ຕົ້ນໄມ້ໃຫ້ໝາກ ສວນແກ້ວທະວີຄູນ ເລີ່ມໃຫ້ຜົນຜະລິດ

312 12 ກ.ກ. 2018 ຂ່າວໜ້າ​ໜຶ່ງ
ຕົ້ນໄມ້ໃຫ້ໝາກ ສວນແກ້ວທະວີຄູນ ເລີ່ມໃຫ້ຜົນຜະລິດ

   ບໍ­ລິ­ສັດ ແກ້ວ​ທະ­ວີ­ຄູນ​ເພີ່ມ​ພູນ​ຊັບ ຂາ​ເຂົ້າ-ຂາ​ອອກ ຈຳ­ກັດ ນອກ­ຈາກ​ສຳ​ປະ­ທານ​ເນື້ອ­ທີ່​ດິນ​ລັດ​ຢູ່​ເຂດ​ທົ່ງ­ພຽງ​ບໍ​ລິເວນ​ເມືອງ​ປາກ​ຊ່ອງ ແຂວງ​ຈຳ­ປາ​ສັກ ແລະ ບ້ານ​ໂນນ​ຫວາຍ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ເພື່ອ​ຜະ­ລິດ​ພືດ​ຜັກ​ສະ­ອາດ​ປອດ​ສານ​ເຄ​ມີ​ເປັນ​ສິນ­ຄ້າ​ຈຳ­ໜ່າຍ​ຕະ­ຫຼາດ​ພາຍ​ໃນ ແລະ ສົ່ງ​ອອກ​ຕ່າງ­ປະ­ເທດ​ແລ້ວ ບໍ­ລິ­ສັດ​ຍັງ​ໄດ້​ພັດ­ທະ­ນາ​ເນື້ອ­ທີ່​ດິນ 102 ເຮັກ­ຕາ​ທີ່​ເປັນ​ດິນ​ກຳ­ມະ­ສິດ​ນຳ​ໃຊ້​ຂອງ​ຕົນ​ເອງ​ຢູ່​ບ້ານ​ແສນ​ດິນ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ເພື່ອ​ເປັນ​ສວນ​ປູກ​ໄມ້​ໃຫ້​ໝາກ​ຕາມ​ລະ­ດູ​ການ ແລະ ລ້ຽງ­ສັດ​ເປັນ​ສິນ­ຄ້າ​ຕື່ມ​ອີກ.

   ທ່ານ ແກ້ວ​ລຳ​ພອນ ແສງ​ສຸ​ລິ​ເດດ ປະ­ທານ​ບໍ­ລິ­ສັດ ແລະ ທ່ານ​ນາງ ຂັນ​ທະ​ລີ ແສງ​ສຸ​ລິ​ເດດ ຜູ້​ຮັບ­ຜິດ­ຊອບ​ການ​ຕະ­ຫຼາດ​ບໍ­ລິ­ສັດ ແກ້ວ​ທະ­ວີ­ຄູນ​ເພີ່ມ​ພູນ​ຊັບ​ຂາ​ເຂົ້າ-ຂາ​ອອກ ຈຳ­ກັດ ໄດ້​ໃຫ້​ສຳ­ພາດ​ວັນ​ທີ 8 ກໍ­ລະ­ກົດ 2018 ວ່າ: ເນື້ອ­ທີ່​ດິນ​ສວນ​ແຫ່ງ​ນີ້​ໄດ້​ເລີ່ມ​ພັດ­ທະ­ນາ​ນັບ​ແຕ່​ປີ 2008 ເປັນ­ຕົ້ນ​ມາ ແລະ ເປົ້າ​ໝາຍ​ສວນ​ແຫ່ງ​ນີ້​ຈະ​ສ້າງ​ເປັນ​ສວນ​ກະ­ສິ­ກຳ​ປູກ ຝັງ-ລ້ຽງ­ສັດ​ແບບ​ຄົບ​ວົງ​ຈອນ ປັດ­ຈຸ­ບັນ​ໄດ້​ສຸມ​ໃສ່​ປູກ​ໄມ້​ໃຫ້​ໝາກ ລ້ຽງ­ສັດ ແລະ ລ້ຽງ​ປາ ເປັນ​ສິນ­ຄ້າ​ຈຳ­ໜ່າຍ​ຕະ­ຫຼາດ​ພາຍ​ໃນ ໂດຍ​ສະ­ເພາະ ຕະ­ຫຼາດ​ນະ­ຄອນ­ຫຼວງ​ວຽງ​ຈັນ ເພື່ອ​ໃຫ້​ສັງ­ຄົມ ກໍ່​ຄື ຜູ້​ບໍ­ລິ­ໂພກ​ໄດ້​ບໍ­ລິ­ໂພກ​ໝາກ​ໄມ້​ທີ່​ສະ­ອາດ​ປາ­ສະ­ຈາກ​ສານ​ເຄ​ມີ​ຕົກ​ຄ້າງ ເຊິ່ງ​ໄດ້​ປູກ​ໄມ້​ໃຫ້​ໝາກ​ຫຼາຍ​ຊະ­ນິດ ເປັນ­ຕົ້ນ ໝາກ​ນາວ 3 ພັນ​ກວ່າ​ຕົ້ນ ໝາກ​ລຳ­ໄຍ 170 ຕົ້ນ   ໝາກ​ສີ­ດາ 3 ພັນ​ກວ່າ​ຕົ້ນ ໝາກ­ຫຸ່ງ 300 ກວ່າ​ຕົ້ນ ນອກ​ນັ້ນ ຍັງ​ມີ​ໝາກ​ລິນ​ຈີ່ ຖົ່ວ­ລຽນ ໝາກ­ສົ້ມ­ໂອ ໝາກ​ມັງ ກອນ  ໝາກ­ມ່ວງ  ໝາກ­ພ້າວ​ຫອມ ແລະ ໝາກ​ໄມ້​ຊະ­ນິດ​ອື່ນໆ ທັງ​ພັນ​ພື້ນ­ເມືອງ ແລະ ພັນ​ປັບ­ປຸງ​ທີ່​ໃຫ້​ຜົນ​ຜະ­ລິດ​ໄວ ສຳ­ລັບ​ໝາກ​ນາວ ແລະ ໝາກ­ຫຸ່ງ​ໄດ້​ເລີ່ມ​ໃຫ້​ຜົນ​ຜະ­ລິດ​ປີ 2017 ເປັນ­ຕົ້ນ​ມາ ສ່ວນ​ໝາກ​ລຳ­ໄຍ​ໄດ້​ເລີ່ມ​ໃຫ້​ຜົນ​ຜະ­ລິດ​ປີ 2018 ພາຍ­ຫຼັງ​ທີ່​ປູກ​ມາ​ໄດ້ 3 ປີ ເຊິ່ງ​ຜົນ​ຜະ­ລິດ​ໝາກ​ລຳ­ໄຍ​ປີ​ນີ້​ຄາດ​ວ່າ​ຈະ​ໄດ້ 2 ໂຕນ ແຕ່​ມາ​ຮອດ​ປັດ­ຈຸ­ບັນ​ເກັບ​ກູ້​ໄດ້​ປະ­ມານ 300 ກິ​ໂລ ຂາຍ​ໃນ​ລາ­ຄາ​ກິ​ໂລ​ລະ 15 ພັນ​ກີບ ແລະ ຄາດ​ວ່າ​ອີກ 2-3 ປີ​ຂ້າງ​ໜ້າ​ຕົ້ນ­ໄມ້​ໃຫ້​ໝາກ​ທີ່​ປູກ​ໄປ​ນັ້ນ​ຈະ​ໃຫ້​ຜົນ​ຜະ­ລິດ​ເຕັມ​ຮູບ​ແບບ.

   ນອກ­ຈາກ​ປູກ​ໄມ້​ໃຫ້​ໝາກ​ແລ້ວ ພາຍ​ໃນ​ສວນ​ຍັງ​ປູກ​ຫຍ້າ​ເນ​ເປຍ​ເປັນ​ອາ­ຫານ​ສະ­ໜອງ​ໃຫ້​ສັດ­ລ້ຽງ​ພາຍ​ໃນ​ຟາມ​ຂອງ​ບໍ­ລິ­ສັດ ເນື້ອ­ທີ່ 10 ເຮັກ­ຕາ ປູກ​ສາ­ລີ ລ້ຽງ​ງົວ​ພັນ ງົວ​ລາດ ແບ້ ແກະ ໝູ​ປ່າ ໄກ່ ແລະ ລ້ຽງ​ປາ​ຈຳ­ນວນ​ຫຼາຍ​ໜອງ ມີ​ເນື້ອ­ທີ່​ນາ 2 ເຮັກ­ຕາ ສາ­ມາດ​ຜະ­ລິດ​ເຂົ້າ​ໄດ້ 2 ລະ­ດູ ສ່ວນ​ການ​ລ້ຽງ­ສັດ​ເປົ້າ​ໝາຍ​ນອກ­ຈາກ​ຂາຍ​ສັດ​ເປັນ​ສິນ­ຄ້າ​ແລ້ວ​ຍັງ​ລ້ຽງ​ເອົາ​ມູນ​ສັດ​ເປັນ​ຝຸ່ນ​ໃຫ້​ແກ່​ຕົ້ນ­ໄມ້​ທົດ​ແທນ​ຝຸ່ນ​ເຄ​ມີ​ຕື່ມ​ອີກ ສຳ­ລັບ​ຕະ­ຫຼາດ​ຈຳ­ໜ່າຍ​ຜົນ​ຜະ­ລິດ​ໝາກ​ໄມ້ ນອກ­ຈາກ​ບໍ​ລິ ສັດ​ນຳ​ເອົາ​ໄປ​ຈຳ­ໜ່າຍ​ຂາຍ​ຢູ່​ໃນ​ຕະ­ຫຼາດ​ອິນ​ຊີ​ຈັດ​ຂຶ້ນ​ທຸກ​ອາ­ທິດ​ຂອງ​ວັນ​ພຸດ ແລະ ວັນ​ເສົາ​ຢູ່​ລານ​ຈອດ​ລົດ​ສູນ​ການ​ຄ້າ​ລາວ -ໄອ​ເຕັກ​ແລ້ວ ຍັງ​ມີ​ແມ່​ຄ້າ​ຈຳ­ນວນ​ໜຶ່ງ​ໄປ​ຮັບ​ຊື້​ຢູ່​ກັບ​ສວນ​ຕື່ມ​ອີກ.

   ສຳ­ລັບ​ເປົ້າ​ໝາຍ​ຂອງ​ບໍ­ລິ­ສັດ​ໃນ​ອະ­ນາ­ຄົດ​ຂ້າງ​ໜ້າ​ຈະ​ສ້າງ​ສວນ​ແຫ່ງ​ນີ້​ເພື່ອ​ເປັນ​ສະ­ຖານ­ທີ່​ທ່ອງ​ທ່ຽວ ແລະ ເປັນ​ບ່ອນ​ສຶກ​ສາ​ຮຽນ​ຮູ້​ທາງ​ດ້ານ​ກະ­ສິ­ກຳ​ປູກ­ຝັງ-ລ້ຽງ­ສັດ ເນື່ອງ​ຈາກ​ສວນ​ມີ​ສະ­ຖານ­ທີ່​ເໝາະ​ສົມ ເປັນ­ຕົ້ນ ຕັ້ງ​ຢູ່​ໃກ້​ກັບ​ຕົວ​ເມືອງ​ນະ­ຄອນ­ຫຼວງ​ວຽງ​ຈັນ ມີ​ເສັ້ນ­ທາງ​ເຂົ້າ​ໄປ​ຫາ​ສະ­ດວກ ແລະ ມີ​ເນື້ອ­ທີ່​ກວ້າງ­ຂວາງ ສາ­ມາດ​ພັດ­ທະ­ນາ​ໃຫ້​ຄົບ​ວົງ​ຈອນ​ເປັນ ຕົ້ນ ຈະ​ສ້າງ​ໃຫ້​ມີ​ຮ້ານ​ອາ­ຫານ​ຮອງ​ຮັບ​ນັກ​ທ່ອງ​ທ່ຽວ​ທີ່​ໄປ​ທ່ຽວ​ຊົມ​ສວນ ຈັດ​ໃຫ້​ມີ​ກິດ­ຈະ­ກຳ​ຂີ່​ເຮືອ​ທ່ຽວ​ຊົມ​ສວນ ແລະ ອື່ນໆ.

ຂ່າວທີ່ກ່ຽວຂ້ອງ