ຂ່າວຫຼ້າສຸດ

ແຈ້ງເຕືອນ ຈະມີຝົນຕົກແຮງຢູ່ທຸກພາກ

246 12 ກ.ກ. 2018 ຂ່າວໜ້າ​ໜຶ່ງ

   ເນື່ອງ​ຈາກ​ຄວາມ​ກົດ​ດັນ​ອາ­ກາດ​ຕ່ຳ​ ໄດ້​ພັດ​ຜ່ານ​ເຂດ​ພາກ​ເໜືອ​ຫາ​ພາກ​ກາງ­ຂອງ​ປະ­ເທດ​ລາວ ດ້ວຍ​ກຳ­ລັງ​ປານ​ກາງ ສົມ­ທົບ​ກັບ​ມໍ​ລະ​ສຸມ​ຕາ­ເວັນ­ຕົກ​ສຽງ​ໃຕ້​ມີ​ກຳ­ລັງ​ແຮງ​ພັດ​ປົກ​ຄຸມ ປ່ອງ​ເຂົ້າ​ໃສ່​ພາ­ຍຸ​ລະ­ດູ​ຮ້ອນ​ທີ່​ຈະ​ກໍ່​ຕົວ​ຂຶ້ນ​ຢູ່​ເຂດ​ເກາະ​ໄຫ່​ໜານ ໃນ​ໄລ­ຍະ​ວັນ​ທີ 12-16 ກໍ­ລະ­ກົດ 2018 ຈະ​ເກີດ​ມີ​ຝົນ­ຕົກ ຟ້າ­ຮ້ອງ ຟ້າ​ເຫຼື້ອມ ແລະ ລົມ​ພັດ​ແຮງ​ຢູ່​ບາງ​ທ້ອງ­ຖິ່ນ​ແຂວງ​ພາກ​ເໜືອ​ດ້ານ​ຕາ­ເວັນ­ຕົກ​ຫາ​ພາກ​ກາງ ແລະ ພາກ​ໃຕ້​ຂອງ​ປະ­ເທດ​ລາວ ເຊິ່ງ​ຈະ​ເຮັດ​ໃຫ້​ມີ​ດິນ​ເຈື່ອນ ນ້ຳ​ຖ້ວມ​ຊຸ ແລະ ນ້ຳ​ຖ້ວມ​ອັ່ງ​ໃນ​ແຕ່​ລະ​ພາກ​ດັ່ງ­ນີ້: ໃນ​ໄລ­ຍະ​ວັນ​ທີ 11-14 ກໍ­ລະ­ກົດ 2018 ຈະ​ມີ​ຝົນ­ຕົກ ຟ້າ­ຮ້ອງ ຟ້າ​ເຫຼື້ອມ ແລະ ລົມ​ພັດ​ແຮງ​ຢູ່​ບັນ­ດາ​ແຂວງ​ພາກ​ເໜືອ ເຊັ່ນ: ແຂວງ​ບໍ່​ແກ້ວ ຫຼວງ ນ້ຳ​ທາ ອຸ­ດົມ​ໄຊ ແລະ ໄຊ​ຍະ​ບູ​ລີ ວັນ​ທີ 11-16 ກໍ­ລະ­ກົດ 2018 ຈະ​ມີ​ຝົນ­ຕົກ ຟ້າ­ຮ້ອງ ຟ້າ​ເຫຼື້ອມ ແລະ ລົມ​ພັດ​ແຮງ​ຢູ່​ບັນ­ດາ​ແຂວງ​ພາກ​ກາງ ແລະ ພາກ​ໃຕ້ ເຊັ່ນ: ແຂວງ​ວຽງ​ຈັນ ນະ­ຄອນ­ຫຼວງ​ວຽງ​ຈັນ ໄຊ​ສົມ­ບູນ ບໍ​ລິ​ຄຳ​ໄຊ ຄຳ​ມ່ວນ ສະ­ຫວັນ​ນະ​ເຂດ ສາ­ລະ​ວັນ ຈຳ­ປາ​ສັກ ເຊ​ກອງ ແລະ ອັດ​ຕະ​ປື.

   ດັ່ງ­ນັ້ນ ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ຈຶ່ງ​ແຈ້ງ​ເຕືອນ​ເຖິງ​ປະ­ຊາ­ຊົນ​ບັນ­ດາ­ເຜົ່າ ອຳ­ນາດ​ການ​ປົກ­ຄອງ ແລະ ອົງ​ການ­ຈັດ­ຕັ້ງ​ທຸກ​ພາກ­ສ່ວນ​ທີ່​ອາ­ໄສ​ຢູ່​ບັນ­ດາ​ແຂວງ​ດັ່ງ­ກ່າວ ຈົ່ງ​ມີ​ສະ­ຕິ​ກຽມ­ພ້ອມ​ຮັບ​ມື​ກັບ​ສະ­ພາບ​ນ້ຳ​ຖ້ວມ​ຊຸ ດິນ​ເຈື່ອນ ນ້ຳ​ຖ້ວມ​ອັ່ງ ລົມ​ພັດ​ແຮງ ເຊິ່ງ​ເປັນ​ອັນ­ຕະ­ລາຍ​ຕໍ່​ຊີ­ວິດ ແລະ ຊັບ​ສິນ​ມີ­ຄ່າ​ຂອງ​ພໍ່​ແມ່​ປະ­ຊາ­ຊົນ ພ້ອມ​ນີ້ ກໍ່​ໃຫ້​ກະ­ກຽມ​ເຄື່ອນ​ຍ້າຍ​ວັດ­ຖຸ​ສິ່ງ​ຂອງ ແລະ ສັດ­ລ້ຽງ​ໄປ​ໄວ້​ບ່ອນ​ທີ່​ປອດ​ໄພ ຂໍ​ໃຫ້​ຕິດ­ຕາມ​ຂ່າວ​ພະ­ຍາ­ກອນ​ອາ­ກາດ ແລະ ລະ­ດັບ​ນ້ຳ ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ​ໃນ​ໄລ­ຍະ 1-5 ວັນ​ຂ້າງ​ໜ້າ​ນີ້.

ຂ່າວທີ່ກ່ຽວຂ້ອງ