ຂ່າວຫຼ້າສຸດ

ຍີ່ປຸ່ນ ສົ່ງອາສາສະໝັກ JICA ມາຖ່າຍທອດວິຊາຄວາມຮູ້

240 12 ກ.ກ. 2018 ຂ່າວໜ້າ​ໜຶ່ງ

   ສະ­ຖານ­ທູດ​ຍີ່­ປຸ່ນ ປະ­ຈຳ​ລາວ ຈັດ​ພິ­ທີ​ຕ້ອນ­ຮັບ​ອາ­ສາ​ສະ­ໝັກ​ຊຸດ​ໃໝ່​ຈາກ​ປະ­ເທດ​ຍີ່­ປຸ່ນ  (ອາ­ສາ​ສະ­ໝັກ JICA) ທີ່​ສົ່ງ​ເຮັດ​ວຽກ ຈຳ­ນວນ 9  ທ່ານ ເປັນ​ເວ­ລາ  2 ປີ ເພື່ອ​ສະ­ໜັບ​ໜູນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ຢູ່ ສປປ ລາວ ໃນ​ວັນ​ທີ 11  ກໍ­ລະ­ກົດ 2018 ທີ່​ສະ­ຖານ­ທູດ​ຍີ່­ປຸ່ນ ປະ­ຈຳ​ລາວ  ໂດຍ​ມີ​ທ່ານ ທາ​ເຄ​ຊິ ຮິ​ຄິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ ປະ­ຈຳ​ລາວ ທ່ານ​ນາງ ສີ​ສົມ­ບູນ ອຸ່ນ​ນະ​ວົງ ຫົວ­ໜ້າ​ກົມ​ຮ່ວມ​ມື​ສາ­ກົນ ກະ­ຊວງ​ແຜນ­ການ ແລະ ການ​ລົງ­ທຶນ ຜູ້­ຕາງ­ໜ້າ​ຈາກ​ອົງ­ການ JICA ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ທາ​ເຄ​ຊິ ຮິ​ຄິ​ຮາ​ຣະ  ກ່າວ​ວ່າ: ລັດ­ຖະ­ບານ​ຍີ່­ປຸ່ນ ກໍ່​ຄື ອົງ­ການ JICA ໄດ້​ສືບ­ຕໍ່​ຂົນ­ຂວາຍ​ເອົາ​ອາ­ສາ​ສະ­ໝັກ​ຊຸດ​ໃໝ່​ມາ​ປະ­ຕິ­ບັດ​ການ​ເຮັດ​ວຽກ​ຕ່າງໆ​ຢູ່ ສປປ ລາວ  ເຊິ່ງ​ອາ­ສາ​ສະ­ໝັກ​ຈຳ­ນວນ​ດັ່ງ­ກ່າວ ຈະ​ຖືກ​ສົ່ງ​ໄປ​ປະ­ຈຳ­ການ​ຢູ່​ແຂວງ​ຕ່າງໆ ໃນ​ນີ້ ມີ​ນະ­ຄອນ­ຫຼວງ​ວຽງ​ຈັນ 4 ທ່ານ ແຂວງ​ຫຼວງ​ພະ​ບາງ ວຽງ​ຈັນ ໄຊ​ຍະ​ບູ​ລີ ອຸ­ດົມ​ໄຊ ແລະ ແຂວງ​ຄຳ​ມ່ວນ ຈຳ­ນວນ​ແຂວງ​ລະ 1 ທ່ານ ສະ­ນັ້ນ ເມື່ອ​ລວມ​ຈຳ­ນວນ​ອາ­ສາ​ສະ­ໝັກ​ຊຸດ​ໃໝ່​ຂອງ​ເດືອນ​ນີ້ ກັບ​ອາ­ສາ​ສະ­ໝັກ​ທີ່​ກຳ­ລັງ​ເຮັດ​ວຽກ​ກັບ​ຄູ່​ງານ​ລາວ​ທົ່ວ​ປະ­ເທດ ປັດ­ຈຸ­ບັນ​ມີ​ທັງ​ໝົດ 51 ຄົນ (ອາ­ສາ​ສະ­ໝັກ​ຊາວ​ໜຸ່ມ 44 ທ່ານ ແລະ ອາ­ວຸ­ໂສ 7 ທ່ານ) ເຊິ່ງ​ນັບ​ແຕ່​ປີ 1965 ອາ­ສາ​ສະ­ໝັກ JICA ທີ່​ມາ​ເຮັດ​ວຽກ​ຢູ່​ລາວ​ຈຳ­ນວນ 987 ທ່ານ ແລະ ໃນ​ຫຼາຍ​ຂະ­ແໜງ­ການ ເຊັ່ນ: ສາ­ທາ­ລະ­ນະ​ສຸກ ການ​ສຶກ​ສາ ກະ­ສິ­ກຳ ວິ​ສາ​ວະ​ກຳ ການ​ກີ­ລາ ແລະ ການ​ພັດ­ທະ­ນາ​ຊຸມ​ຊົນ.

   ສຳ­ລັບ​ອາ­ສາ​ສະ­ໝັກ​ກຸ່ມ​ນີ້​ຈະ​ສືບ­ຕໍ່​ຊ່ວຍ­ເຫຼືອ ເສີມ​ຂະ­ຫຍາຍ​ມິດ­ຕະ­ພາບ ແລະ ຄວາມ​ເຂົ້າ­ໃຈ​ລະ­ຫວ່າງ​ສອງ​ປະ­ເທດ ຜ່ານ​ການ​ຖ່າຍ​ທອດ​ວິ­ຊາ​ຄວາມ​ຮູ້ ຄວາມ​ສາ­ມາດ ແລະ ແລກ­ປ່ຽນ​ປະ­ສົບ​ການ​ເຊິ່ງ​ກັນ ແລະ ກັນ ເປັນ​ການ​ຢັ້ງ­ຢືນ​ເຖິງ​ຄວາມ​ບຸກ​ບືນ​ພະ­ຍາ­ຍາມ​ຂອງ​ລັດ­ຖະ­ບານ​ຍີ່­ປຸ່ນ ໃນ​ການ​ດຳ­ເນີນ​ການ​ຊຸກ­ຍູ້​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ສປປ ລາວ ໃຫ້​ເຕີບ​ໃຫຍ່​ເຂັ້ມ­ແຂງ​ຍິ່ງ​ຂຶ້ນ​ທຽບ​ເທົ່າ​ກັບ​ພາກ​ພື້ນ ແລະ ສາ­ກົນ.

ຂ່າວທີ່ກ່ຽວຂ້ອງ