ຂ່າວຫຼ້າສຸດ

ສະເໜີການເລືອກແລວທາງກໍ່ສ້າງເສັ້ນທາງດ່ວນ ບໍ່ເຕັນ-ຫ້ວຍຊາຍ

299 10 ກ.ກ. 2018 ຂ່າວໜ້າ​ໜຶ່ງ
ສະເໜີການເລືອກແລວທາງກໍ່ສ້າງເສັ້ນທາງດ່ວນ ບໍ່ເຕັນ-ຫ້ວຍຊາຍ

   ກອງ​ປະ­ຊຸມ​ລາຍ​ງານ​ການ​ເລືອກ​ແລວ​ທາງ​ໂຄງ­ການ​ກໍ່­ສ້າງ​ເສັ້ນ­ທາງ​ດ່ວນ ບໍ່​ເຕັນ ແຂວງ​ຫຼວງ​ນ້ຳ​ທາ-ຫ້ວຍ​ຊາຍ ແຂວງ​ບໍ່​ແກ້ວ ຈັດ​ຂຶ້ນ​ວັນ​ທີ 6 ມິ­ຖຸ­ນາ 2018 ທີ່​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ໂດຍ​ເປັນ​ປະ­ທານ​ຂອງ​ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ມີ​ບັນ­ດາ​ຫົວ­ໜ້າ​ກົມ ຮອງ​ກົມ ບັນ­ດາ​ກະ­ຊວງ​ທີ່​ກ່ຽວ­ຂ້ອງ ແລະ ກຸ່ມ​ບໍ­ລິ­ສັດ​ລົງ­ທຶນ​ກໍ່­ສ້າງ​ເສັ້ນ­ທາງ​ດັ່ງ­ກ່າວ​ເຂົ້າ​ຮ່ວມ.

   ກອງ​ປະ­ຊຸມ​ໄດ້​ປຶກ­ສາ​ຫາ­ລື ແລະ ນຳ​ສະ­ເໜີ​ການ​ເລືອກ​ແລວ​ທາງ​ໂຄງ­ການ​ກໍ່­ສ້າງ​ເສັ້ນ­ທາງ​ດ່ວນ ບໍ່​ເຕັນ-ຫ້ວຍ​ຊາຍ ເຊິ່ງ​ໂຄງ­ການ​ດັ່ງ­ກ່າວ​ເປັນ​ທາງ​ໄລ­ຍະ​ໜຶ່ງ​ທີ່​ສຳ­ຄັນ​ຂອງ​ເສັ້ນ­ທາງ​ເຊື່ອມ​ຕໍ່​ຈາກ​ຄຸນ​ໝິງ ສປ ຈີນ ຜ່ານ ສປປ ລາວ ໄປ​ຫາ​ບາງ­ກອກ​ປະ­ເທດ​ໄທ ໂດຍ​ການ​ກໍ່­ສ້າງ​ແມ່ນ​ສອດ­ຄ່ອງ​ກັບ​ໜຶ່ງ​ແລວ ໜຶ່ງ​ເສັ້ນ­ທາງ ທີ່​ສາ­ມາດ​ສົ່ງ­ເສີມ​ການ​ພັດ­ທະ­ນາ​ທາງ​ດ້ານ​ເສດ­ຖະ­ກິດ-ສັງ­ຄົມ​ໃຫ້​ແກ່​ຊຸມ​ຊົນ ຕາມ​ແລວ​ທາງ​ຜ່ານ​ໃຫ້​ມີ​ປະ​ສິດ­ທິ​ຜົນ​ສູງ​ສຸດ ນັບ​ແຕ່​ເດືອນ​ກໍ­ລະ­ກົດ ປີ 2017 ກຸ່ມ​ບໍ­ລິ­ສັດ​ລົງ­ທຶນ ແລະ ກໍ່­ສ້າງ​ຄົມ­ມະ­ນາ­ຄົມ​ແຂວງ​ຢຸນ​ນານ ຈຳ­ກັດ ໄດ້​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ​ກັບ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ເພື່ອ​ສຶກ​ສາ​ຄວາມ​ເປັນ​ໄປ​ໄດ້​ກໍ່­ສ້າງ​ເສັ້ນ­ທາງ​ດ່ວນ ບໍ່​ເຕັນ-ຫ້ວຍ​ຊາຍ  ຜ່ານ​ການ​ສຶກ​ສາ​ໄດ້​ຈຸດ​ເລີ່ມ​ຕົ້ນ​ຢູ່​ຊາຍ​ແດນ ລາວ-ຈີນ ເຂດ​ເສດ­ຖະ­ກິດ​ພິ­ເສດ​ບໍ່​ເຕັນ ແຂວງ​ຫຼວງ​ນ້ຳ​ທາ ແລວ​ທາງ​ໄດ້​ຜ່ານ​ບັນ­ດາ​ບ້ານ​ເມືອງ​ທີ່​ສຳ­ຄັນ ຄື: ບ້ານ​ນາ​ເຕີຍ ເມືອງ​ຫຼວງ​ນ້ຳ​ທາ ບ້ານ​ບຸ່ງ ເມືອງ​ວຽງ​ພູ​ຄາ  ແລະ ສຸດ​ທ້າຍ​ທີ່​ເມືອງ​ຫ້ວຍ​ຊາຍ ແຂວງ​ບໍ່​ແກ້ວ ເປັນ​ເຂດ​ຊາຍ​ແດນ​ລາວ-ໄທ ໃນ​ນີ້ ຈຸດ​ທີ່​ຕັ້ງ​ຂອງ​ໂຄງ­ການ​ທາງ​ທິດ­ເໜືອ​ຕິດ​ກັບ​ບໍ່​ຫ່ານ ສປ ຈີນ ທິດ­ໃຕ້​ຕິດ​ກັບ​ເມືອງ​ຊຽງ​ຂອງ​ປະ­ເທດ​ໄທ.

   ສຳ­ລັບ​ການ​ເລືອກ​ຈຸດ​ເລີ່ມ​ຕົ້ນ​ຂອງ​ໂຄງ­ການ​ມີ​ທັງ​ໝົດ 3 ແລວ​ທາງ ເພື່ອ​ເຮັດ​ການ​ສົມ​ທຽບ​ຄື​ແລວ​ທາງ​ເຄ ແລວ​ທາງ​ເອ ແລະ ແລວ​ທາງ​ບີ ຜ່ານ​ການ​ວິ­ເຄາະ​ຢ່າງ​ສົມ​ເຫດ​ສົມ​ຜົນ​ເຫັນ​ວ່າ​ຈຸດ​ເລີ່ມ​ຕົ້ນ​ແລວ​ທາງ​ເຄ ແມ່ນ​ຂ້ອນ​ຂ້າງ​ດີ ກວ່າ​ແລວ​ທາງ​ເອ ແລະ ບີ ບໍ່​ພຽງ​ແຕ່​ສາ­ມາດ​ນຳ​ໃຊ້​ສະ­ຖານ­ທີ່​ດ່ານ​ຊາຍ​ແດນ​ບໍ່​ເຕັນ ແລະ ບໍ່​ຫ່ານ​ທີ່​ມີ​ຢູ່​ແລ້ວ​ນັ້ນ ແຕ່​ຍັງ​ສາ­ມາດ​ຕອບ​ສະ­ໜອງ​ຄວາມ​ຕ້ອງ­ການ​ທາງ​ດ້ານ​ການ​ຈະ­ລາ­ຈອນ ພ້ອມ​ນັ້ນ ຍັງ​ມີ​ບົດ­ບາດ​ທາງ​ບວກ​ຕໍ່​ການ​ສົ່ງ­ເສີມ​ການ​ພັດ­ທະ­ນາ​ເສດ­ຖະ­ກິດ ແລະ ສັງ­ຄົມ​ຂອງ​ເສດ­ຖະ­ກິດ​ພິ­ເສດ​ບໍ່​ເຕັນ ສາ­ມາດ​ປົກ​ປັກ​ຮັກ­ສາ​ສະ­ພາບ​ແວດ​ລ້ອມ ລະ­ບົບ​ນິ­ເວດ​ຕາມ​ຂອບ​ເຂດ​ແລວ​ທາງ ຄວບ​ຄຸມ​ຂະ­ໜາດ​ຂອງ​ໂຄງ­ການ ພ້ອມ​ສາ­ມາດ​ເລັ່ງ​ຂະ​ບວນ​ການ​ສົ່ງ­ເສີມ​ໂຄງ­ການ ແລະ ດ້ານ​ອື່ນໆ ເຊິ່ງ​ແລວ​ທາງ​ທີ່​ຖືກ​ເລືອກ​ມີ​ຄວາມ​ຍາວ​ທັງ​ໝົດ 181 ກິ­ໂລ­ແມັດ ໃນ​ນີ້ ສະ­ເພາະ​ຄວາມ​ຍາວ​ຂອງ​ທາງ​ດ່ວນ​ແມ່ນ 167,4 ກິ​ໂລ ແລະ ຄວາມ​ກວ້າງ​ທາງ​ແມ່ນ 22,5 ແມັດ ທາງ​ເຊື່ອມ​ຕໍ່​ກັບ​ທາງ​ດ່ວນ​ເປັນ​ທາງ​ຊັ້ນ 1 ຍາວ 13,6 ກິ​ໂລ ຄວາມ​ກວ້າງ​ໜ້າ​ທາງ 20 ແມັດ ປະ­ກອບ​ມີ​ອຸ​ໂມງ​ຈຸດ ນາ​ເສີຍ ແຂວງ​ຫຼວງ​ນ້ຳ​ທາ ຈຸດ​ເຂດ​ປ່າ​ສະ­ຫງວນ​ແຫ່ງ​ຊາດ​ນ້ຳ​ທາ ຈຸດ​ເຂດ​ປ່າ​ສະ­ຫງວນ​ແຫ່ງ​ຊາດ​ນ້ຳ­ຕານ ແລະ ຈຸດ​ບ້ານ​ປຸງ ນອກ​ນັ້ນ ຍັງ​ມີ​ຂົວ​ໃຫຍ່​ຂະ­ໜາດ 1.050 ກິ​ໂລ ແລະ ການ​ພົວ­ພັນ​ລະ­ຫວ່າງ​ເສັ້ນ­ທາງ ແລະ ເຂດ​ເສດ­ຖະ­ກິດ​ພິ­ເສດ​ບໍ່​ເຕັນ​ຈະ​ເປັນ​ຜົນ​ດີ​ຂອງ​ການ​ຍົກ​ລະ­ດັບ​ທາງ​ຫຼວງ​ແຫ່ງ​ຊາດ​ເລກ​ທີ 13 ເໜືອ ເປັນ​ທາງ​ຊັ້ນ 1 ແລະ ເປັນ​ທາງ​ມາດ­ຕະ­ຖານ​ທາງ​ຊັ້ນ 1 ພ້ອມ​ນັ້ນ ຍັງ​ສາ­ມາດ​ນຳ​ໃຊ້​ເປັນ​ເສັ້ນ­ທາງ​ສາຍ​ຫຼັກ​ຂອງ​ເຂດ​ນີ້ ສາ­ມາດ​ເສື່ອມ​ຈອດ​ກັບ​ເສັ້ນ­ທາງ​ອື່ນໆ​ອີກ ຍັງ​ສ້າງ​ຄວາມ​ສະ­ດວກ​ໃຫ້​ແກ່​ການ​ຈະ­ລາ­ຈອນ​ໃນ​ເຂດ​ນີ້​ເຂົ້າ​ຫາ​ທາງ​ດ່ວນ​ບໍ່​ເຕັນ​ຫາ​ຫ້ວຍ​ຊາຍ ສາ­ມາດ​ກະ­ຕຸກ​ຊຸກ­ຍູ້​ການ​ພັດ­ທະ­ນາ​ເສດ­ຖະ­ກິດ.

ຂ່າວທີ່ກ່ຽວຂ້ອງ