ລະນຶກເຖິງປະທານ ສຸພານຸວົງ

124 13 ກ.ກ. 2018 ຫົວຂໍ້ຂ່າວອື່ນໆ

   ວັນ​ທີ 13/7/2018 ກໍ່​ຈະ​ເປັນ​ວັນ​ຄົບ­ຮອບ 109 ປີ ເຊິ່ງ​ພວກ​ເຮົາ​ທັງ­ຫຼາຍ​ຄວນ​ຫວນ​ລະ­ນຶກ​ເຖິງ​ຄຸນ ງາມ​ຄວາມ​ດີ​ຂອງ​ປະ­ທານ ສຸ​ພາ­ນຸ​ວົງ ໂດຍ​ການ​ສຶກ​ສາ​ຄົ້ນ­ຄວ້າ​ນຳ​ເອົາ​ສິນ​ທຳ​ປະ­ຕິ­ວັດ​ຂອງ​ເພິ່ນ​ມາ​ໝູນ​ໃຊ້​ໃນ​ໜ້າ​ວຽກ ແລະ ຊີ­ວິດ​ປະ­ຈຳ​ວັນ​ໃຫ້​ເກີດ​ດອກ​ອອກ​ຜົນ ເຊິ່ງ​ຄຸ​ນະ​ທຳ​ດັ່ງ­ກ່າວ​ທີ່​ປະ­ຈັກ​ແຈ້ງ​ແກ່​ພວກ​ເຮົາ ແມ່ນ​ການ​ເສຍ­ສະ­ຫຼະ​ເພື່ອ​ຊາດ ແລະ ນ້ຳ­ໃຈ​ເດັດ­ດ່ຽວ​ກ້າ­ແກ່ນ​ບໍ່​ຍອມ​ຈຳ­ນົນ​ຕໍ່​ສັດ­ຕູ ດຳ­ເນີນ​ການ​ຕໍ່­ສູ້ ຈົນ​ໄດ້​ຮັບ​ໄຊ­ຊະ­ນະ​ຮ່ວມ​ກັບ​ຜູ້­ນຳ​ທ່ານ​ອື່ນໆ ພວກ​ເຮົາ​ບໍ່​ຄວນ​ລືມ​ວ່າ​ພື້ນ­ຖານ​ຊີ­ວິດ​ຂອງ​ເພິ່ນ​ເຖິງ​ຈະ​ແມ່ນ​ເຊື້ອ​ເຈົ້າ ແລະ ປັນ­ຍາ​ຊົນ​ທີ່​ໄດ້​ຮຽນ​ຈົບ​ສູງ​ມາ​ຈາກ​ຝຣັ່ງ ແຕ່​ເພິ່ນ​ກໍ່​ເຫັນ­ແກ່​ປະ­ເທດ​ຊາດ​ບ້ານ​ເມືອງ ຈຶ່ງ​ກ້າວ​ເຂົ້າ​ສູ່​ເສັ້ນ­ທາງ​ການ​ປະ­ຕິ­ວັດ.

   ຜູ້​ຂຽນ​ຈຶ່ງ​ຂໍ​ຢາກ​ເອົາ​ແນວ​ຄິດ​ທັດ­ສະ­ນະ​ຂອງ​ພະ​ອາ­ຈານ​ມະ­ຫາ​ວິ­ຈິດ ສິງ­ຫາ​ລາດ ອະ­ດີດ​ປະ­ທານ​ອົງ­ການ​ພຸດ​ທະ​ສາ­ສະ­ໜາ​ສຳ­ພັນ​ລາວ ທີ່​ເຄີຍ​ເຂົ້າ​ຮ່ວມ​ການ​ປະ­ຕິ­ວັດ ແລະ ໄດ້​ຮູ້​ເຫັນ​ບາງ​ແງ່​ມູມ​ຂອງ​ຊີ­ວິດ ປະ­ທານ ສຸ​ພາ­ນຸ​ວົງ ວ່າ: ສະ­ເດັດ ສຸ​ພາ­ນຸ​ວົງ ເປັນ​ຜູ້­ນຳ ແລະ ນັກ​ປະ­ຕິ­ວັດ​ທີ່​ມີ​ຊື່​ສຽງ​ບາ​ລະ​ມີ ເພາະ​ນັບ​ແຕ່​ເພິ່ນ​ຮຽນ​ຈົບ ແລະ ກ້າວ​ຂາ​ເຂົ້າ​ແຜ່ນ­ດິນ​ລາວ ເທິງ​ເສັ້ນ­ທາງ​ການ​ປະ­ຕິ­ວັດ​ປະ­ຊາ­ຊົນ​ຄົນ​ລາວ ສ່ວນ​ຫຼາຍ​ກໍ່​ແມ່ນ​ໄດ້​ຍິນ​ຊື່​ສຽງ​ຂອງ​ເພິ່ນ​ໂລດ ຄຸນ­ສົມ­ບັດ​ທີ່​ຄວນ​ຮຽນ​ເອົາ​ຈາກ​ເພິ່ນ ແມ່ນ​ຄວາມ​ເສຍ­ສະ­ຫຼະ ແລະ ນ້ຳ­ໃຈ​ຕໍ່­ສູ້​ທີ່​ເດັດ­ດ່ຽວ​ບໍ່​ຍອມ​ຈຳ­ນົນ... ດັ່ງ­ນັ້ນ ສຳ­ລັບ​ພວກ​ເຮົາ​ແລ້ວ ການ​ສຶກ​ສາ​ຄົ້ນ­ຄວ້າ​ໃຫ້​ຮູ້​ແຈ້ງ​ບົນ​ເສັ້ນ­ທາງ ການ​ປະ­ຕິ­ວັດ​ຂອງ​ຜູ້­ນຳ​ລາວ ໂດຍ​ສະ­ເພາະ ສະ­ເດັດ ສຸ​ພາ­ນຸ​ວົງ ກໍ່​ແມ່ນ​ວິ­ທີ​ໜຶ່ງ​ທີ່​ສະ­ແດງ​ອອກ​ເຖິງ​ຄວາມ​ກະ­ຕັນ­ຍູ​ຮູ້​ຄຸນ ເພື່ອ​ນຳ​ເອົາ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ອັນ​ຍອດ​ຍິ່ງ​ນັ້ນ​ຖື​ໄວ້​ເປັນ​ແວ່ນ​ແຍງ​ເຍືອງ​ທາງ​ໃນ​ການ​ສືບ​ທອດ​ພາ­ລະ­ກິດ​ການ​ສ້າງ​ຊາດ ທ່ານ ພົງ​ສະ​ຫວັດ ບຸບ­ຜາ ໄດ້​ຂຽນ​ເຖິງ​ສະ­ເດັດ ສຸ​ພາ­ນຸ​ວົງ (ໜັງ­ສື­ພິມ​ວຽງ​ຈັນ​ໃໝ່ 9/7/2009) ໄວ້​ວ່າ ປະ­ທານ ສຸ​ພາ­ນຸ​ວົງ ເປັນ​ນັກ​ການ​ທູດ​ຜູ້​ຍິ່ງ​ໃຫຍ່ ມີ​ທັງ​ປະ­ສົບ​ການ​ທີ່​ດີ ເດັ່ນ​ທາງ​ດ້ານ​ການ​ທູດ​ປະ­ຊາ­ຊົນ ກໍ່​ຄື ການ​ທູດ​ລະ­ຫວ່າງ​ປະ­ເທດ ເພິ່ນ​ເປັນ​ຜູ້​ມັກ​ຄົ້ນ­ຄວ້າ​ຮ່ຳ­ຮຽນ​ຈົນ​ກາຍ­ເປັນ​ຜູ້​ມີ​ຄວາມ​ຮູ້​ຮອບ​ຕົວ​ຫຼາຍ​ດ້ານ ທ່ານ ສີ­ສະ​ນະ ສີ​ສານ ໄດ້​ຂຽນ​ເຖິງ​ປະ­ທານ ສຸ​ພາ­ນຸ​ວົງ ໃນ​ປຶ້ມ​ເຈົ້າ ສຸ​ພາ­ນຸ​ວົງ ຜູ້­ນຳ​ປະ­ຕິ­ວັດ 1989 ວ່າ: ແປ້ວ​ບາດ­ແຜ​ຂອງ​ສະ­ຫາຍ​ທີ່​ໄດ້​ຮັບ​ຈາກ​ການ​ຍິງ​ຂອງ​ຍົນ​ນັ້ນ ສະ­ຫາຍ​ຄິດ​ແນວ­ໃດ ? ເພິ່ນ​ຕອບ​ວ່າ ແປ້ວ​ນັ້ນ ເຮັດ​ໃຫ້​ເຮົາ​ພາກ­ພູມ​ກຽດ​ທີ່​ໄດ້​ມີ​ສ່ວນ​ຮ່ວມ​ນ້ອຍໆ​ເຂົ້າ​ໃນ​ການ​ກູ້​ຊາດ... ເຫັນ​ໄດ້​ວ່າ­ຄວາມ​ຖ່ອມ​ຕົນ​ບໍ່​ຂີ້​ອວດ​ຂີ້​ອົ່ງ​ກໍ່​ແມ່ນ​ຄຸນ­ສົມ­ບັດ​ທີ່​ສຳ­ຄັນ​ທີ່​ຄວນ​ເອົາ​ແບບ­ຢ່າງ​ຂອງ​ເພິ່ນ.

   ຜູ້​ຂຽນ​ຈຶ່ງ​ສັງ​ລວມ​ໄດ້​ວ່າ: ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ຂອງ​ປະ­ທານ ສຸ​ພາ­ນຸ​ວົງ ມີ​ທັງ​ນ້ຳ­ໃຈ​ເສຍ­ສະ­ຫຼະ​ເພື່ອ​ຊາດ ການ​ຕໍ່­ສູ້​ທີ່​ບໍ່​ຍອມ​ຈຳ­ນົນ​ເດັດ­ດ່ຽວ​ກ້າ­ຫານ​ໜຽວ​ແໜ້ນ ການ​ສຶກ​ສາ​ຄົ້ນ­ຄວ້າ​ຮ່ຳ­ຮຽນ​ຫາ​ຄວາມ​ຮູ້ ແລະ ຄວາມ​ຖະ­ໜອມ​ຖ່ອມ​ຕົນ ເປັນ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ຂອງ​ເພິ່ນ​ທີ່​ພວກ​ເຮົາ​ຄວນ​ຖື​ເປັນ​ແວ່ນ​ແຍງ​ສະ­ທ້ອນ​ເຂົ້າ​ໃນ​ໜ້າ​ວຽກ ແລະ ຊີ­ວິດ ປະ­ທານ ສຸ​ພາ­ນຸ​ວົງ ຈະ​ຍືນ​ຍົງ​ຕໍ່​ຊາດ​ລາວ ແລະ ຢູ່​ໃນ​ດວງ​ໃຈ​ຂອງ​ປວງ​ຊົນ.

+ ດັ້ນ​ກີບ​ເມກ

ຂ່າວທີ່ກ່ຽວຂ້ອງ