ສຳເລັດ​ການ​ກູ້​ໄພ​ຢູ່​ໃນ​ຖ້ຳ​ຫຼວງ​ຂຸນ​ນ້ຳ​ນາງ​ນອນ

194 12 ກ.ກ. 2018 ຂ່າວຕ່າງປະເທດ
ສຳເລັດ​ການ​ກູ້​ໄພ​ຢູ່​ໃນ​ຖ້ຳ​ຫຼວງ​ຂຸນ​ນ້ຳ​ນາງ​ນອນ

    ແຫຼ່ງ​ຂ່າວ​ຕ່າງໆ​ຈາກ​ຈັງຫວັດ​ຊຽງ​ຣາຍ ຂອງ​ໄທ ອ້າງ​ຕາມ​ຄຳ​ເວົ້າ​ຂອງ​ເຈົ້າ​ໜ້າທີ່​ໄທ ໃຫ້​ຮູ້​ວ່າ ບັນດາ​ເຈົ້າ​ໜ້າທີ່​ການ​ແພດ ແລະ​ ເຈົ້າ​ໜ້າທີ່​ກູ້​ໄພ​ຈາກ​ກອງ​ກຳລັງ SEAL ຂອງ​ກອງທັບ​ເຮືອ​ໄທ ທີ່​ຄ້າງ​ຢູ່​ກັບ​ເດັກນ້ອຍ​ໃນ​ຖ້ຳ​ຫຼວງ​ຂຸນ​ນ້ຳ​ນາງ​ນອນ ໃນ​ຈັງຫວັດ​ຊຽງ​ຣາຍ ມາ​ເປັນ​ເວລາ​ຫຼາຍ​ວັນ​ນັ້ນ ໄດ້​ອອກ​ມາ​ຈາກ​ຖ້ຳ​ທັງ​ໝົດ​ດ້ວຍ​ຄວາມ​ປອດ​ໄພ​ແລ້ວ ໃນ​ຕອນ​ຄ່ຳ​ວັນ​ທີ 10 ກໍລະກົດ​ນີ້.

    ເດັກນ້ອຍ​ທີ່​ເປັນ​ນັກ​ກິລາ​ບານເຕະ​ຈາກ​ທິມ “ໝູ​ປ່າ” ຈຳນວນ 12 ຄົນ ທີ່​ມີ​ອາຍຸ​ແຕ່ 11-16 ປີ ແລະ​ຄູ​ຝຶກ​ອີກ 1 ຄົນ ທີ່​ມີ​ອາຍຸ 25 ປີ ໄດ້​ເຂົ້າ​ໄປ​ໃນ​ຖ້ຳ​ຫຼວງ​ຂຸນ​ນ້ຳ​ນາງ​ນອນ ເມື່ອ​ວັນ​ທີ 23 ມິຖຸນາ​ທີ່​ຜ່ານ​ມາ ແລະ​ຖືກ​ຕິດ​ຄ້າງ​ຢູ່​ໃນ​ຖ້ຳ​ດັ່ງກ່າວ ຍ້ອນ​ເກີດ​ຝົນຕົກ​ໜັກ. ຕໍ່​ມາ 10 ວັນ ນັກ​ດຳ​ນ້ຳ ຊາວ​ອັງກິດ 2 ຄົນ ໄດ້​ເຂົ້າ​ໄປ​ໃນ​ຖ້ຳ ແລະ​ພົບ​ເຫັນ​ທັງ 13 ຄົນ​ຢູ່​ໃນ​ຈຸດ​ທີ່​ຫ່າງ​ຈາກ​ປາກ​ຖ້ຳ 4 ກີ​ໂລ​ແມັດ.

    ເຈົ້າ​ໜ້າທີ່​ໄທ​ໄດ້​ເຕົ້າໂຮມ​ເອົາ​ນັກ​ດຳ​ນ້ຳ 90 ຄົນ ໃນ​ນັ້ນ​ເປັນ​ຊາວ​ຕ່າງປະເທດ 50 ຄົນ ປະຕິບັດ​ໜ້າທີ່​ເຂົ້າ​ໄປ​ຊ່ວຍເຫຼືອ​ຜູ້​ປະສົບ​ໄພ​ດັ່ງກ່າວ​ອອກ​ມາ​ຈາກ​ຖ້ຳ. ໃນ​ການ​ຊ່ວຍເຫຼືອ​ກູ້​ໄພ ທ່າມກາງ​ເງື່ອນໄຂ​ທີ່​ບໍ່​ສະດວກ​ນັ້ນ ໄດ້​ເຮັດ​ໃຫ້​ອະດີດ​ເຈົ້າ​ໜ້າທີ່​ປະຕິບັດ​ງານ​ພິເສດ ຂອງ​ກອງທັບ​ເຮືອ ໄທ ເສຍ​ຊີວິດ 1 ຄົນ ໃນ​ຂະນະ​ທີ່​ເຂົາ​ພວມ​ຈັດ​ສົ່ງ​ຖັງ​ອົກ​ຊີ​ຢູ່​ໃຕ້​ນ້ຳ ໃນ​ວັນ​ທີ 6 ກໍລະກົດ.

 

ຂ່າວທີ່ກ່ຽວຂ້ອງ