ຂ່າວຫຼ້າສຸດ

ຍ່າງເພື່ອສຸຂະພາບ ສະຫຼອງວັນສ້າງຕັ້ງກີລາລາວ

214 13 ກ.ກ. 2018 ວົງຈອນກີລາ
ຍ່າງເພື່ອສຸຂະພາບ ສະຫຼອງວັນສ້າງຕັ້ງກີລາລາວ

   ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ​ຊຳ​ເໜືອ ໄດ້​ຈັດ​ກິດ­ຈະ­ກຳ​ຍ່າງ​ເພື່ອ​ສຸ­ຂະ­ພາບ ແລະ ຫັດ­ກາຍ​ຍະ​ບໍ­ລິ­ຫານ ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ກີ­ລາ​ລາວ ຄົບ­ຮອບ 52 ປີ ຂຶ້ນ​ຢ່າງ​ຄຶກ­ຄື້ນ ໃນ​ວັນ​ທີ 11 ກໍ­ລະ­ກົດ 2018 ທີ່​ສະ­ໜາມ​ກີ­ລາ​ແຂວງ​ຫົວ­ພັນ ແລະ ສວນ​ສາ­ທາ­ລະ­ນະ​ຫົວ­ພັນ-ກວາງ​ນິງ ມີ​ທ່ານ ລຽນ​ໄຊ ບຸນ​ມະ­ນີ​ວັນ ເຈົ້າ­ເມືອງ​ຊຳ​ເໜືອ ທ່ານ ມົນ​ທອງ ລຽນ​ຕິ​ຄຸນ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ມີ​ບັນ­ດາ​ຫົວ­ໜ້າ​ພະ­ແນກ­ການ​ອ້ອມ​ຂ້າງ​ແຂວງ ເມືອງ ພະ­ນັກ­ງານ ທະ­ຫານ ຕຳ­ຫຼວດ ພໍ່-ແມ່​ປະ­ຊາ­ຊົນ​ບັນ­ດາ­ເຜົ່າ ນັກ­ຮຽນ​ຮູ້​ປັນ­ຍາ​ຊົນ ເຂົ້າ​ຮ່ວມ​ຢ່າງ​ຫຼວງ­ຫຼາຍ.

   ໂອ­ກາດ​ນີ້ ທ່ານ ນີນ​ທອງ ທອງ​ລາ​ວອນ ຮັກ­ສາ​ການ​ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ​ຊຳ​ເໜືອ ໄດ້​ຂຶ້ນ​ເລົ່າ​ມູນ­ເຊື້ອ ແລະ ປະ­ຫວັດ​ຄວາມ​ເປັນ​ມາ​ຂອງ​ກີ­ລາ​ລາວ ຈາກ​ນັ້ນ​ຄະ­ນະ​ຮັບ­ຜິດ­ຊອບ​ພິ­ທີ​ກໍ່​ໄດ້​ນຳ­ພາ​ມວນ​ຊົນ ຫັດ­ກາຍ​ຍະ​ບໍ­ລິ­ຫານ 9 ທ່າ ຢູ່​ທີ່​ສະ­ໜາມ​ກີ­ລາ​ຂອງ​ແຂວງ ແລະ ຍ່າງ​ເພື່ອ​ສຸ­ຂະ­ພາບ ອ້ອມ​ເທດ­ສະ­ບານ​ເມືອງ​ຊຳ​ເໜືອ ຢ່າງ​ເປັນ​ຂະ​ບວນ​ຟົກ​ຟື້ນ ແລະ ຄຶກ­ຄື້ນ​ມ່ວນ­ຊື່ນ ທັງ​ນີ້​ກໍ່​ເພື່ອ​ເປັນ​ການ​ຫວນ​ຄືນ​ວັນ​ສ້າງ­ຕັ້ງ​ກີ­ລາ​ລາວ ແລະ ທັງ​ເປັນ​ການ​ຈັດ​ກິດ­ຈະ­ກຳ​ເພື່ອ​ສຸ­ຂະ­ພາບ ຊ່ວຍ​ເສີມ​ສ້າງ​ເຮັດ​ໃຫ້​ຮ່າງ­ກາຍ ມີ​ພະ­ລະ​ນາ​ໄມ​ສົມ­ບູນ​ແຂງ­ແຮງ ປາ­ສະ­ຈາກ​ໂລກ­ໄພ­ໄຂ້­ເຈັບ​ຕ່າງໆ.

ຂ່າວທີ່ກ່ຽວຂ້ອງ