ຂ່າວຫຼ້າສຸດ

ຈັນທະບູລີ ປ່ອຍປາສູ່ທຳມະຊາດ

250 12 ກ.ກ. 2018 ຂ່າວໜ້າ​ໜຶ່ງ
ຈັນທະບູລີ ປ່ອຍປາສູ່ທຳມະຊາດ

   ເພື່ອ​ເປັນ​ການ​ປູກ​ຈິດ​ສຳ­ນຶກ ສະ­ຕິ​ຮັກ​ທຳ​ມະ​ຊາດ ໃຫ້​ແກ່​ຮຸ່ນ​ລູກ ຮຸ່ນ​ຫຼານ​ສືບ­ຕໍ່​ໄປ ພ້ອມ​ທັງ​ເຮັດ​ໃຫ້​ທຳ​ມະ​ຊາດ​ນັບ​ມື້​ນັບ​ມີ​ຄວາມ​ສົມ­ບູນ​ຂຶ້ນ​ເລື້ອຍໆ ໂດຍ​ບໍ່​ມີ​ວັນ​ເຫືອດ​ຫາຍ ແລະ ດັບ​ສູນ​ໄປ​ຈາກ​ພວກ​ເຮົາ ໃນ​ວັນ​ທີ 11 ມິ­ຖຸ­ນາ 2018 ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ໄດ້​ຈັດ​ພິ­ທີ​ປ່ອຍ​ປາ​ລົງ​ສູ່​ທຳ​ມະ​ຊາດ ໃນ​ໂອ­ກາດ​ວັນ​ປ່ອຍ​ປາ​ແຫ່ງ​ຊາດ ທີ 13 ກໍ­ລະ­ກົດ ນີ້ ຂຶ້ນ​ທີ່​ກອງ​ບັນ­ຊາ​ການ​ທະ­ຫານ​ເມືອງ​ຈັນ­ທະ​ບູ​ລີ ໂດຍ​ມີ​ທ່ານ ເພັດ​ສະ­ໄໝ ນັດ​ຜາ​ສຸກ ຮອງ​ເຈົ້າ­ເມືອງ​ຈັນ­ທະ​ບູ​ລີ ທ່ານ ພັທ ວົງ​ຄຳ​ຈັນ ສິງ​ສຸ­ວັນ ຫົວ­ໜ້າ​ກອງ​ບັນ­ຊາ​ການ​ທະ­ຫານ​ເມືອງ​ຈັນ­ທະ​ບູ​ລີ ພ້ອມ​ດ້ວຍ​ຄະ­ນະ​ນຳ​ເມືອງ ຫ້ອງ­ການ​ອ້ອມ​ຂ້າງ ນັກ­ທຸ­ລະ­ກິດ ເລ­ຂາ​ພັກ​ບ້ານ ນາຍ­ບ້ານ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ​ປ່ອຍ​ປາ.

   ທ່ານ ເພັດ​ສະ­ໄໝ ນັດ​ຜາ​ສຸກ ກ່າວ​ວ່າ: ເລີ່ມ​ແຕ່​ປີ 2000 ເຖິງ​ປັດ­ຈຸ­ບັນ ໄດ້​ປ່ອຍ​ປາ​ທັງ​ໝົດ 344.000 ໂຕ ໃນ​ປີ 2018 ນີ້ ແມ່ນ​ປ່ອຍ​ປາ​ຂະ­ໜາດ​ໃຫຍ່ ຈຳ­ນວນ 15 ພັນ​ໂຕ ໃນ​ນັ້ນ ມີ ປາ​ນິນ ແລະ ປາ­ໄນ ເພື່ອ​ເປັນ​ການ­ຈັດ­ຕັ້ງ​ຜັນ​ຂະ­ຫຍາຍ​ກົດ­ໝາຍ​ການ​ປະ­ມົງ ແລະ ກົດ­ໝາຍ​ປ່າ­ໄມ້ ວັນ​ອະ­ນຸ​ຮັກ​ສັດ​ນ້ຳ-ສັດ­ປ່າ ໃນ​ການ​ປ່ອຍ​ສັດ​ນ້ຳ​ຄືນ​ສູ່​ທຳ​ມະ​ຊາດ​ເປັນ​ຂອງ​ປວງ​ຊົນ​ລາວ​ຢ່າງ​ແທ້​ຈິງ ເຮັດ​ໃຫ້​ທຸກ​ຄົນ​ເຂົ້າ­ໃຈ ແລະ ມີ​ສ່ວນ​ຮ່ວມ​ກວ້າງ­ຂວາງ​ກວ່າ​ເກົ່າ ປີ​ນີ້​ເຊິ່ງ​ເປັນ​ປີ​ທີ 18 ທີ່​ເມືອງ​ຈັນ­ທະ​ບູ​ລີ ໄດ້​ມອບ​ໃຫ້​ບັນ­ດາ​ບ້ານ​ເປັນ​ເຈົ້າ­ພາບ​ຈັດ​ພິ­ທີ​ດັ່ງ­ກ່າວ​ຂຶ້ນ​ຢ່າງ​ເປັນ​ທາງ​ການ ແລະ ໃນ​ປີ​ຕໍ່​ໄປ​ພວກ​ເຮົາ​ກໍ່​ຈະ​ຫັນ ແລະ ມອບ​ວຽກ​ງານ​ນີ້​ໝູ­ນວຽນ​ໃຫ້​ບ້ານ​ຕ່າງໆ​ໃນ​ບັນ­ດາ​ກຸ່ມ​ບ້ານ​ທີ່​ມີ​ເງື່ອນ­ໄຂ (ຂອບ​ເຂດ​ທີ່​ມີ​ໜອງ) ເຮັດ​ໃຫ້​ເປັນ​ປະ­ເພ­ນີ​ປະ­ຈຳ­ເມືອງ​ພວກ​ເຮົາ​ຕໍ່ໆໄປໃນ​ການ​ປ່ອຍ​ສັດ​ນ້ຳ​ຄືນ​ສູ່​ທຳ​ມະ​ຊາດ.

   ເຖິງ​ເວ­ລາ​ແລ້ວ​ພວກ​ເຮົາ​ທຸກ​ຄົນ​ຕ້ອງ​ໄດ້​ເອົາ­ໃຈ­ໃສ່​ປົກ​ປັກ​ຮັກ­ສາ​ສັດ​ນ້ຳ ເພື່ອ​ເປັນ​ມູນ​ມໍ­ລະ­ດົກ​ຕົກ​ທອດ​ເຖິງ​ລູກ​ເຖິງ​ຫຼານ ເຮັດ​ໃຫ້​ສັດ​ນ້ຳ​ມີ​ຄວາມ​ອຸ­ດົມ­ສົມ­ບູນ ແລະ ມີ​ຄວາມ​ດຸນ​ດ່ຽງ​ທາງ​ດ້ານ​ທາດ​ຊີ້ນ​ຄຽງ​ຄູ່​ກັບ​ພວກ​ເຮົາ​ຕະ­ຫຼອດ​ໄປ ແລະ ປະ­ຕິ­ບັດ​ຄຳ​ຂວັນ​ທີ່​ວ່າ: ບໍ່​ກິນ ບໍ່​ຂ້າ ບໍ່​ຄ້າ ບໍ່​ຂາຍ (ໃນ​ນ້ຳ​ມີ​ປາ ໃນ​ນາ​ມີ​ເຂົ້າ ໃນ​ປະ­ເທດ​ເຮົາ​ໃຫ້​ມີ​ຄວາມ​ອຸ­ດົມ­ສົມ­ບູນ​ໄປ​ດ້ວບ​ຊັບ­ພະ­ຍາ­ກອນ​ທຳ​ມະ​ຊາດ).

ຂ່າວທີ່ກ່ຽວຂ້ອງ