ຂ່າວຫຼ້າສຸດ

ອີຊູຊຸ ລາວບໍລິການ ຈັດກິດຈະກຳຊ່ວຍເຫຼືອສັງຄົມ

181 11 ກ.ກ. 2018 ຂ່າວໜ້າ​ໜຶ່ງ
ອີຊູຊຸ ລາວບໍລິການ ຈັດກິດຈະກຳຊ່ວຍເຫຼືອສັງຄົມ

   ບໍ­ລິ­ສັດ ອີ​ຊູ​ຊຸ​ລາວ ບໍ­ລິ­ການ ຈຳ­ກັດ​ຜູ້​ດຽວ (ISUZU LAO SERVICES) ຈັດ​ກິດ­ຈະ­ກຳ​ພິ­ເສດ ( ISUZU Rally 2018 ) ໃນ​ວັນ​ທີ 8 ກໍ­ລະ­ກົດ 2018 ໂດຍ​ການ​ປ່ອຍ​ຂະ​ບວນ​ລົດ​ເລີ່ມ​ແຕ່​ຫ້ອງ​ຂາຍ​ລົດ​ອີ​ຊູ​ຊຸ​ລາວ​ບໍ­ລິ­ການ ນະ­ຄອນ­ຫຼວງ​ວຽງ​ຈັນ ຫາ ຈຸດ­ໝາຍ​ເມືອງ​ສັງ​ທອງ ນວ ເຊິ່ງ​ເຊີນ​ເອົາ​ລູກ​ຄ້າ​ທີ່​ຊົມ­ໃຊ້​ລົດ ອີ​ຊູ​ຊຸ ເຂົ້າ​ຮ່ວມ​ກິດ­ຈະ­ກຳ.

   ທ່ານ ວິ​ຣະ​ໄຊ​ຄຳ ພິ­ລາ​ພັນ​ເດ​ຊ ປະ­ທານ ແລະ ອຳ­ນວຍ​ການ​ບໍ­ລິ­ສັດ ອີ​ຊູ​ຊຸ​ລາວ ບໍ­ລິ­ການ ຈຳ­ກັດ​ຜູ້​ດຽວ​ກ່າວ​ວ່າ: ການ​ຈັດ​ກິດ­ຈະ­ກຳ​ຄັ້ງ​ນີ້​ເປັນ​ກິດ­ຈະ­ກຳ​ສຳ­ພັນ​ທີ່​ຈັດ​ຂຶ້ນ​ມາ​ເປັນ​ພິ­ເສດ​ສຳ­ລັບ​ລູກ​ຄ້າ​ທີ່​ຊົມ­ໃຊ້​ລົດ​ອີ​ຊູ​ຊຸ ໂດຍ​ມີ​ທ່ານ​ນາງ ອອນ ຣັກ​ຕິ​ປະ­ກອນ ຜູ້­ອຳ­ນວຍ­ການ​ປະ­ຊາ­ສຳ­ພັນ ບໍ­ລິ­ສັດ ຕຣີ​ເພັດ​ອີ​ຊູ​ຊຸ​ເຊວສ໌ ຈຳ­ກັດ ພ້ອມ​ຄະ­ນະ​ຈາກ​ປະ­ເທດ​ໄທ ເຊິ່ງ​ເປັນ​ຜູ້​ຈຳ­ໜ່າຍ​ລົດ​ກະ­ບະ ອີ​ຊູ​ຊຸ ດີ-ແມັກ ແລະ ລົດ​ອະ­ເໜກ​ປະ­ສົງ ອີ​ຊູ​ຊຸ ມິວ-ເອັກ ໃນ ສປປ ລາວ ພິ­ເສດ​ມີ​ທ່ານ ສິງ​ເມ​ໂນ​ລາດ ຮອງ​ປະ­ທານ​ອົງ­ການ​ກາ­ແດງ​ລາວ ໃນ​ນາມ​ຄູ່​ຮ່ວມ​ສຳ­ພັນ​ກິດ­ຈະ­ກຳ​ດ້ານ​ມະ­ນຸດ­ສະ­ທຳ ຊ່ວຍ­ເຫຼືອ​ສັງ­ຄົມ ຂອງ​ບໍ­ລິ­ສັດ ເຂົ້າ​ຮ່ວມ​ກິດ­ຈະ­ກຳ​ໃນ​ຄັ້ງ​ນີ້.

   ການ​ຈັດ​ກິດ­ຈະ­ກຳ​ຄັ້ງ​ນີ້ ນອກ­ຈາກ​ການ​ສ້າງ​ສາຍ­ສຳ­ພັນ​ພາຍ​ໃນ​ຄອບ­ຄົວ​ອີ​ຊູ​ຊຸ​ແລ້ວ ຍັງ​ເປັນ​ການ​ແລກ­ປ່ຽນ​ປະ­ສົບ​ປະ­ການ ການ​ຂັບ​ຂີ່​ແບບ​ປອດ​ໄພ ປະ­ຢັດ​ນ້ຳ­ມັນ ລວມ​ທັງ​ກົດ​ກະ­ຕິ​ການ ມາ­ລະ­ຍາດ ລະ­ບຽບ​ການ​ຂັບ​ຂີ່​ຕາມ​ຖະ­ໜົນ ການ​ບຳ­ລຸງ​ຮັກ­ສາ​ສະ­ພາບ​ລົດ ອີກ​ດ້ານ​ໜຶ່ງ​ເພື່ອ​ສ້າງ​ຄວາມ​ສາ­ມັກ­ຄີ​ພາຍ​ໃນ​ຄອບ­ຄົວ ໃນ​ໄລ­ຍະ​ການ​ເດີນ­ທາງ ໄດ້​ກຽມ​ເກມ​ຕ່າງໆ​ໃຫ້​ລູກ​ຄ້າ​ທຸກ​ທ່ານ​ໄດ້​ຮ່ວມ​ມ່ວນ­ຊື່ນ​ຕະ­ຫຼອດ​ເສັ້ນ­ທາງ ອີກ​ທັງ​ຍັງ​ໄດ້​ຈັດ​ກິດ­ຈະ­ກຳ​ເພື່ອ​ຊ່ວຍ­ເຫຼືອ​ສັງ­ຄົມ ໂດຍ​ການ​ແບ່ງ­ປັນ​ຄວາມ­ສຸກ ລ້ຽງ​ອາ­ຫານ​ທ່ຽງ ໃຫ້​ຄູ ແລະ ນັກ­ຮຽນ ອຳ­ນາດ​ການ​ປົກ­ຄອງ ພ້ອມ​ພໍ່​ແມ່​ຜູ້​ປົກ­ຄອງ​ນັກ­ຮຽນ​ໂຮງ­ຮຽນ​ປະ­ຖົມ​ສົມ­ບູນ​ນາ​ໝ້ຽງ ບ້ານ​ໃຫຍ່​ນາ​ຈະ­ເລີນ ຄຸ້ມ 3 ເມືອງ​ສັງ​ທອງ ພ້ອມ​ທັງ​ມອບ​ກະ­ດານ­ດຳ ສໍ​ຂາວ ຕູ້​ເກັບ​ເອ­ກະ­ສານ ແທ່ງ​ເກັບ​ນ້ຳ ແລະ ໄດ​ປ້ຳ​ນ້ຳ ລວມ​ມູນ​ຄ່າ 21 ລ້ານ​ກວ່າ​ກີບ.

ຂ່າວທີ່ກ່ຽວຂ້ອງ