ດອກປີກໄກ່ລາວ ຫວັງມີຫຼຽນຕິດມືໃນງານກີລານັກຮຽນອາຊຽນ

246 13 ກ.ກ. 2018 ວົງຈອນກີລາ
ດອກປີກໄກ່ລາວ ຫວັງມີຫຼຽນຕິດມືໃນງານກີລານັກຮຽນອາຊຽນ

   ສະ­ຫະ­ພັນ​ກີ­ລາ​ດອກ​ປີກ​ໄກ່​ລາວ​ແຫ່ງ​ຊາດ​ລາວ ຕັ້ງ​ຄວາມ​ຫວັງ​ຈະ​ພະ­ຍາ­ຍາມ​ສູ້​ຊົນ​ ຍາດ​ໃຫ້​ໄດ້​ຫຼຽນ​ໃດ​ຫຼຽນ​ໜຶ່ງ​ກັບ​ບ້ານ​ໃນ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 10 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ໃນ​ກາງ​ເດືອນ​ກໍ­ລະ­ກົດ​ນີ້ ຂະ­ນະ​ທີ່​ປັດ­ຈຸ­ບັນ​ນັກ­ກີ­ລາ​ທຸກ​ຄົນ​ມີ​ຄວາມ​ພ້ອມ​ເກືອບ 100%.

   ທ່ານ ບຸນ​ຍະ​ແສງ ນະ​ຊຽງ​ຄຳ ຄູ​ເຝິກ​ກີ­ລາ​ດອກ​ປີກ​ໄກ່​ນັກ­ຮຽນ​ລາວ ໄດ້​ລາຍ​ງານ​ກ່ຽວ​ກັບ​ການ​ກະ­ກຽມ​ຄວາມ​ພ້ອມ ແລະ ສະ­ພາບ​ການ​ເຝິກ­ຊ້ອມ​ຂອງ​ນັກ­ກີ­ລາ​ດອກ​ປີກ​ໄກ່​ນັກ­ຮຽນ​ລາວ ມາ​ຮອດ​ປັດ­ຈຸ­ບັນ​ໄດ້​ເຝິກ­ຊ້ອມ​ເປັນ​ເວ­ລາ 5-6 ອາ­ທິດ ສາ­ມາດ​ປະ​ເມີນ​ໄດ້​ຄວາມ​ພ້ອມ​ຂອງ​ນັກ­ກີ­ລາ​ປະ­ມານ 85% ໂດຍ​ໄດ້​ເນັ້ນ​ກ່ຽວ​ກັບ​ລະ­ບົບ ແລະ ຮູບ​ເກມ​ການ​ຫຼິ້ນ ເພື່ອ​ໃຊ້​ເປັນ​ກົນ­ລະ­ຍຸດ​ໃນ​ການ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້  ສຳ­ລັບ​ການ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 10 ທີ່​ປະ­ເທດ​ມາ​ເລ​ເຊຍ ສະ­ຫະ­ພັນ​ດອກ​ປີກ​ໄກ່​ແຫ່ງ​ຊາດ​ລາວ ຈະ​ໄດ້​ສົ່ງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ ທັງ​ໝົດ 11 ຄົນ ຍິງ 4 ຄົນ ໃນ 7 ລາຍ­ການ​ຄື:ທີມ​ຊາຍ-ຍິງ ດ່ຽວ ຊາຍ-ຍິງ ຄູ່​ຊາຍ-ຍິງ ແລະ ຄູ່​ປະ­ສົມ.

   ສຳ­ລັບ​ຜົນ­ງານ​ຂອງ​ການ​ເຂົ້າ​ຮ່ວມ​ງານ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 9 ທີ່​ປະ­ເທດ​ສິງ­ກະ­ໂປ ເປັນ​ເຈົ້າ­ພາບ​ຜ່ານ​ມາ ແມ່ນ​ພະ­ຍາ­ຍາມ​ເຮັດ​ໄດ້​ດີ​ທີ່​ສຸດ​ສາ­ມາດ​ເຂົ້າ​ຮອບ 8 ທີມ ໃນ​ປະ­ເພດ​ຄູ່​ປະ­ສົມ ຂະ­ນະ​ທີ່​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 10 ທີ່​ປະ­ເທດ​ມາ​ເລ​ເຊຍ ຄັ້ງ​ນີ້ ກໍ່​ໄດ້​ມີ​ຄວາມ​ຫວັງ​ໃນ​ປະ­ເພດ​ທີມ​ຊາຍ ອາດ​ຈະ​ສາ­ມາດ​ຍາດ​ໃຫ້​ໄດ້​ຫຼຽນ​ໃດ​ຫຼຽນ​ໜຶ່ງ ສ່ວນ​ທີມ​ຍິງ​ກໍ່​ມີ​ໂອ­ກາດ​ລຸ້ນ​ໃຫ້​ໄດ້​ຫຼຽນ​ເຊັ່ນ​ກັນ ແລະ ລາຍ­ການ​ປະ­ເພດ​ດ່ຽວ​ກໍ່​ຈະ​ພະ­ຍາ­ຍາມ​ເຮັດ​ໃຫ້​ດີ​ທີ່​ສຸດ ເພື່ອ​ສ້າງ​ຜົນ­ງານ​ໃຫ້​ກັບ​ປະ­ເທດ​ຊາດ.

ຂ່າວທີ່ກ່ຽວຂ້ອງ