ຂ່າວຫຼ້າສຸດ

ສຸມໃສ່ແກ້ໄຂປາກົດການຫຍໍ້ທໍ້ໃນຂົງເຂດ ຖວທ

190 13 ກ.ກ. 2018 ຂ່າວໜ້າ​ໜຶ່ງ
ສຸມໃສ່ແກ້ໄຂປາກົດການຫຍໍ້ທໍ້ໃນຂົງເຂດ ຖວທ

    ເພື່ອ​ເປັນ​ການ​ປັບ­ປຸງ​ແກ້​ໄຂ​ປາ­ກົດ­ການ​ຫຍໍ້­ທໍ້ ແລະ ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ທີ່​ເກີດ​ຂຶ້ນ​ໃນ​ວຽກ​ງານ​ຖະ​ແຫຼ່ງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ  (ຖວ​ທ) ວັນ​ທີ 12 ກໍ­ລະ­ກົດ 2018 ພະ​ແນກ ຖວ​ທ ນະ­ຄອນ­ຫຼວງ​ວຽງ​ຈັນ ຈັດ​ກອງ​ປະ­ຊຸມ​ສະ­ຫຼຸບ​ການ­ເຄື່ອນ­ໄຫວ​ຂອງ​ອະ­ນຸ​ກຳ­ມະ­ການ​ຂະ​ບວນ​ການ​ແກ້​ໄຂ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ດ້ານ​ວັດ­ທະ­ນະ­ທຳ ແລະ ທ່ອງ​ທ່ຽວ 6 ເດືອນ​ຕົ້ນ​ປີ ແລະ ທິດ​ທາງ​ແຜນ­ການ 6 ເດືອນ​ທ້າຍ​ປີ 2018 ຂຶ້ນ​ທີ່​ພະ​ແນກ ຖວ​ທ ນວ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະ­ຄອນ­ຫຼວງ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ ຄຳ​ປະ­ດິດ ເຂັມ​ມາ­ນິດ ຫົວໜ້າພະແນກ ຖວທ ນວ ໄດ້​ຂຶ້ນ​ຜ່ານ​ບົດ​ສະ­ຫຼຸບ​ເຫັນ​ວ່າ ຕະ­ຫຼອດ​ໄລ­ຍະ​ຜ່ານ​ມາ​ໄດ້​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ວຽກ​ງານ​ທີ່​ຕິດ​ພັນ​ກັບ​ວຽກ​ງານ ຖວ​ທ ເປັນ­ຕົ້ນ ການ​ເປັນ​ເຈົ້າ­ພາບ​ທີ່​ດີ​ປີ​ທ່ອງ​ທ່ຽວ​ລາວ 2018 ການ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ດ້ານ ຖວ​ທ ເຊັ່ນ: ແກ້​ໄຂ​ທຸກ​ຫົວ­ໜ່ວຍ​ທຸ­ລະ​ກິດ ນັບ​ທັງ​ມີ​ໃບ​ອະ­ນຸ­ຍາດ ແລະ ບໍ່​ມີ​ໃບ​ອະ­ນຸ­ຍາດ​ທີ່​ມີ​ຫາງ​ສຽງ​ຈາກ​ສັງ­ຄົມ ແກ້​ໄຂ​ບັນ­ດາ​ຫົວ­ໜ່ວຍ​ທຸ­ລະ​ກິດ​ທີ່​ຕັ້ງ​ຢູ່​ໃກ້​ກັບ​ສະ​ຖາ​ບັນ​ການ​ສຶກ​ສາ ວັດ​ວາ​ອາ​ຮາມ ສະ­ຖານ­ທີ່​ສຳ­ຄັນ​ຕ່າງໆ ດ້ວຍ​ການ​ຫັນ­ປ່ຽນ​ການ​ບໍ­ລິ­ການ​ທີ່​ບໍ່​ມີ​ສິ່ງ​ມຶນ­ເມົາ ແກ້​ໄຂ​ບັນ­ດາ​ຮ້ານ​ກິນ​ດື່ມ ຮ້ານ​ບັນ­ເທີງ​ທີ່​ເສບ​ດົນ­ຕີ​ກາງ­ແຈ້ງ​ສົ່ງ​ສຽງ​ກະ­ທົບ​ຕໍ່​ຜູ້​ຢູ່​ໃກ້​ຄຽງ ແກ້​ໄຂ​ຮ້ານ​ບັນ­ເທີງ ຄາ​ລາ​ໂອ​ເກະ ຮ້ານ​ກາ­ເຟ​ຢອດ​ທີ່​ເປັນ​ບ່ອນ​ເຄື່ອນ​ໄຫວ​ຂອງ​ສາວ​ບໍ­ລິ­ການ ສັງ​ລວມ​ສະ­ຖິ­ຕິ​ບັນ­ດາ​ຫົວ­ໜ່ວຍ​ທຸ­ລະ​ກິດ ການ​ບໍ­ລິ­ການ​ດ້ານ ຖວ​ທ ທີ່​ຕິດ​ພັນ​ກັບ​ວຽກ​ງານ​ສາມ​ສ້າງ ໂດຍ​ມີ​ການ​ແບ່ງ​ຂັ້ນ​ຄຸ້ມ​ຄອງ​ບັນ­ດາ​ຫົວ­ໜ່ວຍ​ທຸ­ລະ​ກິດ​ຕ່າງໆ ລະ­ຫວ່າງ ຂັ້ນ ນວ ແລະ ເມືອງ ໃນ​ນີ້ ຂັ້ນ ນວ ໄດ້​ອອກ​ອະ­ນຸ­ຍາດ​ບໍ­ລິ­ສັດ​ທ່ອງ​ທ່ຽວ 239 ແຫ່ງ ໃນ​ນັ້ນ ໂຮງ­ແຮມ 130 ແຫ່ງ ເຮືອນ​ພັກ 192 ແຫ່ງ ຣີ​ສອດ 22 ແຫ່ງ  ຮ້ານ​ອາ­ຫານ 106 ແຫ່ງ ຮ້ານ​ບັນ­ເທີງ 18 ແຫ່ງ ແລະ ອື່ນໆ.

    ສຳ­ລັບ​ທິດ​ທາງ​ແຜນ­ການ 6 ເດືອນ​ທ້າຍ​ປີ 2018 ສືບ­ຕໍ່​ແກ້​ໄຂ​ບັນ­ດາ​ຫົວ­ໜ່ວຍ​ທຸ­ລະ​ກິດ​ທີ່​ດຳ­ເນີນ​ທຸ­ລະ​ກິດ​ບໍ່​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ ສຸມ​ໃສ່​ຊຸກ­ຍູ້ ແນະ­ນຳ​ບັນ­ດາ​ຜູ້​ປະ­ກອບ​ການ​ທຸ­ລະ​ກິດ​ດ້ານ ຖວ​ທ ໃຫ້​ຈັດ​ຕັ້ງ​ປະ­ຕິ­ບັດ​ກົດ­ໝາຍ​ທີ່​ກຳ­ນົດ​ໄວ້  ເຕົ້າ­ໂຮມ​ບັນ­ດາ​ທຸ­ລະ​ກິດ​ທີ່​ເປັນ​ເປົ້າ​ໝາຍ​ທີ່​ຍັງ​ຝ່າ­ຝືນ​ລະ­ບຽບ​ມາ​ສຶກ​ສາ​ອົບ­ຮົມ ແລະ ອື່ນໆ ພ້ອມ​ນີ້​ຜູ້​ເຂົ້າ​ຮ່ວມ​ຍັງ​ໄດ້​ປະ­ກອບ​ຄຳ​ຄິດ​ເຫັນ​ໃສ່​ບົດ​ສະ­ຫຼຸບ​ເພື່ອ​ຊອກ​ຫາ​ວິ­ທີ​ແກ້​ໄຂ​ບັນ­ຫາ​ທີ່​ຍັງ​ຄົງ​ຄ້າງ ເປັນ­ຕົ້ນ ການ​ຄວບ​ຄຸມ​ຮ້ານ​ບັນ­ເທີງ ຮ້ານ​ນວດ ຄວາມ​ເປັນ​ລະ­ບຽບ​ຮຽບ​ຮ້ອຍ​ຂອງ​ບັນ­ດາ​ຮ້ານ​ຂາຍ­ເຄື່ອງ​ຕາມ​ເສັ້ນ­ທາງ​ຕ່າງໆ

    ຕອນ​ທ້າຍ ຍັງ​ຮັບ​ຟັງ​ການ​ຊີ້​ນຳ​ຈາກ​ທ່ານ​ຮອງ​ເຈົ້າ​ຄອງ​ນະ­ຄອນ­ຫຼວງ ເພື່ອ​ເປັນ​ທິດ​ເຍືອງ​ທາງ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ ຖວ​ທ ໃນ­ຕໍ່­ໜ້າ​ໃຫ້​ມີ​ຜົນ­ສຳ­ເລັດ​ເປັນ​ກ້າວໆ ເປັນ­ຕົ້ນ ໃຫ້​ສືບ­ຕໍ່​ເຮັດ​ໜ້າ­ທີ່​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ທັງ​ພາກ​ລັດ ແລະ ເອ­ກະ​ຊົນ ໂຄ­ສະ­ນາ​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ຊົມ​ນະ­ຄອນ­ຫຼວງ​ວຽງ​ຈັນ​ນັບ​ມື້​ຫຼາຍ​ຂຶ້ນ ພ້ອມ​ກັນ​ແກ້​ໄຂ​ບັນ​ຫຍໍ້­ທໍ້​ທີ່​ເກີດ​ຂຶ້ນ​ຢູ່​ໃນ​ຂົງ­ເຂດ​ວັດ­ທະ­ນະ­ທຳ ແລະ ທ່ອງ​ທ່ຽວ​ໃຫ້​ຫຼຸດ​ໜ້ອຍ​ຖອຍ​ລົງ​ເທື່ອ​ລະ​ກ້າວ ແລະ ບັນ­ຫາ​ອື່ນໆ.

ຂ່າວທີ່ກ່ຽວຂ້ອງ