ຂ່າວຫຼ້າສຸດ

ກອງປະຊຸມສະພານະຄອນຫຼວງ ຈະຈັດຂຶ້ນກາງເດືອນກໍລະກົດນີ້

234 13 ກ.ກ. 2018 ຂ່າວໜ້າ​ໜຶ່ງ

    ພິ­ທີ​ຖະ­ແຫຼງ​ຂ່າວ​ການ​ກະ­ກຽມ ແລະ ດຳ­ເນີນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 5 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສສ ນວ) ຊຸດ​ທີ I ຈັດ​ຂຶ້ນ​ວັນ​ທີ 12 ກໍ­ລະ­ກົດ 2018 ທີ່​ຫ້ອງ​ວ່າ­ການ​ປົກ­ຄອງ ນວ ຖະ­ແຫຼງ​ຂ່າວ​ໂດຍ​ທ່ານ ນະ​ຄະ​ເສນ ສີ​ຫາ​ລາດ ຮັກ­ສາ​ການ​ເລ­ຂາ­ທິ­ການ​ສະ­ພາ​ປະ­ຊາ­ຊົນ ນວ.

    ກອງ​ປະ­ຊຸມ​ຄັ້ງ​ນີ້​ຈະ​ຈັດ​ຂຶ້ນ​ໃນ​ວັນ​ທີ 16-18 ກໍ­ລະ­ກົດ 2018 ທີ່​ຫ້ອງ​ປະ­ຊຸມ​ສຳ­ນັກ­ງານ​ອົງ­ການ​ປົກ­ຄອງ ນວ ເພື່ອ​ພິ­ຈາ­ລະ­ນາ ແລະ ຮັບ­ຮອງ​ເອົາ​ບັນ­ຫາ​ສຳ­ຄັນ​ຕ່າງໆ​ຂອງ ນວ ໃນ 6 ເດືອນ​ຕົ້ນ​ປີ ແລະ ທິດ​ທາງ 6 ເດືອນ​ທ້າຍ​ປີ 2018 ຄື: ຮັບ​ຟັງ​ບົດ​ລາຍ​ງານ​ຂອງ​ທ່ານ​ເຈົ້າ​ຄອງ ນວ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ຂອງ​ອົງ­ການ​ປົກ­ຄອງ ນວ ພິ­ຈາ­ລະ­ນາ​ໂຄງ­ການ​ຮຽກ​ການ​ລົງ­ທຶນ ການ​ຂໍ​ສຳ​ປະ­ທານ​ທີ່​ດິນ 100 ເຮັກ­ຕາ ຢູ່​ເຂດ​ນິ­ຄົມ​ອຸດ­ສາ­ຫະ­ກຳ ນວ ເພື່ອ​ພັດ­ທະ­ນາ​ເປັນ​ເມືອງ​ອັດ​ສະ​ຣິ​ຍະ ສູນ​ການ​ຄ້າ ແລະ ເຂດ​ອຸດ­ສາ­ຫະ­ກຳ​ສະ­ອາດ​ຂອງ​ກຸ່ມ​ບໍ­ລິ­ສັດ ພົງ​ສະ­ຫວັນ​ກຣຸບ ພິ­ຈາ­ລະ­ນາ ແລະ ຮັບ­ຮອງ​ເອົາ​ນິ­ຕິ​ກຳ 2 ສະ­ບັບ ຄື: ຮ່າງ​ຂໍ້​ຕົກ­ລົງ​ຂອງ​ເຈົ້າ​ຄອງ ວ່າ​ດ້ວຍ​ການ​ກຳ­ນົດ​ຫົວ­ໜ່ວຍ​ລາ­ຄາ​ທົດ​ແທນ​ຄ່າ​ເສຍ​ຫາຍ​ໃຫ້​ຜູ້​ຖືກ​ຜົນ​ກະ­ທົບ​ຈາກ​ໂຄງ­ການ​ກໍ່­ສ້າງ​ທາງ​ດ່ວນ​ວຽງ​ຈັນ ຮ່າງ​ຂໍ້​ຕົກ­ລົງ​ຂອງ​ເຈົ້າ​ຄອງ ວ່າ​ດ້ວຍ​ການ​ຫຼຸດ­ຜ່ອນ​ອຸ­ບັດ​ຕິ​ເຫດ ແລະ ຮັກ­ສາ​ຄວາມ​ປອດ​ໄພ​ຕາມ​ຖະ­ໜົນ ຮັບ​ຟັງ​ລາຍ​ງານ​ການ​ຊີ້​ແຈງ​ບາງ​ບັນ­ຫາ​ພົ້ນ​ເດັ່ນ​ຂອງ ນວ ຈຳນວນໜຶ່ງ.

    ດັ່ງ­ນັ້ນ ຂໍ​ເຊີນ­ຊວນ​ບັນ­ດາ​ອົງ​ການ­ຈັດ­ຕັ້ງ​ພັກ-ລັດ ອົງ​ການ­ຈັດ­ຕັ້ງ​ສັງ­ຄົມ​ທຸກ​ພາກ­ສ່ວນ ພະ­ນັກ­ງານ ທະ­ຫານ ຕຳ­ຫຼວດ ຕະ­ຫຼອດ​ຮອດ​ປະ­ຊາ­ຊົນ​ບັນ­ດາ­ເຜົ່າ​ໃນ​ທົ່ວ​ປະ­ເທດ ໂດຍ​ສະ­ເພາະ ຊາວ ນວ ຈົ່ງ​ໃຫ້­ການ​ຕິດ­ຕາມ​ຂ່າວ­ສານ​ທາງ​ໂທລະ­ພາບ ວິ­ທະ­ຍຸ ສື່​ສິ່ງ​ພິມ​ຕ່າງໆ ແລະ ສາ­ມາດ​ມີ​ຄຳ​ເຫັນ​ຄຳ​ສະ­ເໜີ​ຜ່ານ​ທາງ​ໂທລະ­ສັບ​ສາຍ​ດ່ວນ​ໝາຍ​ເລກ 1156 ຫຼື ໝາຍ​ເລກ­ໂທລະ­ສັບ 021 260242.

ຂ່າວທີ່ກ່ຽວຂ້ອງ