ຮ່ວມແຮງຮ່ວມໃຈ ຄຸ້ມຄອງ ປົກປັກຮັກສາ ພັດທະນາ ສັດນ້ຳ ສັດປ່າ ໃຫ້ຫຼາຍຂຶ້ນ

142 ວັນພະຫັດ ເວລາ 09:51 ຂ່າວໜ້າ​ໜຶ່ງ
ຮ່ວມແຮງຮ່ວມໃຈ ຄຸ້ມຄອງ ປົກປັກຮັກສາ ພັດທະນາ ສັດນ້ຳ ສັດປ່າ ໃຫ້ຫຼາຍຂຶ້ນ

   ເພື່ອ​ສ້າງ​ຂະ​ບວນ​ການ ພ້ອມ​ທັງ​ປູກ​ຈິດ​ສຳ­ນຶກ​ໃຫ້​ທົ່ວ​ສັງ­ຄົມ ເນື່ອງ​ໃນ​ໂອ­ກາດ​ວັນ​ປ່ອຍ​ປາ ແລະ ອະ­ນຸ​ຮັກ​ສັດ​ນ້ຳ-ສັດ­ປ່າ​ແຫ່ງ​ຊາດ​ປີ​ນີ້ ກະ­ຊວງ​ກະ­ສິ­ກຳ ແລະ ປ່າ­ໄມ້  ໄດ້​ສົມ­ທົບ​ກັບ​ຄະ­ນະ​ພັກ ອົງ­ການ​ປົກ­ຄອງ​ທ້ອງ­ຖິ່ນ​ທົ່ວ​ປະ­ເທດ ກຽມ​ແຜນ­ການ ແລະ ຂະ​ບວນ​ປ່ອຍ​ປາ ໃຫ້​ເປັນ​ຂະ​ບວນ​ຟົດ­ຟື້ນ ຄາດ­ໝາຍ​ວ່າ ແຕ່​ລະ​ທ້ອງ­ຖິ່ນ​ໃນ​ຂອບ​ເຂດ​ທົ່ວ​ປະ­ເທດ​ຈະ​ປ່ອຍ​ປາ ຈຳ­ນວນ 45 ລ້ານ​ໂຕ ລົງ​ໃສ່​ແຫຼ່ງ​ນ້ຳ​ທຳ​ມະ​ຊາດ ເຊັ່ນ: ແມ່­ນ້ຳ​ຂອງ ແລະ ແມ່­ນ້ຳ​ສາ­ຂາ ອ່າງ­ເກັບ­ນ້ຳ​ເຂື່ອນ​ໄຟ­ຟ້າ ອ່າງ­ເກັບ­ນ້ຳ​ຊົນ­ລະ­ປະ­ທານ ໜອງ ແລະ ບຶງ​ທຳ​ມະ​ຊາດ ໜອງ​ປາ​ຊຸມ​ຊົນ ແລະ ດິນ​ບໍ­ລິ­ເວນ​ນ້ຳ​ປະ­ເພດ​ຕ່າງໆ.

   ໃນ​ວັນ​ທີ 11 ກໍ­ລະ­ກົດ 2018 ທີ່​ກະ­ຊວງ​ກະ­ສິ­ກຳ ແລະ ປ່າ­ໄມ້ ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ຖະ­ແຫຼງ​ຂ່າວ​ຕໍ່​ສື່​ມວນ​ຊົນ ໃນ​ໂອ­ກາດ​ວັນ​ປ່ອຍ​ປາ ແລະ ອະ­ນຸ​ຮັກ​ສັດ​ນ້ຳ-ສັດ­ປ່າ​ແຫ່ງ​ຊາດ ວັນ​ທີ 13 ກໍ­ລະ­ກົດ 2018 ນີ້​ວ່າ: ພັກ ແລະ ລັດ­ຖະ­ບານ ກຳ­ນົດ​ເອົາ  ວັນ​ທີ 13 ກໍ­ລະ­ກົດ ຂອງ​ທຸກ​ປີ ເປັນ​ວັນ ປ່ອຍ​ປາ ແລະ ອະ­ນຸ​ຮັກ​ສັດ​ນ້ຳ-ສັດ­ປ່າ​ແຫ່ງ​ຊາດ ເພື່ອ​ປູກ​ຈິດ​ສຳ­ນຶກ​ໃຫ້​ແກ່​ເຍົາ­ວະ​ຊົນ ແລະ ອະ­ນຸ­ຊົນ​ລຸ້ນ​ຫຼັງ ກໍ່​ຄື​ທົ່ວ​ສັງ­ຄົມ ໃຫ້​ເຫັນ​ໄດ້​ຄວາມ​ສຳ­ຄັນ​ຂອງ​ສັດ​ນ້ຳ-ສັດ­ປ່າ.

   ຄື​ດັ່ງ​ທີ່​ພວກ​ເຮົາ​ຮູ້​ແລ້ວ​ວ່າ ສປປ ລາວ ເຮົາ​ເປັນ​ປະ­ເທດ​ໜຶ່ງ ທີ່​ອຸ­ດົມ​ຮັ່ງ­ມີ ໄປ​ດ້ວຍ​ຊັບ­ພະ­ຍາ­ກອນ​ທຳ​ມະ ຊາດ ຊັບ​ໃນ​ດິນ ສິນ​ໃນ​ນ້ຳ ມີ​ຊະ­ນິດ​ພັນ​ປາ​ພື້ນ­ເມືອງ​ຫຼາຍ 500 ກວ່າ​ຊະ­ນິດ ເປັນ​ບ່ອນ​ອາ­ໄສ​ຂອງ​ສັດ­ປ່າ​ທີ່​ຫາ​ຍາກ ແລະ ໃກ້​ຈະ​ສູນ­ພັນ​ຂອງ​ໂລກ ເຊັ່ນ: ໂຕ​ເສົາ​ລາ ໂຕ​ຂະ​ຍຸ ຊ້າງ ເສືອ­ໂຄ່ງ  ແລະ ສັດ­ປ່າ​ຊະ­ນິດ​ອື່ນໆ ສັດ ນ້ຳ-ສັດ­ປ່າ​ດັ່ງ­ກ່າວ ແມ່ນ​ມີ​ຄວາມ​ສຳ­ຄັນ​ຕໍ່​ການ​ຮັກ­ສາ​ຄວາມ​ອຸ­ດົມ­ສົມ­ບູນ ຄວາມ​ສົມ​ດູນ​ຂອງ​ລະ­ບົບ​ນິ­ເວດ​ໃນ​ທຳ​ມະ​ຊາດ ເປັນ​ມໍ­ລະ­ດົກ​ທາງ​ທຳ​ມະ​ຊາດ​ອັນ​ລ້ຳ​ຄ່າ​ຂອງ​ຊາດ ທັງ​ເປັນ​ທ່າ­ແຮງ​ໃຫ້​ແກ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ເປັນ​ເງື່ອນ­ໄຂ​ທີ່​ດີ​ໃຫ້​ແກ່​ປະ­ຊາ­ຊົນ​ລາວ​ບັນ­ດາ­ເຜົ່າ ໄດ້​ນຳ​ໃຊ້​ຊັບ­ພະ­ຍາ­ກອນ​ທຳ​ມະ​ຊາດ​ເຫຼົ່າ­ນັ້ນ​ເຂົ້າ​ໃນ​ການ​ຜະ­ລິດ ແລະ ການ​ດຳ­ລົງ​ຊີ­ວິດ ເພື່ອ​ຍົກ​ສູງ​ຄຸ­ນະ­ພາບ​ຊີ­ວິດ​ໃຫ້​ດີ​ຂຶ້ນ.

   ຍ້ອນ​ເຫັນ​ໄດ້​ບົດ­ບາດ​ສຳ­ຄັນ​ຂອງ​ສັດ​ນ້ຳ-ສັດ­ປ່າ​ຄື​ດັ່ງ­ກ່າວ ພັກ ແລະ ລັດ­ຖະ­ບານ ຈຶ່ງ​ໄດ້​ກຳ­ນົດ​ເອົາ​ວັນ​ທີ 13 ກໍ­ລະ­ກົດ​ຂອງ​ທຸກ​ປີ ເປັນ​ວັນ​ປ່ອຍ​ປາ ແລະ ອະ­ນຸ​ຮັກ​ສັດ​ນ້ຳ-ສັດ­ປ່າ​ແຫ່ງ​ຊາດ  ເຊິ່ງ​ກົງ​ກັບ​ວັນ​ຄ້າຍ​ວັນ​ເກີດ​ຂອງ​ປະ ທານ ສຸ​ພາ­ນຸ​ວົງ ກໍ່​ເພື່ອ ປະ­ການ​ທີ​ໜຶ່ງ: ເປັນ​ການ​ຈົດ​ຈຳ​ລ້ຳ​ລຶກ​ຄຸນ­ງາມ­ຄວາມ­ດີ ແລະ ຜົນ­ງານ​ອັນ​ໃຫຍ່​ຫຼວງ​ຂອງ​ປະ­ທານ ສຸ​ພາ­ນຸ​ວົງ ທີ່​ໄດ້​ອຸ­ທິດ​ໃຫ້​ແກ່​ພາ­ລະ­ກິດ​ແຫ່ງ​ການ​ຕໍ່­ສູ້​ກູ້​ຊາດ ກໍ່​ຄື ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ​ຂອງ​ພວກ​ເຮົາ ປະ­ການ​ທີ​ສອງ: ເປັນ​ການ​ປູກ​ຈິດ​ສຳ­ນຶກ​ໃຫ້​ແກ່​ອະ­ນຸ­ຊົນ ເຍົາ­ວະ​ຊົນ​ຂອງ​ຊາດ ກໍ່​ຄື​ລູກ​ຫຼານ​ຜູ້​ເກີດ​ໃໝ່​ໃຫ່​ຍ​ລຸນ ໃຫ້​ມີ​ສະ­ຕິ ຮັກ ແລະ ຫວງ​ແຫນ ສັດ​ນ້ຳ ແລະ ສັດ­ປ່າ ແລະ ທັງ​ເປັນ​ການ​ປຸກ­ລະ­ດົມ​ທົ່ວ​ປວງ​ຊົນ ເຂົ້າ​ຮ່ວມ​ໃນ​ການ​ຄຸ້ມ​ຄອງ ປົກ​ປັກ​ຮັກ­ສາ ພັດ­ທະ­ນາ ແລະ ນຳ​ໃຊ້ ສັດ​ນ້ຳ ແລະ ສັດ­ປ່າ ແນ­ໃສ່​ເຮັດ​ໃຫ້​ປະ­ຊາ­ກອນ​ສັດ​ນັບ​ມື້​ມີ​ຄວາມ​ອຸ­ດົມ­ສົມ­ບູນ ແລະ ກາຍ­ເປັນ​ທ່າ­ແຮງ​ໃນ​ການ​ຄ້ຳ­ປະ­ກັນ​ດ້ານ​ສະ­ບຽງ​ອາ­ຫານ ໂພ­ຊະ​ນາ​ການ ກໍ່​ຄື ການ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໃຫ້​ນັບ​ມື້​ດີ​ຂຶ້ນ.

   ເນື່ອງ​ໃນ​ໂອ­ກາດ ວັນ​ປ່ອຍ​ປາ ແລະ ອະ­ນຸ​ຮັກ​ສັດ​ນ້ຳ-ສັດ­ປ່າ​ແຫ່ງ​ຊາດ ວັນ​ທີ 13 ກໍ­ລະ­ກົດ 2018 ປີ​ນີ້ ກະ­ຊວງ​ກະ­ສິ­ກຳ ແລະ ປ່າ­ໄມ້  ຢູ່​ນະ­ຄອນ­ຫຼວງ ຈະ​ຈັດ​ຕັ້ງ​ການ​ປ່ອຍ​ປາ ດັ່ງ­ນີ້:

   - ວັນ​ທີ 13/7/2018 ກະ­ຊວງ​ກະ­ສິ­ກຳ ແລະ ປ່າ­ໄມ້ ຮ່ວມ​ກັບ​ນະ­ຄອນ­ຫຼວງ​ວຽງ​ຈັນ ຈັດ​ພິ­ທີ​ປ່ອຍ​ປາ ທີ່​ອ່າງ ນ້ຳ​ຫຸມ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ.

   - ສຳ­ລັບ​ບັນ­ດາ​ພະ​ແນກ​ກະ­ສິ­ກຳ ແລະ ປ່າ­ໄມ້​ແຂວງ ແລະ ເມືອງ ໃນ​ທົ່ວ​ປະ­ເທດ ກໍ່​ມີ​ແຜນ­ການ​ປ່ອຍ​ປາ ຢູ່​ທ້ອງ­ຖິ່ນ​ຕົນ.

   ສະ­ນັ້ນ ເນື່ອງ​ໃນ​ໂອ­ກາດ​ການ​ສະ­ເຫຼີມ­ສະ­ຫຼອງ ວັນ​ອະ­ນຸ​ຮັກ​ສັດ​ນ້ຳ​ສັດ­ປ່າ​ແຫ່ງ​ຊາດ ວັນ​ທີ 13 ກໍ­ລະ­ກົດ 2018 ນີ້ ຂ້າ­ພະ­ເຈົ້າ ຂໍ​ຮຽກ­ຮ້ອງ​ມາ​ຍັງ​ພາກ­ສ່ວນ​ຕ່າງໆ ທັງ​ພາກ​ລັດ ແລະ ເອ­ກະ​ຊົນ ໃນ​ທົ່ວ​ສັງ­ຄົມ ຈົ່ງ​ພ້ອມ​ກັນ​ຮ່ວມ​ແຮງ​ຮ່ວມ​ໃຈ ຄຸ້ມ​ຄອງ ປົກ​ປັກ​ຮັກ­ສາ ພັດ­ທະ­ນາ ສັດ​ນໍ້້​າ ແນ­ໃສ່​ເພີ່ມ​ຄວາມ​ອຸ­ດົມ­ສົມ­ບູນ​ທາງ​ດ້ານ​ຊະ­ນິດ​ພັນ ແລະ ຈຳ­ນວນ​ປະ­ຊາ­ກອນ​ຂອງ​ສັດ​ນ້ຳ ແລະ ສັດ­ປ່າ ທີ່​ເປັນ​ມໍ­ລະ­ດົກ​ທາງ​ທຳ​ມະ​ຊາດ​ອັນ​ລ້ຳ​ຄ່າ​ຂອງ​ຊາດ ໃຫ້​ໄດ້​ຮັບ​ການ​ປົກ​ປັກ​ຮັກ­ສາ ຊົມ­ໃຊ້​ແບບ​ຍືນ​ນານ ແລະ ເປັນ​ມູນ​ມໍ­ລະ­ດົກ​ຕົກ​ທອດ​ຮອດ​ເຊັ່ນ​ລູກ​ເຊັ່ນ​ຫຼານ​ຂອງ​ພວກ​ເຮົາ​ຕະ­ຫຼອດ​ໄປ.

ຂ່າວທີ່ກ່ຽວຂ້ອງ