ​ປະເທດ (GDP) ຂອງ​ເຢຍ​ລະ​ມັນ ຈະ​ບັນລຸ​ພຽງ​ທີ່  1,9% ຢູ່​ໃນ​ທັງ​ສອງ​ປີ​ດັ່ງກ່າວ ຕາມ​ລຳດັບ​ຈະ​ຫຼຸດ​ລົງ 0,4% ແລະ 0,2% ເມື່ອ​ທຽບໃສ່​ລະດັບ​ທີ່​ໄດ້​ຄາດ​ຄະເນ​ໄວ້​ກ່ອນ​ໜ້າ​ນີ້. ເມື່ອ​ປີ​ກາຍ GDP ຂອງ​ເຢຍ​ລະ​ມັນ ເຕີບ​ໂຕ​ທີ່​ລະດັບ 2,2%. ໃນ​ຂະນະ​ດຽວ​ກັນ ຄວາມ​ເຕີບ​ໂຕ​ຂອງ​ພື້ນຖານ​ເສດຖະກິດ​ຝຣັ່ງ ຈະ​ບັນລຸ​ທີ່​ລະດັບ 1,7% ໃນ​ປີ​ນີ້ ແລະ​ປີໜ້າ.

    ພື້ນຖານ​ເສດຖະກິດ​ທີ່​ມີ​ຄວາມ​ເຕີບ​ໂຕ​ດ້ອຍ​ທີ່​ສຸດ​ຢູ່​ໃນ Eurozone ຍັງ​ຄົງ​ແມ່ນ​ອີ​ຕາ​ລີ ດ້ວຍ​ລະດັບ​ຄວາມ​ເຕີບ​ໂຕ​ຄາດ​ວ່າ​ບັນລຸ 1,3% ໃນ​ປີ​ນີ້ ຊຶ່ງ​ຕ່ຳ​ກວ່າ​ລະດັບ 1,5% ທີ່​ຄາດ​ຄະເນ​ໄວ້​ເມື່ອ​ເດືອນ​ພຶດສະພາ​ທີ່​ຜ່ານ​ມາ ແລະ ​ຈະ​ຫຼຸດ​ລົງ​ໄປ​ຍັງ​ເຫຼືອ​ທີ່​ລະດັບ 1,1% ໃນ​ປີ 2019.

    ບົດ​ລາຍ​ງານ​ຂອງ EC ກໍ​ໄດ້​ແຈ້ງ​ເຕືອນ​ວ່າ ຖ້າ​ຫາກ​ວ່າຄວາມ​ເຄັ່ງ​ຕຶງ​ດ້ານ​ການ​ຄ້າ ລະຫວ່າງ EU ກັບ ສ ອາ​ເມ​ຣິ​ກາ ສືບຕໍ່​ເພີ່ມ​ຂຶ້ນ ກໍ​ອາດ​ຈະ​ເຮັດ​ໃຫ້​ຄວາມ​ເຊື່ອ​ຖື​ຂອງ​ບັນດາ​ນັກ​ລົງທຶນ​ຫຼຸດ​ລົງ ແລະ​ເຮັດ​ໃຫ້​ເກີດ​ການ​ກີດຂວາງ​ຕໍ່​ຂະ​ບວນ​ການ​ຟື້ນ​ຟູ ຂອງ​ພື້ນຖານ​ເສດຖະກິດ​ທົ່ວ​ໂລກ.

 

ຂ່າວທີ່ກ່ຽວຂ້ອງ