ລາວ-ທ໋ອບ ທຸ້ມງົບ 100 ລ້ານກີບ ລຸຍເຕະບານ ດີວິຊັນ 1

106 ວັນພະຫັດ ເວລາ 12:37 ວົງຈອນກີລາ
ລາວ-ທ໋ອບ ທຸ້ມງົບ 100 ລ້ານກີບ ລຸຍເຕະບານ ດີວິຊັນ 1

   ຕາມ​ການ​ໃຫ້​ສຳ­ພາດ​ຂອງ​ທ່ານ ພັນ ທະ­ວິ​ໄລ ປະ­ທານ​ສະ­ໂມ­ສອນ​ບານ­ເຕະ​ວິ­ທະ­ຍາ­ໄລ​ລາວ-ທ໋ອບ ເອ​ັຟ​ຊີ ທັງ​ເປັນ​ຮອງ​ຜູ້­ອຳ­ນວຍ­ການ​ວິ­ທະ­ຍາ­ໄລ​ດັ່ງ­ກ່າວ ໃຫ້​ຊາບ​ວ່າ: ພາຍ­ຫຼັງ​ທີ່​ໄດ້​ມີ​ການ​ແຈ້ງ​ການ​ເຖິງ​ບັນ­ດາ​ນັກ­ກີ­ລາ​ໃນ​ທົ່ວ​ນະ­ຄອນ­ຫຼວງ​ວຽງ​ຈັນ ເພື່ອ​ຮັບ​ຮູ້​ກ່ຽວ​ກັບ​ແຜນ­ການ​ຄັດ​ເລືອກ​ນັກ­ກີ­ລາ​ຂອງ​ວິ­ທະ­ຍາ­ໄລ​ພວກ​ເຮົາ ເພື່ອ​ກຽມ​ສົ່ງ​ເຂົ້າ​ຮ່ວມ​ແຂ່ງ­ຂັນ​ເຕະ­ບານ​ສາຍ ກ 2018 ຫຼື ດີ​ວິ​ຊັນ 1 ກໍ່​ມີ​ນັກ­ກີ­ລາ​ເຂົ້າ​ຮ່ວມ​ຄັດ​ຕົວ­ຢ່າງ​ຫຼວງ­ຫຼາຍ ແລະ ສຸດ​ທ້າຍ​ກໍ່​ສາ­ມາດ​ເລືອກ​ໄດ້​ຈຳ­ນວນ​ຕົວ​ເລກ​ຕົວ​ຈິງ 25 ຄົນ ແລະ ຄູ​ເຝິກ​ອີກ 5 ຄົນ ລວມ​ທັງ​ໝົດ 30 ຄົນ.

   ຫຼັງ​ຈາກ​ນັ້ນ ກໍ່​ໄດ້​ຈັດ​ໃຫ້​ມີ​ການ­ເຄື່ອນ­ໄຫວ​ທົດ​ສອບ​ຄວາມ​ສາ­ມາດ​ນັກ­ກີ­ລາ​ເຖິງ 3 ນັດ ເຊິ່ງ​ນັດ​ທຳ​ອິດ​ລົງ​ສະ­ໜາມ​ອຸ່ນ​ເຄື່ອງ​ກັບ ທີມ​ທີ​ທີ ແລະ ທີມ​ລາວ-ທ໋ອບ ຕ້ານ​ຄວາມ​ແຂງ​ແກ່ນ​ເຂົາ­ເຈົ້າ​ບໍ່​ໄຫວ​ເສຍ​ໄປ 0-3 ປະ­ຕູ ສ່ວນ​ການ​ອຸ່ນ​ເຄື່ອງ​ອີກ 2 ນັດ ສາ­ມາດ​ເອົາ​ຊະ­ນະ​ທີມ​ສະ​ຖາ​ບັນ​ບຸນ​ເກີດ​ສຶກ​ສາ  ໄປ​ແບບ​ຫວຸດ​ຫວິດ 1-0 ປະ­ຕູ ແລະ ນັດ​ສຸດ​ທ້າຍ ເອົາ​ຊະ­ນະ ສະ­ໂມ­ສອນ​ເຄ​ພີ​ເອ​ັສ ທີມ​ທີ່​ຈະ​ເຂົ້າ​ຮ່ວມ​ແຂ່ງ­ຂັນ ລີກ​ສາຍ ກ ຄື​ກັນ ເຖິງ 4-0 ປະ­ຕູ ໃນ­ຕໍ່­ໜ້າ​ຍັງ​ມີ​ແຜນ​ຈະ​ລົງ​ສະ­ໜາມ​ອຸ່ນ​ເຄື່ອງ​ອີກ​ຈັກ 1-2 ນັດ ເພື່ອ​ຮັບ­ປະ­ກັນ​ໃນ​ການ​ກຽມ​ຄວາມ​ພ້ອມ​ນັກ­ກີ­ລາ ນັບ​ມາ​ຮອດ​ປັດ­ຈຸ­ບັນ​ສາ­ມາດ​ປະ​ເມີນ​ຕີ​ລາ­ຄາ​ທີມ​ພວກ​ເຮົາ​ມີ​ຄວາມ​ພ້ອມ​ແລ້ວ.

   ປະ­ທານ​ສະ­ໂມ­ສອນ​ກ່າວ​ຕື່ມ​ອີ​ກວ່າ: ໃນ​ການ​ສ້າງ​ທີມ​ໃນ​ຊຸດ​ນີ້ ແມ່ນ​ໄດ້​ນຳ​ໃຊ້​ງົບ­ປະ­ມານ​ຂອງ​ວິ­ທະ­ຍາ­ໄລ​ເອງ 100% ໃນ​ເບື້ອງ​ຕົ້ນ​ແມ່ນ 100 ລ້ານ​ກີບ ເຊິ່ງ​ມີ​ເປົ້າ​ໝາຍ​ຫຼັກ​ຈະ​ພະ­ຍາ­ຍາມ​ສູ້​ຊົນ​ພາ​ທີມ​ສ້າງ​ຜົນ­ງານ​ຕິດ 1 ໃນ 4 ໃນ​ການ​ແຂ່ງ­ຂັນ​ເຕະ­ບານ ສາຍ ກ ທີ່​ຈະ​ຈັດ​ຂຶ້ນ​ໃນ​ເດືອນ​ສິງ­ຫາ​ນີ້ ເພື່ອ​ສ້າງ​ເງື່ອນ­ໄຂ​ພາ​ທີມ​ກ້າວ​ຂຶ້ນ​ໄປ​ຫຼິ້ນ​ໃນ​ລີກ​ສູງ​ສຸດ​ຂອງ ສປປ ລາວ ຫຼື ລາຍ­ການ ເປບ​ຊີ ລາວ ພຣີ​ເມຍ​ລີກ 2019 ອີກ​ດ້ານ​ໜຶ່ງ ກໍ່​ຫວັງ​ຈະ​ສ້າງ​ນັກ­ກີ­ລາ​ບາງ​ຈຳ­ນວນ ສາ­ມາດ​ຮັບ​ໃຊ້​ບັນ­ດາ​ພາກ­ສ່ວນ​ຕ່າງໆ ເປັນ­ຕົ້ນ​ແມ່ນ​ຕາງ­ໜ້າ​ນະ­ຄອນ­ຫຼວງ​ວຽງ​ຈັນ ເຂົ້າ​ຮ່ວມ​ແຂ່ງ­ຂັນ​ງານ​ກີ­ລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ໃນ​ທ້າຍ​ປີ​ນີ້ ແລະ ຕາງ­ໜ້າ​ສະ­ມາ­ຄົມ​ການ​ສຶກ​ສາ​ພາກ​ເອ­ກະ​ຊົນ​ລາວ ເຂົ້າ​ຮ່ວມ​ງານ​ກີ­ລາ​ມະ­ຫາ­ວິ­ທະ­ຍາ­ໄລ​ລາວ ຈະ​ຈັດ​ຂຶ້ນ​ທີ່​ແຂວງ​ຈຳ­ປາ​ສັກ ເປັນ​ເຈົ້າ­ພາບ ໃນ​ປີ 2019 ນີ້.

ຂ່າວທີ່ກ່ຽວຂ້ອງ