ຂ່າວຫຼ້າສຸດ

ກ້າເບ້ຍໄມ້ຂາຍ ເຮັດໃຫ້ຊີວິດການເປັນຢູ່ຄອບຄົວດີຂຶ້ນ

143 13 ກ.ກ. 2018 ຂ່າວໜ້າ​ໜຶ່ງ
ກ້າເບ້ຍໄມ້ຂາຍ ເຮັດໃຫ້ຊີວິດການເປັນຢູ່ຄອບຄົວດີຂຶ້ນ

    ທ່ານ​ນາງ ແກ້ວ​ມະ­ນີ ວິ­ລະ​ສັກ ໃຫ້​ສຳ­ພາດ​ວ່າ: ດ້ວຍ​ຄວາມ​ມັກ​ຮັກ​ໃນ​ອາ­ຊີບ​ເຮັດ​ຮົ້ວ​ສວນ ໂດຍ​ສະ­ເພາະ​ແມ່ນ​ກ້າ​ເບ້ຍ​ໄມ້ ແລະ ເຫັນ​ວ່າ ພັກ-ລັດ­ຖະ­ບານ​ໄດ້​ສົ່ງ­ເສີມ​ໃຫ້​ທຸກ​ຄົນ​ພ້ອມ​ກັນ​ປູກ​ໄມ້​ໃຫ້​ເປັນ​ປ່າ​ປົກ​ຫຸ້ມ​ໃຫ້​ໄດ້ 70% ໃນ​ປີ 2020 ດັ່ງ­ນັ້ນ ຕົນ​ຈຶ່ງ​ໄດ້​ມີ​ແນວ​ຄິດ​ກ້າ​ເບ້ຍ​ໄມ້​ຂາຍ ເຊິ່ງ​ເປັນ​ວຽກ​ທີ່​ງ່າຍ ແລະ ມີ​ຄວາມ​ສະ­ດວກ​ສະ­ບາຍ ປີ 2010 ຕົນ​ໄດ້​ທົດ​ລອງ​ກ້າ​ເບ້ຍ​ໄມ້​ພື້ນ​ເມືອງ​ປະ­ເພດ​ໄມ້​ໃຫ້​ໝາກ​ຈຳ­ໜ່າຍ ເຫັນ​ວ່າ​ໄດ້­ຜົນ​ຕອບ​ຮັບ​ຈາກ​ລູກ​ຄ້າ ຈາກ​ນັ້ນ ຕົນ​ໄດ້​ມີ​ການ​ພັດ­ທະ­ນາ​ຂະ­ຫຍາຍ​ແນວ​ພັນ​ຂຶ້ນ​ເລື້ອຍໆ​ໃຫ້​ມີ​ຫຼາຍ​ຊະ­ນິດ​ເບ້ຍ​ໄມ້ ແນ­ໃສ່​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ລູກ​ຄ້າ ມາ​ຮອດ​ປັດ­ຈຸ­ບັນ​ສວນ​ຂອງ​ຕົນ​ປະ­ກອບ​ມີ​ປະ­ເພດ​ເບ້ຍ​ໄມ້​ປະ­ດັບ ໄມ້​ໃຫ້​ໝາກ ໄມ້​ອຸດ­ສາ­ຫະ­ກຳ ແລະ ອື່ນໆ ທີ່​ມີ​ລາ­ຄາ​ຂາຍ​ແຕ່ 5 ພັນ​ກີບ​ຂຶ້ນ​ໄປ ແຕ່​ລະ​ເດືອນ​ສາ­ມາດ​ສ້າງ​ລາຍ​ຮັບ​ໃຫ້​ຄອບ­ຄົວ​ແມ່ນ 2-3 ລ້ານ​ກີບ​ຕໍ່​ເດືອນ ເຊິ່ງ​ຜ່ານ​ການ​ປະ­ກອບ​ອາ­ຊີບ​ດັ່ງ­ກ່າວ ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ຄອບ­ຄົວ​ນັບ​ມື້​ດີ​ຂຶ້ນ​ເລື້ອຍໆ.

    ສຳ­ລັບ​ສວນ​ກ້າ​ເບ້ຍ​ໄມ້​ຂອງ​ທ່ານ​ນາງ ແກ້ວ​ມະ­ນີ ວິ­ລະ​ສັກ ມີ​ເນື້ອ­ທີ່​ທັງ​ໝົດ 3-4 ໄລ່ ຢູ່​ບ້ານ​ຫີນ​ຄັນ­ນາ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ແລະ ທິດ​ທາງ​ໃນ­ຕໍ່­ໜ້າ​ຈະ​ສືບ­ຕໍ່​ຂະ­ຫຍາຍ​ພັນ​ໄມ້​ໃຫ້​ໄດ້​ຫຼາຍ​ຂຶ້ນ​ເລື້ອຍໆ ພ້ອມ​ທັງ​ສືບ­ຕໍ່​ຖອດ​ຖອນ​ບົດ­ຮຽນ​ຈາກ​ຜູ້​ທີ່​ມີ​ປະ­ສົບ​ການ ເພື່ອ​ເປັນ​ການ​ພັດ­ທະ­ນາ​ສວນ​ຂອງ​ຕົນ​ໃຫ້​ນັບ​ມື້​ດີ​ຂຶ້ນ​ເປັນ​ກ້າວໆ.

ຂ່າວທີ່ກ່ຽວຂ້ອງ