ສະ​ວິດ ສືບສວນ​ສອບ​ສວນ 6 ເປົ້າ​ໝາຍ​ທີ່​ກ່ຽວ​ພັນ​ເຖິງ​ກອງ​ທຶນ​ການ​ລົງທຶນ 1MDB

185 12 ກ.ກ. 2018 ຂ່າວຕ່າງປະເທດ
ສະ​ວິດ ສືບສວນ​ສອບ​ສວນ 6 ເປົ້າ​ໝາຍ​ທີ່​ກ່ຽວ​ພັນ​ເຖິງ​ກອງ​ທຶນ​ການ​ລົງທຶນ 1MDB

    ແຈ້ງ​ການ​ຂອງ​ຫ້ອງການ​ລັດຖະມົນຕີ​ກະຊວງ​ຍຸຕິ​ທຳ​ສະ​ວິດ ທີ່​ມີ​ອອກ​ມາ​ເມື່ອ​ວັນ​ທີ 10 ກໍລະກົດ​ນີ້ ໃຫ້​ຮູ້​ວ່າ ພວມ​ດຳເນີນ​ການ​ສືບສວນ​ສອບ​ສວນ​ຕໍ່ 6 ເປົ້າ​ໝາຍ ທີ່​ສົງ​ໃສ​ວ່າ​ໃຫ້​ສັນ​ບົນ ແກ່​ເຈົ້າ​ໜ້າທີ່​ຕ່າງປະເທດ ແລະ​ຕ້ອງ​ໂທດ​ອື່ນໆ​ອີກ​ບາງ​ເລື່ອງ ທີ່​ກ່ຽວ​ພັນ​ເຖິງ​ການ​ສືບສວນ​ສອບ​ສວນ ການ​ຟອກ​ເງິນ ຂອງ​ກອງ​ທຶນ​ການ​ລົງທຶນ​ແຫ່ງ​ລັດ​ມາ​ເລ​ເຊຍ (1MDB).

    ແຈ້ງ​ການ​ດັ່ງກ່າວ​ໃຫ້​ຮູ້​ວ່າ ອະດີດ​ນາຍົກລັດຖະມົນຕີ​ມາ​ເລ​ເຊຍ ນາ​ຈິບ ຣາ​ຊັກ ບໍ່​ໄດ້​ນອນ ຢູ່​ໃນ​ບັນດາ​ເປົ້າ​ໝາຍ​ດັ່ງກ່າວ. ຕາມ​ນັ້ນແລ້ວ 6 ເປົ້າ​ໝາຍ​ທີ່​ຖືກ​ສືບສວນ​ສອບ​ສວນ ປະກອບ​ມີ 2 ຄົນ ເປັນ​ອະດີດ​ເຈົ້າ​ໜ້າທີ່​ຂອງ 1MDB ຕະຫຼອດ​ຮອດ​ອະດີດ​ເຈົ້າ​ໜ້າທີ່ 2 ຄົນ ຂອງ​ກອງ​ທຶນ​ການ​ລົງທຶນ​ຂອງ​ນະຄອນ ອາ​ບູ ດາ​ບີ (ສະຫະລັດ ອາ​ຣັບ ເອ​ມີ​ເຣດ) ແລະ ອີກ 2 ຄົນ ເປັນ​ເຈົ້າ​ໜ້າທີ່​ຂອງ​ກຸ່ມ​ບໍລິສັດ​ພະລັງງານ Petrosaudi ຂອງ​ອາ​ຣາ​ບີ ຊາ​ອຸ​ດິດ.

    ແຈ້ງ​ການ​ດັ່ງກ່າວ​ມີ​ອອກ​ມາ ຫຼັງ​ຈາກ​ທີ່​ທ່ານ ໄມ​ເຄິນ ເລົາ​ເບີ ລັດຖະມົນຕີ​ຍຸຕິ​ທຳ​ຂອງ​ສະ​ວິດ ພົບ​ປະ​ກັບ​ທ່ານ ທອມ​ມີ ໂທ​ມາ​​ສ ລັດຖະມົນຕີ​ຍຸຕິ​ທຳ​ຂອງ​ມາ​ເລ​ເຊຍ ຢູ່​ທີ່​ນະຄອນຫຼວງ ກົວ​ລາ ລຳ​ເປີ (ມາ​ເລ​ເຊຍ).

    1MDB ເປັນ​ກອງ​ທຶນ​ການ​ລົງທຶນ ຊຶ່ງ​ອະດີດ​ນາຍົກລັດຖະມົນຕີ ນາ​ຈິບ ຣາ​ຊັກ ກໍ່​ຕັ້ງ​ຂຶ້ນ​ມາ ເມື່ອ​ປີ 2009 ເພື່ອ​ພັດທະນາ​ເສດຖະກິດ-ສັງຄົມ ໂດຍ​ຜ່ານ​ການ​ພົວພັນ​ຄູ່​ຮ່ວມ​ໃນ​ທົ່ວ​ໂລກ ແລະ​ການ​ລົງທຶນ​ໂດຍ​ກົງ​ຂອງ​ຕ່າງປະເທດ. ເຖິງ​ຢ່າງໃດ​ກໍ​ຕາມ ກອງ​ທຶນ​ດັ່ງກ່າວ ກາຍເປັນ​ຈຸດ​ໃຈ ກາງຂອງ​ກໍລະນີ​ຫຍຸ້ງ​ເຫຍືອງ ທີ່​ມີ​ເງິນ​ສູນຫາຍ​ໄປ 3,7 ຕື້​ໂດ​ລາ​ສະຫະລັດ ໂດຍ​ຖື​ວ່າ​ເປັນ​ເງິນ​ຈາກ ການ​ສໍ້​ລາດ​ບັງ​ຫຼວງ ແລະ​ໂອນ​ໄປ​ຍັງ​ຕ່າງປະເທດ ເພື່ອ​ເປັນ​ການ​ຟອກ​ເງິນ ອັນ​ໄດ້​ນຳໄປ​ສູ່​ການ ສືບສວນ​ສອບ​ສວນ ຫຼາຍ​ລາຍການ​ຢູ່​ໃນ​ບາງ​ປະເທດ ເຊັ່ນ ສ ອາ​ເມ​ຣິ​ກາ ສະ​ວິດ ສິງກະໂປ ມາ​ເລ​ເຊ​​ຍ ຈີນ ແລະ​ ອື່ນໆ.

    ອະດີດ​ນາຍົກລັດຖະມົນຕີ ນາ​ຈິບ ຣາ​ຊັກ ໄດ້​ຖືກ​ຄະນະ​ກຳມະການ​ຕ້ານ​ການ​ສໍ້​ລາດ​ບັງ​ຫຼວງ ຂອງ​ມາ​ເລ​ເຊຍ (MACC) ຈັບ​ຕົວ​ເມື່ອ​ວັນ​ທີ 3 ກໍລະກົດ​ທີ່​ຜ່ານ​ມາ ແລະ​ຖືກ​ສານ​ຊັ້ນ​ສູງ​ກົວ​ລາ ລຳ​ເປີ ໄຕ່​ສວນ ໃນ​ວັນ​ທີ 4 ກໍລະກົດ ດ້ວຍ 3 ກະ​ໂທງ ກ່ຽວ​ກັບ​ການ​ສວຍ​ໃຊ້​ຄວາມ​ເຊື່ອ​ຖື ແລະ​ອີກ 1 ກະ​ໂທງ ກ່ຽວ​ກັບ​ການ​ສວຍ​ໃຊ້​ອຳນາດ ດ້ວຍ​ຈຳນວນ​ເງິນ​ກວ່າ 10 ລ້ານ​ໂດ​ລາ​ສະຫະລັດ ທີ່​ພົວພັນ​ເຖິງ​ບໍລິສັດ​ລູກ​ແຫ່ງ​ໜຶ່ງ​ຂອງ 1MDB.

 

ຂ່າວທີ່ກ່ຽວຂ້ອງ