ຂ່າວຫຼ້າສຸດ

ອີ​ຣານ​ຢືນຢັນ​ສືບຕໍ່​ຂາຍ​ນ້ຳມັນ​ໂດຍ​ບໍ່​ເອົາ​ຫົວຊາ​ຕໍ່​ການ​ປິດ​ລ້ອມ​ຂອງ ສ ອາ​ເມ​ຣິ​ກາ

119 12 ກ.ກ. 2018 ຂ່າວຕ່າງປະເທດ
ອີ​ຣານ​ຢືນຢັນ​ສືບຕໍ່​ຂາຍ​ນ້ຳມັນ​ໂດຍ​ບໍ່​ເອົາ​ຫົວຊາ​ຕໍ່​ການ​ປິດ​ລ້ອມ​ຂອງ ສ ອາ​ເມ​ຣິ​ກາ

  ສຳນັກ​ຂ່າວສານ Fars ອ້າງ​ຕາມ​ຄຳ​ເວົ້າ​ຂອງ ທ່ານ ເອ​ຊັກ ຈາ​ຮັນ​ກີ​ຣີ ຮອງ​ປະທານາທິບໍດີ​ອີ​ຣານ  ທີ່​ກ່າວ​ເມື່ອ​ວັນ​ທີ 10 ກໍລະກົດ​ນີ້​ວ່າ ເຖິງ​ວ່າຄວາມ​ພະຍາຍາມ​ຂອງ ສ ອາ​ເມ​ຣິ​ກາ ເພື່ອ​ຫຼຸດຜ່ອນ​ປະລິມານ​ການ​ສົ່ງ​ອອກ​ນ້ຳມັນ​ຂອງ​ອີ​ຣານ ໃຫ້​ລົງ​ໄປ​ຢູ່​ທີ່​ຕົວ​ເລກ 0 ກໍ​ຕາມ ແຕ່​ວ່າ​ພວກ​ເຮົາ (ອີ​ຣານ) ຍັງ​ຈະ​ຂາຍ​ນ້ຳມັນ​ໃນ​ປະລິມານ​ຫຼາຍ​ທີ່​ສຸດ​ເທົ່າ​ທີ່​ສາມາດ​ເຮັດ​ໄດ້.

    ກ່ອນ​ໜ້າ​ນັ້ນ ທ່ານ ຊູ​ຮາຍ ອາ​​ລ-ມາ​ສຣູ​ເອ ປະທານ​ອົງການ​ບັນດາ​ປະເທດ​ຜູ້​ສົ່ງ​ອອກ​ນ້ຳມັນ (OPEC) ກ່າວ​ເມື່ອ​ວັນ​ທີ 9 ກໍລະກົດ ໂດຍ​ໄດ້​ປົກ​ປ້ອງ OPEC ທ່າມກາງ​ການ​ສະເໜີ​ຂອງ ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ທີ່​ໃຫ້​ເພີ່ມ​ປະລິມານ​ການ​ຜະລິດ​ນ້ຳມັນ. ທ່ານ ຊູ​ຮາຍ ອາ​​ລ-ມາ​ສຣູ​ເອ ໃຫ້​ສຳພາດ​ຂ່າວ​ຕໍ່​ສຳນັກ​ຂ່າວສານ​ຣອຍ​ເຕີ ວ່າ​ລຳພັງ​ພຽງ​ແຕ່ OPEC ຝ່າຍ​ດຽວ ແມ່ນ​ບໍ່​ສາມາດ​ທີ່​ຈະ​ຮັບຜິດຊອບ​ໃຫ້​ແກ່​ທຸກໆ​ບັນຫາ ທີ່​ພວມ​ເກີດ​ຂຶ້ນ​ຢູ່​ໃນ​ຂະແໜງການ​ອຸດ​ສາ​ຫະ ກຳ​ນ້ຳມັນ. OPEC ໄດ້​ມີ​ປະຕິກິລິຍາ​ທີ່​ເໝາະ​ສົມ ໂດຍ​ຜ່ານ​ມາດ​ຕະການ​ທີ່​ໄດ້​ປະຕິບັດ​ຢູ່​ໃນ ກອງ​ປະຊຸມ​ໃໝ່​ຫຼ້າ​ສຸດ​ຂອງ​ຕົນ ເມື່ອ​ເດືອນ​ມິຖຸນາ​ທີ່​ຜ່ານ​ມາ.

    ໃນ​ຂະນະ​ດຽວ​ກັນ ຂ່າວສານ​ຣອຍ​ເຕີ ກໍ​ລາຍ​ງານ​ວ່າ ທ່ານ ໄມ ພອມ​ພຽວ ລັດຖະມົນຕີ ການ​ຕ່າງປະເທດ ສ ອາ​ເມ​ຣິ​ກາ ຖະແຫຼງ​ເມື່ອ​ວັນ​ທີ 10 ກໍລະກົດ​ນີ້​ວ່າ ຈະ​ພິຈາລະນາ​ການ​ສະເໜີ ຂອງ​ບາງ​ປະເທດ ທີ່​ໄດ້​ຮັບ​ການ​ຍົກເວັ້ນ​ມາດ​ຕະການ​ປິດ​ລ້ອມ​ຂອງ ສ ອາ​ເມ​ຣິ​ກາ ທີ່​ມີ​ກຳນົດ ຈະ​ມີ​ຜົນ​ບັງຄັບ​ໃຊ້​ໃນ​ເດືອນ​ພະຈິກ​ທີ່​ຈະ​ມາ​ເຖິງ​ນີ້ ເພື່ອ​ສະກັດ​ກັ້ນ​ການ​ສົ່ງ​ອອກ​ນ້ຳມັນ​ຂອງ​ອີ​ຣານ.

    ປະທານາທິບໍດີ ທຣຳ ຖະແຫຼງ​ເມື່ອ​ເດືອນ​ພຶດສະພາ​ທີ່​ຜ່ານ​ມາ​ວ່າ ສ ອາ​ເມ​ຣິ​ກາ ຖອນ​ອອກ ຈາກ​ຂໍ້​ຕົກລົງ​ນີວ​ເຄລຍ​ທີ່​ລົງ​ນາມ​ກັບ​ອີ​ຣານ ຫຼື​ທີ່​ເອີ້ນ​ວ່າ​ແຜນການ​ດຳເນີນ​ງານ​ລວມ​ຮອບດ້ານ (JCPOA) ພ້ອມ​ທັງ​ກັບ​ໄປ​ປະຕິບັດ​ມາດ​ຕະການ​ປິດ​ລ້ອມ​ຕໍ່​ອີ​ຣານ ທີ່​ໄດ້​ຍົກເລີກ​ໄປ​ກ່ອນ​ໜ້າ​ນັ້ນ.

 

ຂ່າວທີ່ກ່ຽວຂ້ອງ