ເຈົ້າໜ້າທີ່ກັກລົດກຸ່ມແກ້ງກວນເມືອງໄດ້ເກືອບ 400 ຄັນ

160 16 ກ.ກ. 2018 ຂ່າວໜ້າ​ໜຶ່ງ

   ທ່ານ ພັນ​ໂທ ອິນ​ກອງ ລິ​ດາ​ພອນ ຮອງ​ຫົວ­ໜ້າ​ກອງ­ພັນ​ປ້ອງ​ກັນ​ເຄື່ອນ​ທີ່ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ຮູ້​ວ່າ: ໄລ­ຍະ 6 ເດືອນ​ຕົ້ນ​ປີ 2018 ເຈົ້າ​ໜ້າ­ທີ່​ກອງ­ພັນ​ປ້ອງ​ກັນ​ເຄື່ອນ​ທີ່ ນວ ໄດ້​ປະ­ຕິ­ບັດ​ຕາມ​ການ​ຊີ້​ນຳ​ຂອງ​ຄະ­ນະ​ພັກ ຄະ­ນະ​ບັນ­ຊາ ກອງ​ບັນ­ຊາ​ການ ປກສ ນວ ໃນ​ການ​ແກ້​ໄຂ​ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ​ໃນ​ສັງ­ຄົມ ກອງ­ພັນ​ປ້ອງ​ກັນ​ເຄື່ອນ​ທີ່ ໄດ້​ວາງ​ແຜນ­ການ­ເຄື່ອນ­ໄຫວ​ແກ້​ໄຂ​ບັນ­ດາ​ກຸ່ມ​ແກ້ງ​ຂີ່​ລົດ​ກວນ​ເມືອງ ແຂ່ງ​ລົດ ຂີ່​ລົດ​ດັດ­ແປງ​ສະ­ພາບ​ເຕັກ­ນິກ ໃຊ້​ສຽງ​ດັງ ຂີ່​ລົດ​ໄວ​ເກີນ​ຂອບ​ເຂດ ຢູ່​ຕາມ​ເສັ້ນ­ທາງ​ເລກ​ທີ 11 ແຕ່ 3 ແຍກ​ສີ​ໄຄ ຫາ ບ້ານ​ສຳ­ພັນ​ນາ ເມືອງ​ສັງ​ທອງ ເສັ້ນ­ທາງ​ເຈົ້າ­ຟ້າ​ງຸ່ມ ຫາ ເສັ້ນ­ທາງ​ລ້ານ​ຊ້າງ ໂດຍ​ສະ­ເພາະ ແມ່ນ​ຢູ່​ບໍ­ລິ­ເວນ​ເສັ້ນ­ທາງ​ແຄມ​ຂອງ ແຕ່ 3 ແຍກ​ປາກ​ປ່າ​ສັກ​ໄປ​ຫາ​ຫໍ­ຄຳ ແລ້ວ​ລັດ​ຂຶ້ນ​ໄປ​ຫາ​ບໍ­ລິ­ເວນ​ຕະ­ຫຼາດ​ເຊົ້າ ແລະ ປະ­ຕູ​ໄຊ ເຊິ່ງ​ກຸ່ມ​ຄົນ​ເຫຼົ່າ­ນັ້ນ​ຈະ​ໃຊ້​ເວ­ລາ 1:00-4:00 ໂມງ​ເຊົ້າ ເພື່ອ​ເຄື່ອນ​ໄຫວ​ສ້າງ​ຄວາມ​ບໍ່​ສະ­ຫງົບ​ຕາມ​ເສັ້ນ­ທາງ​ດັ່ງ­ກ່າວ.

   ຜ່ານ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ​ຂອງ​ເຈົ້າ​ໜ້າ­ທີ່​ຕະ­ຫຼອດ​ໄລ­ຍະ 6 ເດືອນ​ຕົ້ນ​ປີ 2018 ສາ­ມາດ​ກັກ​ລົດ​ໄດ້​ທັງ​ໝົດ 369 ຄັນ ໃນ​ນີ້ ແກ້​ໄຂ​ແລ້ວ 275 ຄັນ ເປັນ​ລົດ​ຢູ່​ໃນ​ກຸ່ມ​ແກ້ງ​ກວນ​ເມືອງ 114 ຄັນ ບໍ່​ຖື​ເອ­ກະ­ສານ 31 ຄັນ ຍັງ​ບໍ່​ທັນ​ແກ້​ໄຂ 69 ຄັນ ສະ­ເພາະ​ລົດ​ທີ່​ຍັງ​ບໍ່​ທັນ​ແກ້​ໄຂ​ແມ່ນ​ລົດ​ທີ່​ບໍ່​ມີ​ເຈົ້າ​ຂອງ​ມາ​ພົວ­ພັນ​ເອົາ ມີ​ລົດ​ຄວາມ​ແຮງ​ເກີນ 250 ຊີ​ຊີ ແລະ ລົດ​ບໍ່​ມີ​ເອ­ກະ­ສານ ນອກ​ນີ້ ເຈົ້າ​ໜ້າ­ທີ່​ໄດ້​ສຶກ​ສາ​ອົບ­ຮົມ​ຜູ້​ລະ­ເມີດ​ທັງ​ໝົດ 321 ຄົນ ຍິງ 51 ຄົນ ໂດຍ​ເຊີນ​ເອົາ​ຜູ້​ປົກ­ຄອງ​ເຂົ້າ​ຮ່ວມ​ນຳ ຈາກ​ການ­ເຄື່ອນ­ໄຫວ​ແກ້​ໄຂ​ບັນ­ຫາ​ກຸ່ມ​ແກ້ງ​ກວນ​ເມືອງ ຍັງ​ສາ­ມາດ​ກັກ​ຕົວ​ຜູ້​ຄ້າ­ຂາຍ​ຢາ​ເສບ​ຕິດ ແລະ ຂີ້­ລັກ​ງັດ​ແງະ​ໄດ້​ທັງ​ໝົດ 23 ຄົນ ຢຶດ​ຂອງ​ກາງ​ຢາ​ບ້າ​ໄດ້ 1.699 ເມັດ ຢາ​ໄອ​ສ 4 ຖົງ​ນ້ອຍ ປືນ 1 ກະ­ບອກ ກະ­ແຈ​ໂຕ​ເຕ 3 ຊຸດ ໂທລະ­ສັບ​ມື​ຖື 6 ໜ່ວຍ ແລະ ລົດ­ຈັກ 25 ຄັນ.

ຂ່າວທີ່ກ່ຽວຂ້ອງ