ຂ່າວຫຼ້າສຸດ

ຍານ​ອາ​ວະ​ກາດ ໂປຣ​ແກຣ​​ສ MS-09 ສ້າງ​ສະຖິຕິ​ໃນ​ດ້ານ​ເວລາ​ບິນ​ຂຶ້ນ​ສູ່ ISS

154 12 ກ.ກ. 2018 ຂ່າວຕ່າງປະເທດ
ຍານ​ອາ​ວະ​ກາດ ໂປຣ​ແກຣ​​ສ MS-09 ສ້າງ​ສະຖິຕິ​ໃນ​ດ້ານ​ເວລາ​ບິນ​ຂຶ້ນ​ສູ່ ISS

    ອົງການ​ອາ​ວະ​ກາດ​ຣັດ​ເຊຍ ແຈ້ງ​ໃຫ້​ຮູ້ເມື່ອ​ວັນ​ທີ 10 ກໍລະກົດ​ນີ້​ວ່າ ຍານ​ອາ​ວະ​ກາດ ໂປຣ​ແກຣ​​ສ MS-09 ບັນທຸກ​ສິນຄ້າ​ຂອງ​ຣັດ​ເຊຍ ໃຊ້​ເວລາ​ພຽງ 3 ຊົ່ວໂມງ 40 ນາທີ ນັບ​ແຕ່​ເວລາ​ທີ່​ຍິງ​ສົ່ງ ໄປ​ຮອດ​ເວລາ​ເຊື່ອມ​ຈອດ​ກັບ​ສະຖານີ​ອາ​ວະ​ກາດ​ສາກົນ (ISS) ນັບ​ວ່າ​ໄວ​ກວ່າ ເກືອບ 2 ຊົ່ວໂມງ ເມື່ອ​ທຽບໃສ່​ເວລາ​ໃນ​ເມື່ອ​ກ່ອນ ທີ່​ຕ້ອງ​ໃຊ້​ເວລາ 5 ຊົ່ວໂມງ 39 ນາທີ.

    ຍານ​ອາ​ວະ​ກາດ ໂປຣ​ແກຣ​​ສ MS-09 ໄດ້​ຮັບ​ການ​ຍິງ​ສົ່ງ​ຂຶ້ນ​ສູ່​ວົງ​ໂຄຈອນ ຈາກ​ສະໜາມ​ບິນ​ອາ​ວະ​ກາດ​ໄບ​ໂກ​ນົວ ໃນ​ກາ​ຊັກ​ສະຖານ ໂດຍ​ໃຊ້​ລູກ​ສອນ​ໄຟ Soyuz 2.1 ແບບ​ຍູ້ ໃນ​ການ​ຍິງ​ສົ່ງ ເມື່ອ​ເວລາ 21 ໂມງ 51 ນາທີ (ເວລາ GMT) ໃນ​ວັນ​ທີ 9 ກໍລະກົດ ແລະ​ເຊື່ອມ​ຈອດ​ກັບ ISS ໃນ​ເຊົ້າ​ມືດ​ວັນ​ທີ 10 ກໍລະກົດ.

    ອົງການ​ອາ​ວະ​ກາດ​ຣັດ​ເຊຍ ໃຫ້​ຮູ້​ວ່າ ການ​ໃຊ້​ເວລາ​ໃນ​ການບິນ​ຂອງ​ຍານ​ໂປຣ​ແກຣ​​ສ MS-09 ສັ້ນ​ລົງ​ນັ້ນ ແມ່ນ​ໄດ້​ຈາກ​ການ​ນຳ​ໃຊ້​ລະບົບ​ພາ​ທາງ​ແບບ​ໃໝ່.

    ໃນ​ເທື່ອ​ນີ້ ຍານ​ອາ​ວະ​ກາດ​ແບບ​ບໍ່​ມີ​ຂົນ​ຂັບ​ຂອງ​ຣັດ​ເຊຍ​ດັ່ງກ່າວ ນຳ​ເອົາ​ເຊື້ອ​ໄຟ ສະບຽງ​ອາຫານ ພ້ອມ​ທັງ​ວັດຖຸ​ດິບ​ຮັບ​ໃຊ້​ໃຫ້​ແກ່​ການ​ທົດ​ລອງ​ວິທະຍາສາດ ເປັນ​ນ້ຳໜັກ 2 ໂຕນ​ກວ່າ  ສະໜອງ​ໃຫ້​ແກ່​ຈຸ​ບິນ ຈຳນວນ 6 ຄົນ ທີ່​ພວມ​ປະຕິບັດ​ໜ້າທີ່​ຢູ່​ໃນ ISS ໃນ​ນັ້ນ​ມີ​ຊາວ​ຣັດ​ເຊຍ 2 ຄົນ ຊາວ​ເຢຍ​ລະ​ມັນ 1 ຄົນ ແລະ​ອີກ 3 ຄົນ ມາ​ຈາກ​ອົງການ​ການບິນ​ອາ​ວະ​ກາດ ສ ອາ​ເມ​ຣິ​ກາ  (NASA)./.

 

ຂ່າວທີ່ກ່ຽວຂ້ອງ