ຂະແໜງການ​ອຸດສາຫະກຳ​ນ້ຳຂອງ​ສິງກະໂປ ເຕີບ​ໂຕ​ກະໂດດ​ຂັ້ນ

208 12 ກ.ກ. 2018 ຂ່າວຕ່າງປະເທດ
ຂະແໜງການ​ອຸດສາຫະກຳ​ນ້ຳຂອງ​ສິງກະໂປ ເຕີບ​ໂຕ​ກະໂດດ​ຂັ້ນ

    ເມື່ອ​ບໍ່​ດົນ​ມາ​ນີ້ ອົງການ​ນ້ຳ​ແຫ່ງ​ຊາດ (PUB) ອົງການ​ພັດທະນາ​ເສດຖະກິດ (EDB) ແລະ​ອົງການ​ຊ່ວຍເຫຼືອ​ວິ​ສາ​ຫະ​ກິດ​ຂອງ​ສິງກະໂປ ໄດ້​ນຳ​ປະກາດ​ຕົວ​ເລກ​ຊີ້​ໃຫ້​ເຫັນ​ວ່າ ຂະແໜງການ ຂຸດ​ຄົ້ນ ແລະ ​ຄຸ້ມ​ຄອງ​ແຫຼ່ງ​ນ້ຳຂອງ​ສິງກະໂປ ໄດ້​ປະກອບສ່ວນ 2,5 ຕື້​ໂດ​ລາ​ສິງກະໂປ (ເທົ່າ​ກັບ 1,84 ຕື້​ໂດ​ລາ​ສະຫະລັດ) ໃຫ້​ແກ່​ພື້ນຖານ​ເສດຖະກິດ​ສິງກະໂປ ໃນ​ແຕ່​ລະ​ປີ ແລະ​ມາ​ຮອດ​ປັດຈຸບັນ ສ້າງ​ວຽກ​ເຮັດ​ງານ​ທຳ​ຂຶ້ນ​ມາ​ໄດ້ 14.400 ຕຳແໜ່ງ​ງານ.

    ຕົວ​ເລກ​ສະຖິຕິ ຊີ້​ແຈງ​ວ່າ ໃນ​ຊຸມ​ປີ​ທີ່​ຜ່ານ​ມາ ຂະແໜງການ​ອຸດສາຫະກຳ​ນ້ຳຂອງ​ສິງກະໂປ ມີ​ຄວາມ​ເຕີບ​ໂຕ​ກະໂດດ​ຂັ້ນ ແລະ ​ສ້າງ​ລະບົບ​ນິເວດ​ນ້ຳ​ທີ່​ເຂັ້ມແຂງ ແລະ​ເຮັດ​ໃຫ້​ສິງກະໂປ ກາຍເປັນ ສູນ​ກ່ຽວ​ກັບ​ນ້ຳ​ລະດັບ​ແຖວ​ໜ້າ​ຂອງ​ທົ່ວ​ໂລກ.

     ນັບ​ແຕ່​ປີ 2016 ເປັນຕົ້ນ​ມາ ຂະແໜງການ​ດັ່ງກ່າວ ໄດ້​ສ້າງ​ວຽກ​ເຮັດ​ງານ​ທຳ​ຂຶ້ນ​ມາ​ຕື່ມ  400 ຕຳແໜ່ງ​ງານ ແລະ ​ປະກອບສ່ວນ 300 ລ້ານ​ໂດ​ລາ​ສິງກະໂປ ເຂົ້າ​ໃນ​ພື້ນຖານ​ເສດຖະກິດ ຂອງ​ສິງກະໂປ.

    ຈາກ​ທີ່​ມີ​ກວ່າ 200 ບໍລິສັດ​ກ່ຽວ​ກັບ​ນ້ຳ ແລະ​ກວ່າ 25 ສະ​ຖາ​ບັນ​ການ​ຄົ້ນຄວ້າ​ນັ້ນ ຂະແໜງການ​ນ້ຳຂອງ​ສິງກະໂປ ສືບຕໍ່​ດຶງ​ດູດ​ການ​ລົງທຶນ​ຢ່າງ​ແຮງ ຈາກ​ທັງ​ພາຍ​ໃນ ແລະ​ ຕ່າງປະເທດ. ຄາດ​ວ່າ ແຕ່​ນີ້​ຮອດ​ປີ 2020 ຂະແໜງການ​ນ້ຳຂອງ​ສິງກະໂປ ຈະ​ສ້າງ​ວຽກ​ເຮັດ​ງານ​ທຳ ອອກ​ມາ 15.000 ຕຳແໜ່ງ​ງານ ແລະ ​ໃນ​ແຕ່​ລະ​ປີ ປະກອບສ່ວນ 2,85 ຕື້​ໂດ​ລາ​ສິງກະໂປ ເຂົ້າ​ໃນ​ພື້ນຖານ​ເສດຖະກິດ​ຂອງ​ສິງກະໂປ.

ຂ່າວທີ່ກ່ຽວຂ້ອງ