ມອບເຮລີຄອບເຕີ 4 ລຳ ພາຍຫຼັງສຳເລັດການສ້ອມແປງໃຫຍ່

304 13 ກ.ກ. 2018 ຂ່າວໜ້າ​ໜຶ່ງ
ມອບເຮລີຄອບເຕີ 4 ລຳ ພາຍຫຼັງສຳເລັດການສ້ອມແປງໃຫຍ່

    ບໍ­ລິ­ສັດ ເຮລີ​ຄອບ​ເຕີ​ຣັດ​ເຊຍ ມອບ​ເຮລີ​ຄອບ​ເຕີ Mi-17 V1 ຈຳ­ນວນ 4 ລຳ ໃຫ້​ກັບ​ກອງ­ທັບ​ປະ­ຊາ­ຊົນ​ລາວ ພາຍ­ຫຼັງ​ທີ່​ສຳ­ເລັດ​ການ​ສ້ອມ­ແປງ​ໃຫຍ່ ເຊິ່ງ​ເຮືອ­ບິນ​ຈຳ­ນວນ​ດັ່ງ­ກ່າວ ສາ­ມາດ​ຕໍ່​ອາ­ຍຸ​ຊົ່ວ­ໂມງ​ບິນ​ອີກ 2.000 ຊົ່ວ­ໂມງ ພ້ອມ​ທັງ​ຮັບ­ປະ­ກັນ ແລະ ຈະ​ສາ­ມາດ​ນຳ​ໃຊ້​ໄດ້​ຕື່ມ​ອີກ 8 ປີ ຈຶ່ງ​ຈະ​ມີ​ການ​ສ້ອມ­ແປງ​ໃນ​ຄັ້ງ​ຕໍ່​ໄປ.

   ທ່ານ ພົ​ຈວ ສິງ​ສະ​ຫວັດ ພົມ​ມະ​ຈັກ ຮອງ​ຫົວ­ໜ້າ​ກົມ​ໃຫຍ່​ເສ­ນາ​ທິ​ການ​ກອງ­ທັບ ກ່າວ​ວ່າ: ການ​ມອບ​ເຮືອ­ບິນ​ໃນ​ຄັ້ງ​ນີ້ ແມ່ນ​ມີ​ຄວາມ​ໝາຍ​ສຳ­ຄັນ​ທີ່​ສະ­ແດງ​ໃຫ້​ເຫັນ​ເຖິງ​ຄວາມ​ເຕີບ​ໃຫຍ່​ຂະ­ຫຍາຍ­ຕົວ​ໃນ​ການ​ພົວ­ພັນ​ຮ່ວມ​ມື​ສະ­ໜິດ​ແໜ້ນ​ດ້ານ​ວຽກ​ງານ​ປ້ອງ​ກັນ​ຊາດ​ທັງ​ສອງ​ຝ່າຍ ແລະ ສະ­ແດງ​ເຖິງ​ຄວາມ​ໄວ້​ເນື້ອ​ເຊື່ອ​ໃຈ​ຂອງ​ກອງ­ທັບ​ປະ­ຊາ­ຊົນ​ລາວ ຕໍ່​ການ​ນຳ​ໃຊ້​ຜະ ລິດ​ຕະ​ພັນ​ຂອງ​ສະ­ຫະ­ພັນ​ຣັດ​ເຊຍ.

    ທ່ານ ເຊີ​ເກ ວາ​ຊີ​ລິ​ເຢວິດ ກູ​ເຊັບ ອຳ­ນວຍ​ການ​ຝ່າຍ​ບໍ­ລິ­ການ​ຫຼັງ​ການ​ຂາຍ ກຸ່ມ​ບໍ­ລິ­ສັດ ເຮລີ​ຄອບ​ເຕີ ຣັດ​ເຊຍ ກ່າວ​ວ່າ: ການ​ສ້ອມ­ແປງ​ເຮືອ­ບິນ​ຈຳ­ນວນ​ດັ່ງ­ກ່າວ​ແມ່ນ​ຢູ່​ກອງ­ພັນ​ໃຫຍ່​ທະ­ຫານ​ອາ­ກາດ 307 ໂດຍ​ກຸ່ມ​ວິ­ຊາ​ການ​ທີ່​ມີ​ຄວາມ​ສາ­ມາດ​ສູງ​ຈາກ​ໂຮງ­ງານ​ສ້ອມ­ແປງ 356 ເຊິ່ງ​ເປັນ​ໜຶ່ງ​ໃນ​ສະ­ມາ­ຊິກ​ຂອງ​ກຸ່ມ​ບໍ­ລິ­ສັດ​ພວກ​ເຮົາ ເຮັດ​ໃຫ້ Mi-17 V1 ສາ­ມາດ​ຕໍ່​ຊົ່ວ­ໂມງ​ການ­ບິນ ຜົນ­ສຳ­ເລັດ​ໃນ​ການ­ຈັດ­ຕັ້ງ​ປະ­ຕິ­ບັດ​ສັນ­ຍາ​ໃນ​ຄັ້ງ​ນີ້ ຊ່ວຍ​ໃຫ້​ເຫັນ​ເຖິງ​ທິດ​ທາງ​ຕໍ່­ໜ້າ​ໃນ​ການ​ພັດ ທະ​ນາ​ເສີມ​ຂະ­ຫຍາຍ​ການ​ຮ່ວມ​ມື​ຂອງ​ກຸ່ມ​ບໍ­ລິ­ສັດ ກຽມ­ພ້ອມ​ທີ່​ຈະ​ເຮັດ​ວຽກ​ໃນ​ການ​ສ້ອມ­ແປງ​ເຮືອ­ບິນ​ທີ່​ໝົດ​ຊົ່ວ­ໂມງ​ບິນ.

    ພິ­ທີ​ມອບ-ຮັບ ເຮືອ­ບິນ​ຄັ້ງ​ນີ້ ຈັດ​ຂຶ້ນ​ຢູ່​ທີ່​ກອງ­ພັນ​ໃຫຍ່​ທະ­ຫານ​ອາ­ກາດ 703 ກ່າວ​ມອບ​ໂດຍ​ທ່ານ ເຊີ​ເກ ວາ​ຊີ​ລິ​ເຢວິດ ກູ​ເຊັບ ແລະ ກ່າວ​ຮັບ​ແມ່ນ​ທ່ານ ພົ​ຈວ ສິງ​ສະ​ຫວັດ ພົມ​ມະ​ຈັກ ເຊິ່ງ​ມີ​ທ່ານ ພົຕ ພູ​ວົງ ວົງ​ພົມ ຮອງ​ລັດ­ຖະ­ມົນ­ຕີ ກະ­ຊວງ​ປ້ອງ​ກັນ​ປະ­ເທດ ມີ​ອຸ­ປະ​ທູດ​ຈາກ​ສະ­ຖານ­ທູດ​ຣັດ​ເຊຍ ປະ­ຈຳ ສປປ ລາວ ຕາງ­ໜ້າ​ບັນ­ດາ​ກະ­ຊວງ ກົມ​ກອງ ພ້ອມ​ພາກ­ສ່ວນ​ກ່ຽວ­ຂ້ອງ.

ຂ່າວທີ່ກ່ຽວຂ້ອງ