ລັດຖະບານ​ຍີ່ປຸ່ນ ຊຸກຍູ້​ຄວາມ​ພະຍາຍາມ​ບູລະນະ​ສ້າງສາ​ຄືນໃໝ່​ຫຼັງ​ເກີດ​ໄພ​ທຳ​ມະ​ຊາດ

171 12 ກ.ກ. 2018 ຂ່າວຕ່າງປະເທດ
ລັດຖະບານ​ຍີ່ປຸ່ນ ຊຸກຍູ້​ຄວາມ​ພະຍາຍາມ​ບູລະນະ​ສ້າງສາ​ຄືນໃໝ່​ຫຼັງ​ເກີດ​ໄພ​ທຳ​ມະ​ຊາດ

    ໄລ່​ມາ​ຮອດ​ຕອນ​ທ່ຽງ​ຂອງ​ວັນ​ທີ 10 ກໍລະກົດ​ນີ້ ຍອດ​ຜູ້​ເສຍ​ຊີວິດ​ຍ້ອນ​ຝົນຕົກ​ໜັກ ພາໃຫ້​ເກີດ​ນ້ຳ​ຖ້ວມ ແລະ ​ດິນ​ເຈື່ອນ ຢູ່​ທາງ​ທິດຕາເວັນຕົກ​ຍີ່ປຸ່ນ​ນັ້ນ ໄດ້​ເພີ່ມ​ຂຶ້ນ​ເປັນ 156 ຄົນ ໃນ​ຂະນະ​ທີ່​ຍັງ​ມີ​ຫຼາຍ​ສິບ​ຄົນ​ຫາຍ​ສາບ​ສູນ ແລະ​ການ​ຊ່ວຍເຫຼືອ​ກູ້​ໄພ​ຍັງ​ຄົງ​ສືບຕໍ່.

    ໃນ​ສະພາບ​ການ​ຄື​ດັ່ງກ່າວ ລັດຖະບານ​ຍີ່ປຸ່ນ ໄດ້​ຊຸກຍູ້​ຄວາມ​ພະຍາຍາມ ເພື່ອ​ມຸ່ງ​ໄປ​ສູ່​ການ ເຄື່ອນ​ໄຫວ​ບູລະນະ​ສ້າງສາ​ຄືນໃໝ່ ຢູ່​ໃນ​ເຂດ​ຕ່າງໆ​ທີ່​ໄດ້​ຮັບ​ຜົນ​ກະທົບ ພ້ອມ​ກັນ​ນັ້ນ​ກໍ​ປະກາດ ເຖິງ​ການ​ນຳ​ໃຊ້​ກອງ​ທຶນ​ສຳຮອງ​ຕ່າງໆ ເພື່ອ​ສະໜອງ​ສະບຽງ​ອາຫານ ແລະ ສິ່ງ​ຂອງ​ທີ່​ຈຳເປັນ ໃຫ້​ແກ່​ເຂດ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ທຳ​ມະ​ຊາດ​ດັ່ງກ່າວ.

    ນາຍົກລັດຖະມົນຕີ​ຍີ່ປຸ່ນ ຊິນ​ໂຊ ອາ​ເບ ກ່າວ​ຕໍ່​ກອງ​ປະຊຸມ​ຄະນະ​ລັດຖະບານ ເພື່ອ​ປຶກສາ​ຫາລື​ກ່ຽວ​ກັບ​ການ ໃຫ້​ຄວາມ​ຊ່ວຍເຫຼືອ​ຜູ້​ປະສົບ​ໄພພິບັດ​ທຳ​ມະ​ຊາດ​ຄັ້ງ​ໃຫຍ່​ດັ່ງກ່າວ ໂດຍ​ເນັ້ນ​ໜັກ​ວ່າ ດ້ານ​ໜຶ່ງ​ທ່ານ​ຈະ​ໄປ​ຢ້ຽມຢາມ​ເຂດ​ທີ່​ໄດ້​ຮັບ​ຜົນ​ກະທົບ​ໜັກໜ່ວງ  ໃນ​ນັ້ນ​ມີ​ແຂວງ ໂອ​ກາ​ຢາ​ມາ ແລະ​ອີກ​ດ້ານ​ໜຶ່ງ ທ່ານ​ຈະ​ກວດກາ​ສະພາບ​ການ​ໃນ​ຫຼາຍ​ເຂດ ເພື່ອ​ຮັບ​ຟັງ​ຄວາມ​ມຸ່ງ​ຫວັງ ຂອງ​ປະຊາຊົນ ພ້ອມ​ດ້ວຍ​ອຳນາດ​ການ​ປົກຄອງ​ທ້ອງຖິ່ນ.

    ທ່ານ ອາ​ເບ ໃຫ້​ຮູ້​ວ່າ ລັດຖະບານ​ຈະ​ຫັກ​ເອົາ​ເງິນ​ຈາກ​ບັນດາ​ກອງ​ທຶນ​ສຳຮອງ ແລະ​ສະໜອງ ສະບຽງ​ອາຫານ ນ້ຳ​ດື່ມ ແລະ​ ສິ່ງ​ຂອງ​ທີ່​ຈຳເປັນ ໄປ​ໃຫ້​ແກ່​ເຂດ​ຕ່າງໆ​ທີ່​ໄດ້​ຮັບ​ຜົນ​ກະທົບ ຈາກ​ໄພ​ທຳ​ມະ​ຊາດ​ດັ່ງກ່າວ ໂດຍ​ຄາດ​ວ່າ​ມີ​ຍອດ​ຈຳນວນ​ເງິນ​ທີ່​ປະມານ 2 ຕື້​ເຢນ (ເທົ່າ​ກັບ ປະມານ 18 ລ້ານ​ໂດ​ລາ​ສະຫະລັດ).

    ຝົນຕົກ​ໜັກ​ໄດ້​ເທ​ລົງ​ໃສ່​ເຂດ​ພາກ​ຕາເວັນຕົກ​ຂອງ​ຍີ່ປຸ່ນ ເລີ່ມ​ແຕ່​ວັນ​ທີ 5 ກໍລະກົດ​ທີ່​ຜ່ານ​ມາ. ເຂດ​ທີ່​ໄດ້​ຮັບ​ຄວາມ​ເສຍ​ຫາຍ​ໜັກໜ່ວງ​ທີ່​ສຸດ ແມ່ນ​ຢູ່​ໃນ​ແຂວງ ຮີ​ໂຣ​ຊີ​ມາ ເອ​ຮີ​ເມ ແລະ ໂອ​ກາ​ຢາ​ມາ. ຄຳ​ສັ່ງ ຫຼື​ຄຳ​ແຈ້ງ​ເຕືອນ ຖືກ​ນຳ​ອອກ​ມາ​ສຳລັບ​ປະຊາຊົນ 5,9 ລ້ານ​ຄົນ ຢູ່​ໃນ 19 ແຂວງ ໃນ​ຂະນະ​ທີ່​ມີ​ປະມານ 23.000 ຍັງ​ຄົງ​ອາໄສ​ຢູ່​ໃນ​ສູນ​ອົບ​ພະ​ຍົບ​ແຫ່ງ​ຕ່າງໆ ໃນ​ວັນ​ທີ 9 ກໍລະກົດ. ຕຳຫຼວດ ກອງ​ກຳລັງ​ປ້ອງ​ກັນ ແລະ​ເຈົ້າ​ໜ້າທີ່​ກູ້​ໄພ ທີ່​ໄດ້​ຖືກ​ສົ່ງ​ໄປ​ຍັງ​ພື້ນ​ທີ່​ປະສົບ​ໄພ ໄດ້​ເພີ່ມ​ຂຶ້ນ​ເປັນ 75.000 ຄົນ./.

 

ຂ່າວທີ່ກ່ຽວຂ້ອງ