ສາເຫດເຮັດໃຫ້ການຂົນສົ່ງຢູ່ລາວມີມູນຄ່າສູງ

317 16 ກ.ກ. 2018 ຂ່າວໜ້າ​ໜຶ່ງ

    ພາຍ­ຫຼັງ​ທີ່​ພາກ​ລັດ​ໄດ້​ຮັບ​ຟັງ​ການ​ຄົ້ນ­ຄວ້າ​ສະ­ເໜີ​ກ່ຽວ​ກັບ​ລາ­ຄາ​ການ​ຂົນ­ສົ່ງ​ສິນ­ຄ້າ​ພາຍ​ໃນ ແລະ ຕ່າງ­ປະ­ເທດ​ຂອງ​ລາວ​ທີ່​ມີ​ລາ­ຄາ​ແພງ ຈາກ​ຜູ້­ຕາງ­ໜ້າ​ສະ­ພາ​ການ​ຄ້າ​ຍີ່­ປຸ່ນ ປະ­ຈຳ​ລາວ ໃນ​ກອງ​ປະ­ຊຸມ​ທຸ­ລະ​ກິດ​ລາວ​ຄັ້ງ​ທີ 11 ຜ່ານ​ມາ ເພື່ອ​ເປັນ​ການ​ແກ້​ຂໍ້​ຂ້ອງ​ໃຈ ແລະ ສ້າງ​ຄວາມ​ເຂົ້າ­ໃຈ​ໃຫ້​ແກ່​ພາກ​ທຸ­ລະ​ກິດ​ກ່ຽວ​ກັບ​ບັນ­ຫາ​ດັ່ງ­ກ່າວ ລັດ­ຖະ­ບານ​ໂດຍ​ຕາງ­ໜ້າ​ຂອງ​ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ໄດ້​ມີ​ຄຳ​ເຫັນ​ເພີ່ມ​ຕື່ມ​ວ່າ: ການ​ຂົນ­ສົ່ງ​ສິນ­ຄ້າ​ຢູ່​ລາວ​ໄປ​ຕ່າງ­ປະ­ເທດ​ທີ່​ມີ​ລາ­ຄາ​ສູງ ແມ່ນ​ຍ້ອນ​ພື້ນ­ຖານ​ໂຄງ​ລ່າງ​ດ້ານ​ຖະ­ໜົນ​ຫົນ­ທາງ​ຢູ່ ສປປ ລາວ ໃນ​ການ​ຮັບ​ນ້ຳ­ໜັກ​ຂອງ​ລົດ​ບັນ­ທຸກ​ຂົນ­ສົ່ງ ການ​ຄິດ­ໄລ່​ມາດ­ຕະ­ຖານ ການ​ຮັບ​ນ້ຳ­ໜັກ​ຢູ່​ລາວ​ແມ່ນ​ຢູ່​ໃນ​ລະ­ດັບ​ຕ່ຳ ຖ້າ​ທຽບ­ໃສ່​ລະ­ດັບ​ປະ­ເທດ​ອ້ອມ​ຂ້າງ ຄື​ໄດ້​ໄລ່​ໃນ​ໄລ­ຍະ​ຜ່ານ​ມາ​ກ່ຽວ​ກັບ​ທາງ​ຫຼວງ​ແຫ່ງ​ຊາດ​ໄດ້​ໄລ່​ນ້ຳ­ໜັກ 9,1 ໂຕນ​ຕໍ່​ເພົາ ແລະ ທາງ​ຫຼວງ​ຢູ່​ເຂດ​ທ້ອງ­ຖິ່ນ​ແມ່ນ​ໄລ່ 2 ໂຕນ​ຕໍ່​ເພົາ ຖ້າ​ທຽບ­ໃສ່​ກັບ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ອາ​ຊຽນ ແລະ ປະ­ເທດ​ອ້ອມ​ຂ້າງ​ແມ່ນ 11 ໂຕນ​ຕໍ່​ເພົາ ອັນ​ນີ້​ເຫັນ​ວ່າ​ມີ​ຄວາມ​ຈຳ­ເປັນ​ຕ້ອງ​ໄດ້​ຈຳ­ກັດ​ນ້ຳ­ໜັກ​ການ​ຂົນ­ສົ່ງ ສະ­ເພາະ​ບັນ­ດາ​ໂຄງ­ການ​ຊ່ວຍ­ເຫຼືອ​ຕ່າງໆ​ຂອງ​ຕ່າງ­ປະ­ເທດ​ຈະ​ບໍ່​ກຳ­ນົດ​ເອົາ 11 ໂຕນ​ຕໍ່​ເພົາ ເນື່ອງ​ຈາ​ກວ່າ​ເສດ­ຖະ­ກິດ​ພວກ​ເຂົາ​ບໍ່​ທັນ​ຂະ­ຫຍາຍ­ຕົວ ສະ­ນັ້ນ ໄດ້​ກຳ­ນົດ​ໃຫ້​ສູງ​ສຸດ 9,1 ໂຕນ​ຕໍ່​ເພົາ  ໃນ​ປະ­ເທດ​ລາວ​ມີ 8 ເສັ້ນ­ທາງ​ໃນ​ການ​ຂົນ­ສົ່ງ ແຕ່​ເສັ້ນ­ທາງ​ທີ່​ຮັບ​ນ້ຳ­ໜັກ​ໄດ້ 11 ໂຕນ​ຕໍ່​ເພົາ​ມີ​ພຽງ​ແຕ່ 2 ເສັ້ນ ມາ​ຮອດ​ປັດ­ຈຸ­ບັນ ຄື:ເສັ້ນ­ທາງ R3 ແລະ ເສັ້ນ­ທາງ​ເລກ 9 ນອກ​ນັ້ນ ຍັງ​ໄດ້​ຍົກ​ລະ­ດັບ​ເສັ້ນ­ທາງ​ເລກ​ທີ 13 ທີ່​ໄດ້​ຮັບ​ເງິນ​ກູ້​ຢືມ​ຈາກ​ທະ­ນາ­ຄານ​ພັດ­ທະ­ນາ​ອາ­ຊີ ແລະ ທະ­ນາ­ຄານ​ໂລກ​ມີ​ພຽງ​ແຕ່ 8,2 ໂຕນ​ຕໍ່​ເພົາ ນອກ​ນີ້ ເສັ້ນ­ທາງ​ບໍ່​ສະ­ດວກ​ສະ­ບາຍ ແລະ ອື່ນໆ.

    ອີກ​ຈຸດ​ໜຶ່ງ​ປະ­ເທດ​ລາວ​ບໍ່​ມີ​ຊາຍ​ແດນ​ຕິດ​ຈອດ​ກັບ​ທະ­ເລ ເຮັດ​ໃຫ້­ການ​ຂົນ­ສົ່ງ​ອອກ​ສູ່​ປະ­ເທດ​ໃກ້​ຄຽງ​ທີ່​ມີ​ຊາຍ​ແດນ​ຕິດ​ກັບ​ທະ­ເລ ມີ​ຫຼາຍ​ຂອດ​ຫຼາຍ​ຂັ້ນ​ຕອນ​ແຕ່​ເໜືອ​ຮອດ​ໃຕ້ ເພື່ອ​ເຮັດ​ໃຫ້​ມູນ​ຄ່າ​ການ​ຂົນ­ສົ່ງ​ຫຼຸດ​ຕົ້ນ​ທຶນ​ລົງ ປັດ­ຈຸ­ບັນ​ໄດ້​ພະ­ຍາ­ຍາມ​ຈັດ​ຕັ້ງ​ປະ­ຕິ­ບັດ​ຫຼາຍ​ຂອດ ຫຼື ໂລ​ຈິ​ສ​ຕິກ​ພາ​ສ ຢູ່​ແຂວງ​ສະ­ຫວັນ​ນະ​ເຂດ ເຊິ່ງ​ໄດ້​ພົວ­ພັນ​ເຖິງ​ສົນ­ທິ­ສັນ­ຍາ​ສາ­ກົນ​ໃນ​ການ​ຄຸ້ມ​ຄອງ​ລາ­ຄາ​ຂົນ­ສົ່ງ ຜ່ານ​ມາ​ສະ­ຫຼຸບ​ຄ່າ​ຂົນ­ສົ່ງ​ເປັນ​ຕູ້​ຄອນ​ເທັນ​ເນີ້​ໄປ​ໄທ​ມີ​ລາ­ຄາ​ສູງ​ເຖິງ 4.320 ໂດ​ລາ​ສະ­ຫະ­ລັດ​ຕໍ່​ຕູ້​ຄອນ​ເທັນ​ເນີ້ ພາຍ­ຫຼັງ​ສ້າງ​ໂລ​ຈິ​ສ​ຕິກ​ພາ​ສ ເຮັດ​ໃຫ້​ມູນ​ຄ່າ​ການ​ຂົນ­ສົ່ງ​ຢູ່​ສະ­ຫວັນ​ນະ​ເຂດ​ຫຼຸດ​ລົງ​ເຖິງ 66%  ອັນ​ເປັນ​ຈຸດ​ທີ່​ລັດ­ຖະ­ບານ​ສຸມ​ໃສ່ ແລະ ຕ້ອງ​ໄດ້​ສ້າງ​ກ່ຽວ​ກັບ​ຫຼາຍ​ຂອດ​ໃນ 9 ຈຸດ ໂດຍ​ສະ­ເພາະ ຈຸດ​ນະ­ຄອນ­ຫຼວງ​ວຽງ​ຈັນ ແຂວງ​ຄຳ​ມ່ວນ ຫຼວງ​ນ້ຳ​ທາ ແລະ ແຂວງ​ຈຳ­ປາ​ສັກ ທີ່​ຈະ​ຕ້ອງ​ແກ້​ໄຂ​ໂດຍ​ໄວ.

ຂ່າວທີ່ກ່ຽວຂ້ອງ