ຂ່າວຫຼ້າສຸດ

ຊາວໜຸ່ມເຍົາວະຊົນ ສະແດງຄວາມຮູ້ບຸນຄຸນຕໍ່ປະທານ ສຸພານຸວົງ

213 12 ກ.ກ. 2018 ຂ່າວໜ້າ​ໜຶ່ງ
ຊາວໜຸ່ມເຍົາວະຊົນ ສະແດງຄວາມຮູ້ບຸນຄຸນຕໍ່ປະທານ ສຸພານຸວົງ

   ປະ­ທານ ສຸ​ພາ­ນຸ​ວົງ ຜູ້­ນຳ​ທີ່​ແສນ​ເຄົາ­ລົບ​ຮັກ​ຂອງ​ປວງ​ຊົນ​ລາວ​ທັງ​ຊາດ ເປັນ​ຜູ້­ນຳ​ທີ່​ສະ­ຫຼາດ​ສ່ອງ​ໃສ​ທີ່​ຍາມ​ໃດ​ກໍ່​ເອົາ​ຄວາມ­ສຸກ ແລະ ປະ­ໂຫຍດ​ສ່ວນ​ລວມ​ຫຼາຍ​ກວ່າ​ສ່ວນ​ຕົວ ຍອມ​ເສຍ­ສະ­ຫຼະ​ຄວາມ­ສຸກ​ຄວາມ​ສະ­ບາຍ ເພື່ອ​ສະ­ແຫວງ­ຫາ​ເສັ້ນ­ທາງ​ອັນ​ສະ­ຫວ່າງ​ສ່ອງ​ໃສ ນຳ­ພາ​ປະ­ເທດ​ຊາດ​ໃຫ້​ຮຸ່ງ­ເຮືອງ​ສີ­ວິ­ໄລ ປະ­ທານ  ສຸ​ພາ­ນຸ​ວົງ ເປັນ​ກະ­ສັດ ເປັນ​ວິ­ລະ​ບຸ­ລຸດ​ທີ່​ມີ​ແບບ­ແຜນ​ການ​ດຳ­ລົງ​ຊີ­ວິດ​ທີ່​ລຽບ​ງ່າຍ ປະ­ຢັດ​ມັດ­ທະ­ຍັດ ແລະ ມີ​ສິນ​ທຳ​ປະ­ຕິ­ວັດ​ອັນ​ສູງ​ສົ່ງ ທ່ານ​ໄດ້​ສຸມ​ໃສ່​ທຸກ​ກຳ­ລັງ​ເຫື່ອ­ແຮງ ແລະ ສະ­ຕິ​ປັນ­ຍາ ເຂົ້າ​ໃນ​ຂະ​ບວນ​ການ​ຕໍ່­ສູ້​ປົດ​ປ່ອຍ­ປະ​ເທດ​ຊາດ ຄ່ຽງ​ບ່າ​ຄ່ຽງ​ໄລ່​ກັບ​ປະ­ຊາ­ຊົນ​ບັນ­ດາ­ເຜົ່າ ຕີ​ຕ້ານ​ສັດ­ຕູ​ຜູ້​ມາ​ຮຸກ​ຮານ ອັນ​ໄດ້​ເຮັດ​ໃຫ້​ປະ­ເທດ​ຊາດ​ໄດ້​ຮັບ​ການ​ປົດ​ປ່ອຍ ແລະ ສ້າງ­ສາ​ພັດ­ທະ­ນາ​ປະ­ເທດ​ລາວ​ໃຫ້​ຈະ​ເລິນ​ສີ­ວິ­ໄລ​ເປັນ​ກ້າວໆ.

   ວັນ​ທີ 11 ກໍ­ລະ­ກົດ 2018 ທ່ານ ອະ­ນຸ­ສອນ ວົງ​ຄຳ​ສອນ ຮອງ​ເລ­ຂາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ ປປລ ນະ­ຄອນ­ຫຼວງ​ວຽງ​ຈັນ ໄດ້​ນຳ­ພາ​ຊາວ​ໜຸ່ມ-ເຍົາ­ວະ​ຊົນ ໄປ​ທັດ­ສະ­ນະ​ສຶກ​ສາ ແລະ ວາງ​ກະ­ຕ່າ​ດອກ​ໄມ້  ເພື່ອ​ສະ­ແດງ​ຄວາມ​ຮູ້​ບຸນ­ຄຸນ​ຕໍ່​ປະ­ທານ ສຸ​ພາ­ນຸ​ວົງ ຢູ່​ທີ່​ອະ­ນຸ­ສອນ​ສະ­ຖານ ປະ­ທານ ສຸ​ພາ­ນຸ​ວົງ ເນື່ອງ​ໃນ​ວັນ​ຄ້າຍ​ວັນ​ເກີດ​ຂອງ​ທ່ານ​ທີ່​ໄດ້​ໝູ­ນວຽນ​ມາ​ ຄົບ­ຮອບ 109 ປີ (13.7.1909-13.7.2018).

   ໂອ­ກາດ​ນີ້ ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ ປປລ ນະ­ຄອນ­ຫຼວງ​ວຽງ​ຈັນ  ຍັງ​ໄດ້​ກ່າວ​ປະ­ຕິ­ຍານ​ວ່າ: ຈະ​ສືບ​ທອດ​ພາ­ລະ­ກິດ​ອັນ​ລ້ຳ​ຄ່າ ຄຸນ­ງາມ­ຄວາມ­ດີ ຕະ­ຫຼອດ​ຮອດ​ແບບ­ແຜນ​ການ​ດຳ­ລົງ​ຊີ­ວິດ ແລະ ພຶດ­ຕິ​ກຳ​ຕົວ​ຈິງ​ຂອງ​ປະ­ທານ ໃຫ້​ຖັນ​ແຖວ​ຊາວ​ໜຸ່ມ-ເຍົາ­ວະ​ຊົນ ໄດ້​ເຊື່ອມ​ຊຶມ​ຮັບ​ຮູ້ ແລະ ປະ­ຕິ­ບັດ​ຕາມ​ເສັ້ນ­ທາງ​ເດີນ​ຂອງ​ທ່ານ​ວາງ​ໄວ້​ທຸກ​ປະ­ການ.

ຂ່າວທີ່ກ່ຽວຂ້ອງ