ຂ່າວຫຼ້າສຸດ

ຫຼາຍບັນຫາທ້າທາຍ ທີ່ຈະຕ້ອງສູ້ຊົນໃນຂະແໜງການສຶກສາ

193 13 ກ.ກ. 2018 ຂ່າວໜ້າ​ໜຶ່ງ
ຫຼາຍບັນຫາທ້າທາຍ ທີ່ຈະຕ້ອງສູ້ຊົນໃນຂະແໜງການສຶກສາ

    ກອງ​ປະ­ຊຸມ​ຜູ້​ບໍ­ລິ­ຫານ​ການ​ສຶກ​ສາ ແລະ ກີ­ລາ ຂັ້ນ​ນະ­ຄອນ­ຫຼວງ​ວຽງ​ຈັນ (ນວ) ປະ­ຈຳ​ສົກ­ຮຽນ 2017-2018 ດຳ­ເນີນ 2 ວັນ​ໄດ້​ສຳ­ເລັດ​ວັນ​ທີ 11 ກໍ­ລະ­ກົດ 2018 ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ເປັນ​ປະ­ທານ​ຂອງ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ບັນ­ດາ​ຮອງ​ຫົວ­ໜ້າ​ພະ​ແນກ ຫົວ­ໜ້າ​ຫ້ອງ­ການ​ສຶກ​ສາ​ເມືອງ ຜູ້­ອຳ­ນວຍ­ການ​ໂຮງ­ຮຽນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ພ້ອມ​ກັນ​ຕີ​ລາ­ຄາ​ຄືນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂະ­ແໜງ­ການ​ສຶກ​ສາ​ໃນ​ສົກ­ຮຽນ 2017-2018 ແລະ ວາງ​ທິດ​ທາງ​ແຜນ­ການ​ສົກ­ຮຽນ 2018-2019 ຍົກ​ໃຫ້​ເຫັນ​ຜົນ­ສຳ­ເລັດ​ດ້ານ​ດີ ດ້ານ​ອ່ອນ ແລະ ຂໍ້­ຄົງ­ຄ້າງ​ທີ່​ຈະ​ຕ້ອງ​ພ້ອມ​ກັນ​ແກ້​ໄຂ ເຊິ່ງ​ໃນ​ສົກ­ຮຽນ​ຜ່ານ​ມາ ຂະ­ແໜງ­ການ​ສຶກ​ສາ​ສາ­ມາດ​ຍາດ​ຜົນ­ງານ​ມາ​ໄດ້​ຫຼາຍ​ດ້ານ ໂດຍ​ສະ­ເພາະ ໂຕ​ຊີ້​ວັດ​ການ​ຂະ­ຫຍາຍ​ໂອ­ກາດ​ເຂົ້າ​ຮຽນ​ຂອງ​ຊັ້ນ​ປະ­ຖົມ​ສຶກ​ສາ ທົ່ວ ນວ ມີ​ໂຮງ­ຮຽນ​ທັງ​ພາກ​ລັດ ແລະ ເອ­ກະ​ຊົນ 525 ແຫ່ງ ເພີ່ມ​ຂຶ້ນ 2 ແຫ່ງ ອັດ­ຕາ​ການ​ປະ­ລະ​ການ​ຮຽນ 8,75% ໂຄງ­ການ​ສ້າງ​ໂຮງ­ຮຽນ​ຂຽວ​ຄຸ­ນະ­ພາບ​ດີ ໄດ້​ສຳ­ເລັດ​ການ​ປະ​ເມີນ 103 ແຫ່ງ ໄດ້​ຮັບ​ການ​ຍ້ອງ­ຍໍ​ຂັ້ນ​ເຈົ້າ​ຄອງ ນວ 34 ແຫ່ງ ໄດ້​ຮັບ​ລາ­ງວັນ​ນິ­ເວດ​ອາ​ຊຽນ 4 ແຫ່ງ ໄດ້​ປະ­ກາດ​ໂຮງ­ຮຽນ​ຕົວ​ແບບ​ຄຸ­ນະ­ພາບ 6 ແຫ່ງ ການ​ແຂ່ງ­ຂັນ​ນັກ­ຮຽນ​ເກ່ງ​ລະ­ດັບ​ຊາດ​ຊັ້ນ​ປະ­ຖົມ ໄດ້​ຮັບ​ຫຼຽນ​ຄຳ 2 ຄົນ ວິ­ຊາ​ຊີ­ວະ​ສາດ ມຕ ນີ​ຣະ​ດາ​ຈອມ​ເພັດ ແລະ ວິ­ຊາ​ເຄ​ມີ​ສາດ ຈາກ ມສ ພອນ​ສະ­ຫວັນ​ຊົນ­ເຜົ່າ ແລະ ຜົນ­ງານ​ອື່ນໆ​ອີກ​ຫຼາຍ​ຢ່າງ​ທີ່​ສາ­ມາດ​ຍາດ​ມາ​ໄດ້.

    ບັນ­ຫາ ແລະ ສິ່ງ​ທ້າຍ​ທີ່​ຈະ​ຕ້ອງ​ສູ້​ຊົນ​ໃນ​ສົກ­ຮຽນ 2018-2019 ຂະ­ແໜງ­ການ​ສຶກ​ສາ ໂດຍ​ສະ­ເພາະ ວຽກ​ງານ​ສຶກ​ສາ­ກ່ອນ​ໄວ​ຮຽນ ອັດ­ຕາ​ການ​ເຂົ້າ​ຮຽນ​ຂອງ​ເດັກ 5 ປີ ຍັງ​ມີ​ບາງ​ເມືອງ​ທີ່​ບໍ່​ທັນ​ບັນ­ລຸ​ຄາດ­ໝາຍ ການ​ສຶກ​ສາ​ຊັ້ນ​ມັດ­ທະ­ຍົມ​ສຶກ​ສາ ສະ­ພາບ​ບາງ​ໂຮງ­ຮຽນ​ບໍ່​ເໝາະ​ສົມ ສິ່ງ​ອຳ­ນວຍ​ຄວາມ​ສະ­ດວກ ການ​ສ້າງ ແລະ ຂະ­ຫຍາຍ​ຫ້ອງ​ຮຽນ​ໜ້ອຍ​ບໍ່​ສາ­ມາດ​ຮອງ​ຮັບ​ຈຳ­ນວນ​ນັກ­ຮຽນ ບາງ​ຫ້ອງ ບາງ​ໂຮງ­ຮຽນ​ມີ​ເຖິງ 52-60 ຄົນ​ຕໍ່​ຫ້ອງ ອີກ​ທັງ​ເກົ່າ​ແກ່​ຊຸດ­ໂຊມ ພ້ອມ​ດຽວ​ກັນ​ຕ້ອງ​ເອົາ­ໃຈ­ໃສ່​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ວຽກ​ງານ​ອາ­ຊີ­ວະ​ສຶກ​ສາ ພະ­ລະ ສິ­ລະ​ປະ​ສຶກ​ສາ ແລະ ວຽກ​ງານ​ສິ່ງ​ເສບ​ຕິດ​ໃນ​ໂຮງ­ຮຽນ ສິ່ງ​ສຳ­ຄັນ​ພະ­ນັກ­ງານ​ຄູ-ອາ­ຈານ​ທີ່​ຮັບ​ຜີດ​ຊອບ​ວິ­ຊາ ປກຊ-ປກສ ສ່ວນ​ຫຼາຍ​ຍັງ​ບໍ່​ໄດ້​ຜ່ານ​ການ​ເຝິກ­ອົບ­ຮົມ​ວິ­ຊາ​ດັ່ງ­ກ່າວ ເຮັດ​ໃຫ້­ການ​ປະ­ຕິ­ບັດ​ໂຄງ­ການ​ຫຼັກ­ສູດ​ການ​ຮຽນ-ການ​ສອນ​ບໍ່​ໄດ້​ຮັບ​ຜົນ​ເທົ່າ​ທີ່​ຄວນ.

ຂ່າວທີ່ກ່ຽວຂ້ອງ