ຂ່າວຫຼ້າສຸດ

ຫຼາຍແຫ່ງປ່ອຍສັດນ້ຳ-ສັດປ່າ ເພື່ອຄືນຄວາມສົມບູນສູ່ທຳມະຊາດ

220 16 ກ.ກ. 2018 ຂ່າວໜ້າ​ໜຶ່ງ
ຫຼາຍແຫ່ງປ່ອຍສັດນ້ຳ-ສັດປ່າ ເພື່ອຄືນຄວາມສົມບູນສູ່ທຳມະຊາດ

    ກະ­ຊວງ​ກະ­ສິ­ກຳ ແລະ ປ່າ­ໄມ້ ຮ່ວມ​ກັບ ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ແລະ ສູນ​ກາງ​ຊາວ​ໜຸ່ມ ປະ­ຊາ­ຊົນ ປະ­ຕິ­ວັດ​ລາວ ຈັດ​ພິ­ທີ​ປ່ອຍ​ສັດ​ນ້ຳ ແລະ ສັດ­ປ່າ ຂຶ້ນ​ໃນ​ວັນ​ທີ 13 ກໍ­ລະ­ກົດ 2018 ທີ່​ອ່າງ​ນ້ຳ​ຫຸມ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ເນື່ອງ​ໃນ​ວັນ​ອະ­ນຸ​ຮັກ​ສັດ​ນ້ຳ ແລະ ສັດ­ປ່າ ວັນ​ທີ 13 ກໍ­ລະ­ກົດ ທີ່​ໄດ້​ໝູ­ນວຽນ​ມາ​ບັນ­ຈົບ​ຄົບ­ຮອບ​ອີກ​ຄັ້ງ​ໜຶ່ງ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ຫ້ອງ­ການ ກົມ ບັນ­ດາ​ຜູ້­ຕາງ­ໜ້າ​ອົງ​ການ­ຈັດ­ຕັ້ງ​ສາ­ກົນ ແລະ ຜູ້­ຕາງ­ໜ້າ​ຈາກ​ພະ­ແນກ­ການ​ອ້ອມ​ຂ້າງ​ນະ­ຄອນ­ຫຼວງ ແລະ ເມືອງ ອົງ­ການ​ປົກ­ຄອງ​ບ້ານ ນ້ອງ​ນ້ອຍ​ເຍົາ­ວະ​ຊົນ ຕະ­ຫຼອດ​ຮອດ​ພໍ່​ແມ່​ປະ­ຊາ­ຊົນ.

    ສຳ­ລັບ​ປາ​ທີ່​ນຳ​ມາ​ປ່ອຍ​ໃນ​ຄັ້ງ​ນີ້ ລວມ​ມີ​ລູກ​ປາ​ຈຳ­ນວນ 150.000 ໂຕ ຄື: ປາ­ປາກ ປາ​ເກັດ​ແລບ ປາ​ມະ​ລີ​ການ ປາ​ນິນ ປາ­ໄນ ແລະ ປາ​ພໍ່​ແມ່​ພັນ​ພື້ນ­ເມືອງ ຈຳ­ນວນ 500 ໂຕ ປາ­ກົດ 200 ໂຕ ປາ­ສ້ອຍ 200 ໂຕ ປາ​ເຄິງ 50 ໂຕ ປາ​ເໝັ້ນ 50 ໂຕ ແລະ ນົກ​ຈຳ­ນວນ​ໜຶ່ງ ໃນ​ໂອ­ກາດ​ນີ້ ຄະ­ນະ​ກຳ­ມະ­ການ​ໄດ້​ຮ່ວມ​ເປີດ​ພິ­ທີ ແລະ ປ່ອຍ​ປາ ປ່ອຍ​ສັດ­ປ່າ ພ້ອມ​ທັງ​ຊົມ​ວາງ­ສະ­ແດງ​ຮູບ​ພາບ​ຕື່ມ​ອີກ​ດ້ວຍ.

    ພ້ອມ​ນີ້ ໃນ​ວັນ​ດຽວ​ກັນ ເມືອງ​ປາກ​ງື່ມ​ຈັດ​ພິ­ທີ​ປ່ອຍ​ປາ​ລົງ​ສູ່​ທຳ​ມະ​ຊາດ ຢູ່​ສະ­ຖານ­ທີ່​ໜອງ​ໝີ ບ້ານ​ເວີນ​ແຄນ ໂດຍ​ເປັນ​ກຽດ​ເຂົ້າ​ຮ່ວມ​ພິ­ທີ ທ່ານ ຂັນ​ທີ ສີ­ວິ­ໄລ ຮອງ​ເຈົ້າ­ເມືອງ​ປາກ​ງື່ມ ມີ​ບັນ­ດາ​ຫົວ­ໜ້າ​ຫ້ອງ­ການ  ພະ­ນັກ­ງານ​ຫຼັກ​ແຫຼ່ງ​ອ້ອມ​ຂ້າງ​ເມືອງ ອຳ­ນາດ​ການ​ປົກ­ຄອງ​ບ້ານ ແລະ ພໍ່​ແມ່​ປະ­ຊາ­ຊົນ​ພາຍ​ໃນ​ບ້ານ​ເຂົ້າ​ຮ່ວມ​ຢ່າງ​ຫຼວງ­ຫຼາຍ ສ່ວນ​ປາ​ທີ່​ນຳ​ມາ​ປ່ອຍ​ໃນ​ຄັ້ງ​ນີ້​ມີ​ທັງ​ໝົດ 33 ພັນ​ກວ່າ​ໂຕ ໃນ​ນີ້ ມີ​ປາ­ປາກ 15 ພັນ​ໂຕ ປາ​ນິນ 7.500 ໂຕ ປາ­ໄນ 7.500 ໂຕ.

    ຂ່າວ​ແຈ້ງ​ຕື່ມ​ອີ​ກວ່າ: ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ໄດ້​ຈັດ​ພິ­ທີ​ປ່ອຍ​ປາ​ຄືນ​ສູ່​ທຳ​ມະ​ຊາດ​ປະ­ຈຳ​ປີ 2018 ເນື່ອງ​ໃນ​ໂອ­ກາດ​ວັນ​ປ່ອຍ​ປາ​ແຫ່ງ​ຊາດ ແລະ ວັນ​ອະ­ນຸ​ຮັກ ສັດ​ນ້ຳ-ສັດ­ປ່າ ທີ 13 ກໍ­ລະ­ກົດ ຂອງ​ທຸກໆ​ປີ ຂຶ້ນຢູ່​ທີ່​ຟາມ​ພັນ​ເພັດ​ພັດ­ທະ­ນາ​ກະ­ສິ­ກຳ ມີ​ພະ​ເຖ­ລາ­ນຸ­ເຖລະ ທ່ານ ແກ່ນ ວໍ­ລະ​ສານ ເຈົ້າ­ເມືອງ​ຫາດ​ຊາຍ​ຟອງ ພ້ອມ​ດ້ວຍ​ຫ້ອງ­ການ​ຕ່າງໆ​ອ້ອມ​ຂ້າງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຫ້ອງ­ການ​ກະ­ສິ­ກຳ-ປ່າ­ໄມ້ ເມືອງ​ຫາດ​ຊາຍ​ຟອງ ສາ­ມາດ​ປ່ອຍ​ປາ​ຄືນ​ສູ່​ທຳ​ມະ​ຊາດ​ໄດ້​ຈຳ­ນວນ 1,6 ລ້ານ​ໂຕ ແລະ ແຜນ​ປ່ອຍ​ປາ​ແຫ່ງ​ຊາດ​ປະ­ຈຳ​ປີ 2018 ນີ້​ມີ​ຈຳ­ນວນ 1 ແສນ​ໂຕ ໃນ​ທົ່ວ​ເມືອງ​ມີ​ໜອງ​ປາ 325,33 ເຮັກ­ຕາ ໜອງ​ປາ​ລ້ຽງ 110,25 ເຮັກ­ຕາ ໜອງ​ປາ​ທຳ​ມະ​ຊາດ 213,92 ເຮັກ­ຕາ ສະ­ຖານ­ທີ່​ປ່ອຍ​ມີ​ສອງ​ຈຸດ ຄື: ຈຸດ​ຫ້ວຍ​ຄ້າ ບ້ານ​ນາ​ໄຮ່+ໜອງ​ແຫ້ວ ແລະ ບໍ­ລິ­ສັດ​ພັດ­ທະ­ນາ​ກະ­ສິ­ກຳ​ຈຳ­ກັດ ຊະ­ນິດ​ປາ​ທີ່​ນຳ​ມາ​ປ່ອຍ​ນີ້ ມີ ປາ­ປາກ 30 ພັນ​ໂຕ ປາ​ນິນ 20 ພັນ​ໂຕ ປາ­ໄນ 10 ພັນ​ໂຕ ປາ​ເກັດ​ແລບ 10 ພັນ​ໂຕ ປາ​ໂລ​ຮູ 10 ພັນ​ໂຕ ປາ​ມະ​ລີ​ການ 10 ພັນ​ໂຕ ປາ­ບຶກ ແລະ ປາ​ອື່ນໆ​ອີກ 10 ພັນ​ໂຕ ແລະ ກົບ ຈຳ­ນວນ​ໜຶ່ງ ພ້ອມ​ນີ້ ຍັງ​ໄດ້​ປຸກ­ລະ­ດົມ​ສົ່ງ­ເສີມ​ໃຫ້​ຮ່ວມ​ກັນ​ປົກ​ປັກ​ອະ­ນຸ​ຮັກ​ຮັກ­ສາ​ແນວ​ພັນ​ສັດ​ນ້ຳ​ໃຫ້​ມີ​ຄວາມ​ຍືນ​ຍົງ ແລະ ຫ້າມ​ບໍ່​ໃຫ້​ມີ​ການ​ຫາ​ປາ​ໃນ​ຍາມ​ທີ່​ປາ​ວາງ​ໄຂ່ ເພື່ອ​ໃຫ້​ມີ​ການ​ຂະ­ຫຍາຍ​ພັນ ແລະ ສ້າງ​ຄວາມ​ອຸ­ດົມ­ສົມ­ບູນ​ຂອງ​ລະ­ບົບ​ນິ­ເວດ​ວິ­ທະ­ຍາ ພ້ອມ​ນັ້ນ ພາຍ­ຫຼັງ​ສຳ­ເລັດ​ພິ­ທີ​ເປີດ​ຂະ​ບວນ​ການ​ແລ້ວ ເມືອງ​ຫາດ​ຊາຍ​ຟອງ ຍັງ​ຈະ​ສືບ­ຕໍ່​ປ່ອຍ​ປາ​ໄປ​ເລື້ອຍໆ​ໃຫ້​ສຳ­ເລັດ​ໃນ​ເດືອນ​ກໍ­ລະ­ກົດ​ນີ້.

ຂ່າວທີ່ກ່ຽວຂ້ອງ