ຂ່າວຫຼ້າສຸດ

6 ເດືອນຕົ້ນປີ ມີນັກທ່ອງທ່ຽວເຂົ້າມາທ່ຽວລາວເພີ່ມຂຶ້ນ 6%

217 16 ກ.ກ. 2018 ຂ່າວໜ້າ​ໜຶ່ງ
6 ເດືອນຕົ້ນປີ ມີນັກທ່ອງທ່ຽວເຂົ້າມາທ່ຽວລາວເພີ່ມຂຶ້ນ 6%

    ກອງ​ປະ­ຊຸມ​ປຶກ­ສາ​ຫາ­ລື​ທົບ​ທວນ­ຄືນ​ຜົນ​ການ­ຈັດ­ຕັ້ງ​ປະ­ຕິ­ບັດ​ປີ​ທ່ອງ​ທ່ຽວ​ລາວ 2018 ແລະ ວາງ​ທິດ​ທາງ​ໃນ­ຕໍ່­ໜ້າ ຈັດ​ຂຶ້ນ​ວັນ​ທີ 13 ກໍ­ລະ­ກົດ 2018 ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ຊີ້​ນຳ​ລະ­ດັບ​ຊາດ​ໃນ​ການ​ຈັດ​ປີ​ທ່ອງ​ທ່ຽວ​ລາວ 2018 ມີ​ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ບັນ­ດາ​ຮອງ​ລັດ­ຖະ­ມົນ­ຕີ ຫົວ­ໜ້າ​ກົມ​ກ່ຽວ­ຂ້ອງ ແລະ ຮອງ​ເຈົ້າ­ແຂວງ​ທົ່ວ​ປະ­ເທດ​ເຂົ້າ​ຮ່ວມ.

    ທ່ານ ອຸ່ນ​ທວງ ຂາວ​ພັນ ຮອງ​ລັດ­ຖະ­ມົນ­ຕີ​ກະ­ຊວງ ຖວ​ທ ໃຫ້​ຮູ້​ວ່າ:ໃນ 6 ເດືອນ​ຕົ້ນ​ປີ 2018 ມີ​ຈຳ­ນວນ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ຊົມ​ເຖິງ 2.126.730 ເທື່ອ​ຄົນ ຫຼື ເພີ່ມ​ຂຶ້ນ 6% ເມື່ອ​ທຽບ­ໃສ່​ໄລ­ຍະ​ດຽວ​ກັນ​ປີ 2017 ເຊິ່ງ​ມີ​ຫຼາຍ​ກຸ່ມ​ຕະ­ຫຼາດ​ການ­ທ່ອງ­ທ່ຽວ​ທີ່​ເພີ່ມ​ຂຶ້ນ​ໂດດ​ເດັ່ນ ເຊັ່ນ: ກຸ່ມ​ຕະ­ຫຼາດ​ອາ​ເມ​ຣິ​ກາ ເພີ່ມ​ຂຶ້ນ 16% ກຸ່ມ​ຕະ­ຫຼາດ​ອາ­ຊີ​ປາ​ຊີ​ຟິກ ເພີ່ມ​ຂຶ້ນ​ພຽງ 6% ກຸ່ມ​ຕະ­ຫຼາດ​ອາ​ຊຽນ​ມີ​ອັດ­ຕາ​ຫຼຸດ​ລົງ 3% ເຊິ່ງ​ກວມ​ຕະ­ຫຼາດ​ເຖິງ 66% ຂອງ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ຊົມ ສປປ ລາວ ໃນ​ກຸ່ມ​ນີ້ ຕະ­ຫຼາດ​ສຳ­ຄັນ​ແມ່ນ​ຕະ­ຫຼາດ​ໄທ​ກວມ​ເອົາ 44% ຫວຽດ­ນາມ​ກວມ​ເອົາ 19% ແລະ ຕະ­ຫຼາດ​ອື່ນໆ 37% ນອກ­ຈາກ​ນີ້​ແລ້ວ ກຸ່ມ​ຕະ­ຫຼາດ​ອື່ນໆ​ມີ​ອັດ­ຕາ​ເພີ່ມ​ຂຶ້ນ ເປັນ­ຕົ້ນ ຕະ­ຫຼາດ​ມາ​ເລ​ເຊຍ ເພີ່ມ​ຂຶ້ນ 90% ສິງ­ກະ­ໂປ 31% ແລະ ຟີ​ລິບ​ປິນ 5% ແລະ ກຸ່ມ​ຕະ­ຫຼາດ​ບໍ່​ແມ່ນ​ອາ​ຊຽນ​ເພີ່ມ​ຂຶ້ນ 40% ເປັນ​ກຸ່ມ​ຕະ­ຫຼາດ​ທີ່​ມີ​ຫຼາຍ​ຮູບ​ແບບ​ໃນ​ການ­ທ່ອງ­ທ່ຽວ.

    ສຳ­ລັບ​ແຜນ​ກິດ­ຈະ­ກຳ​ທ່ອງ​ທ່ຽວ​ໃນ​ປີ­ໜ້າ​ສືບ­ຕໍ່​ຊຸກ­ຍູ້​ບັນ­ດາ​ແຂວງ​ທີ່​ຍັງ​ບໍ່​ໄດ້​ຈັດ​ກິດ­ຈະ­ກຳ ຊຸກ­ຍູ້​ຂະ​ບວນ​ການ​ປີ​ທ່ອງ​ທ່ຽວ​ລາວ 2018 ທີ່​ໄດ້​ກຳ­ນົດ​ໄວ້​ໃນ​ແຜນ​ກິດ­ຈະ­ກຳ​ປີ​ທ່ອງ​ທ່ຽວ​ລາວ ເຊັ່ນ: ແຂວງ​ໄຊ​ສົມ­ບູນ ຜົ້ງ​ສາ­ລີ ສະ­ຫວັນ​ນະ​ເຂດ ແລະ ແຂວງ​ອັດ​ຕະ​ປື ຈັດ​ກິດ­ຈະ­ກຳ​ແຫຼ່ງ​ທ່ອງ​ທ່ຽວ​ພາກ​ກາງ ແລະ ໃຕ້ ສປປ ລາວ ສຳ­ລັບ​ບໍ­ລິ­ສັດ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ຈັດ​ງານ​ຄາ​ລະ​ວານ​ສົ່ງ­ເສີມ​ການ­ທ່ອງ­ທ່ຽວ​ສູ່​ບັນ­ດາ​ແຂວງ​ພາກ​ເໜືອ ບັນ­ດາ​ແຂວງ​ພາກ​ກາງ ແລະ ພາກ​ໃຕ້ ຈັດ​ງານ​ກິດ­ຈະ­ກຳ​ສະ­ເຫຼີມ­ສະ­ຫຼອງ​ສະ­ຫຼຸບ​ປີ​ທ່ອງ​ທ່ຽວ​ລາວ​ໃນ​ທ້າຍ​ປີ 2018.

ຂ່າວທີ່ກ່ຽວຂ້ອງ