ຂ່າວຫຼ້າສຸດ

ແມ່ຍິງກັບການອະນຸຮັກວັດທະນະທຳ ສູ່ປີທ່ອງທ່ຽວລາວ

254 16 ກ.ກ. 2018 ຂ່າວໜ້າ​ໜຶ່ງ
ແມ່ຍິງກັບການອະນຸຮັກວັດທະນະທຳ ສູ່ປີທ່ອງທ່ຽວລາວ

    ກິດ­ຈະ­ກຳ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ສະ­ຫະ­ພັນ​ແມ່­ຍິງ​ລາວ ຄົບ­ຮອບ 63 ປີ ຈັດ​ໃນ​ວັນ​ທີ 13 ກໍ­ລະ­ກົດ 2018 ທີ່​ສູນ​ອົບ­ຮົມ​ແມ່­ຍິງ​ລາວ ນະ­ຄອນ­ຫຼວງ​ວຽງ​ຈັນ ໂດຍ​ເຂົ້າ​ຮ່ວມ​ຂອງ ທ່ານ ບຸນ​ຍັງ ວໍ­ລະ​ຈິດ ເລ­ຂາ​ທິ ການ​ໃຫຍ່ ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ​ແຫ່ງ ສປປ ລາວ ພ້ອມ​ດ້ວຍ​ພັນ​ລະ​ຍາ ມີ​ທ່ານ​ຮອງ​ນາ ຍົກ​ລັດ­ຖະ­ມົນ­ຕີ ການ​ນຳ​ພັກ-ລັດ ພະ­ນັກ­ງານ​ປະ­ຕິ­ວັດ​ອະ​ວຸ​ໂສ ຄອບ­ຄົວ​ການ​ນຳ ຜູ້​ຊົງ​ຄຸນ​ວຸດ​ທິ ທູ­ຕາ­ນຸ­ທູດ ອົງ­ການ ຈັດ​ຕັ້ງ​ສາ­ກົນ ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ຄະ­ນະ​ນຳ​ສະ­ຫະ­ພັນ​ແມ່­ຍິງ ແລະ ສະ­ມາ­ຊິກ​ສະ­ຫະ ພັນ​ແມ່­ຍິງ​ບັນ­ດາ​ກະ­ຊວງ ອົງ­ການ​ຂັ້ນ​ສູນ​ກາງ ແຂວງ ນະ­ຄອນ­ຫຼວງ ນັກ­ທຸ­ລະ­ກິດ​ຍິງ ແລະ ບໍ­ລິ­ສັດ​ຫ້າງ​ຮ້ານ​ເຂົ້າ​ຮ່ວມ.

    ທ່ານ ນາງ ອິນ​ລາ​ວັນ ແກ້ວ​ບຸນ​ພັນ ປະ­ທານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ກ່າວ​ວ່າ: ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ສະ­ຫະ­ພັນ​ແມ່­ຍິງ ໃນ​ປີ 2018 ພາຍ​ໃຕ້​ຫົວ­ຂໍ້: ແມ່­ຍິງ​ກັບ​ການ​ອະ­ນຸ​ຮັກ​ວັດ­ທະ­ນະ­ທຳ ສູ່​ປີ​ທ່ອງ​ທ່ຽວ​ລາວ ການ​ຮັກ­ສາ​ສິ່ງ­ແວ­ດລ້ອມ​ສີ­ຂຽວ ແລະ ຍືນ​ຍົງ ແມ່ນ​ມີ​ຄວາມ​ໝາຍ​ສຳ­ຄັນ​ຫຼາຍ ຕິດ​ພັນ​ກັບ​ປີ​ທ່ອງ​ທ່ຽວ 2018 ຢ່າງ​ເປັນ​ຂະ​ບວນ​ຟົດ­ຟື້ນ ແລະ ກວ້າງ­ຂວາງ ຕະ­ຫຼອດ​ໄລ­ຍະ 63 ປີ ໄດ້​ສະ­ແດງ​ໃຫ້​ເຫັນ​ເຖິງ​ການ​ເຕີບ​ໃຫຍ່​ຂະ­ຫຍາຍ­ຕົວ​ຂອງ​ການ­ຈັດ­ຕັ້ງ​ສະ­ຫະ­ພັນ​ແມ່­ຍິງ​ລາວ ໃນ​ແຕ່​ລະ​ໄລ­ຍະ ການ​ພັດ­ທະ­ນາ​ແມ່­ຍິງ​ນັບ​ມື້​ເຕີບ​ໃຫຍ່​ເຂັ້ມ­ແຂງ​ຮອບ­ດ້ານ ໄປ​ຄຽງ​ຄູ່​ກັບ​ການ​ສົ່ງ­ເສີມ ແລະ ອະ­ນຸ​ຮັກ​ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາດ ມູນ­ເຊື້ອ​ທີ່​ເປັນ​ເອ­ກະ­ລັກ​ວັດ­ທະ­ນະ­ທຳ​ບັນ­ດາ­ເຜົ່າ ເສີມ​ຂະ­ຫຍາຍ​ມູນ­ເຊື້ອ ຄຸນ­ຄ່າ​ມໍ­ລະ­ດົກ​ທາງ​ດ້ານ​ວັດ­ທະ­ນະ­ທຳ ແລະ ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ​ໃຫ້​ຢູ່​ຄູ່​ກັບ​ສັງ­ຄົມ​ລາວ​ຕະ­ຫຼອດ​ໄປ.

    ກິດ­ຈະ­ກຳ​ສ້າງ​ຂະ​ບວນ​ການ​ວັນ​ນີ້ ປະ­ກອບ​ມີ​ກິດ­ຈະ­ກຳ​ຫຼາຍ​ຢ່າງ ໂດຍ​ເລີ່ມ​ຈາກ​ຊົມ​ຂະ​ບວນ​ສະ­ແດງ​ກ້ອນ​ກຳ­ລັງ ຂອງ​ບັນ­ດາ​ເອື້ອຍ​ນ້ອງ​ແມ່­ຍິງ ຢ້ຽມ​ຊົມ​ຫໍ​ມູນ­ເຊື້ອ​ແມ່­ຍິງ​ລາວ ມີ​ກາ­ນວາງ­ສະ­ແດງ​ຕະ­ຫຼາດ­ນັດ​ແບບ​ພື້ນ­ເມືອງ (ໂລະ​ລາດ) ທີ່​ໃຊ້​ວັດ​ຖູ​ອຸ­ປະ­ກອນ​ຈາກ​ທຳ​ມະ​ຊາດ ເພື່ອ​ເປັນ​ການ​ປະ­ກອບ­ສ່ວນ​ຮັກ­ສາ​ສິ່ງ­ແວ­ດລ້ອມ ຕາມ​ທິດ​ສີ­ຂຽວ ແລະ ຍືນ​ຍົງ ມີ​ການ​ຈັດ­ການ​ແຂ່ງ­ຂັນ​ຝັດ​ເຂົ້າ ການ​ຫໍ່​ເຂົ້າ­ຕົ້ມ ຫຍິບ​ໝາກ­ເບັງ ແລະ ແຂ່ງ­ຂັນ​ກີ­ລາ​ອື່ນໆ ແບບ​ພື້ນ­ເມືອງ ເຊິ່ງ​ງານ​ຄັ້ງ​ນີ້​ຈະ​ດຳ­ເນີນ​ເປັນ​ເວ­ລາ 1 ວັນ ໂດຍ​ບໍ່​ເສຍ​ຄ່າ​ບັດ​ຜ່ານ​ປະ­ຕູ.

ຂ່າວທີ່ກ່ຽວຂ້ອງ