ຂ່າວຫຼ້າສຸດ

ຫາດຊາຍຟອງ ຈະໃຊ້ມາດຕະການເຂັ້ມງວດ ຕໍ່ຜູ້ປະກອບການຂຸດຄົ້ນຫີນແຮ່-ຊາຍ

209 10 ກ.ກ. 2018 ຂ່າວໜ້າ​ໜຶ່ງ

   ກອງ​ປະ­ຊຸມ​ສະ­ຫຼຸບ​ການ­ຈັດ­ຕັ້ງ​ການ​ຂຸດ​ຄົ້ນ​ຫີນ​ແຮ່-ຊາຍ ປະ­ຈຳ​ປີ 2018 ຂອງ​ຫ້ອງ­ການ ຍທຂ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 4 ກໍ­ລະ­ກົດ 2018 ຢູ່​ສຳ­ນັກ­ງານ​ປົກ­ຄອງ​ເມືອງ ໂດຍ​ເປັນ​ປະ­ທານ​ຂອງ ທ່ານ ແກ່ນ ວໍ­ລະ​ສານ ເຈົ້າ­ເມືອງ​ຫາດ​ຊາຍ​ຟອງ ທ່ານ ພູມ​ເຢັນ ຂຸນ​ທິ​ກຸມ­ມານ ຫົວ­ໜ້າ​ພະ​ແນກ​ກົມ​ທາງ­ນ້ຳ ກະ­ຊວງ ຍທຂ ມີ​ຕາງ­ໜ້າ​ຈາກ​ພະ​ແນກ ຍທຂ ນວ ພາກ­ສ່ວນ​ກ່ຽວ­ຂ້ອງ​ຂອງ​ເມືອງ ບ້ານ ແລະ ຜູ້​ປະ­ກອບ​ການ​ເຂົ້າ​ຮ່ວມ.

   ທ່ານ ພູ​ທົງ ລັດ­ຕະ­ນະ​ວົງ ຫົວ­ໜ້າ​ຫ້ອງ­ການ ຍທຂ ເມືອງ ໄດ້​ກ່າວ​ລາຍ​ງານ​ວ່າ: ເມືອງ​ຫາດ​ຊາຍ​ຟອງ ເປັນ​ເມືອງ​ທີ່​ມີ​ທ່າ­ແຮງ​ໃນ​ການ​ຂຸດ​ຄົ້ນ​ຫີນ​ແຮ່-ຊາຍ ເພື່ອ​ຕອບ​ສະ­ໜອງ​ໃຫ້​ແກ່​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ຂອງ​ເມືອງ ແລະ ນະ­ຄອນ­ຫຼວງ ມີ​ຊາຍ​ແດນ​ຕິດ​ກັບ​ແມ່­ນ້ຳ​ຂອງ​ຍາວ 50 ກິ­ໂລ­ແມັດ ໃນ​ປັດ­ຈຸ­ບັນ​ການ​ຂຸດ​ຄົ້ນ​ຊັບ ພະ­ຍາ­ກອນ​ທຳ​ມະ​ຊາດ​ຫີນ​ແຮ່-ຊາຍ ທີ່​ໄດ້​ຮັບ​ອະ­ນຸ­ຍາດ​ຈາກ​ພາກ­ສ່ວນ​ກ່ຽວ­ຂ້ອງ​ໃຫ້​ບໍ­ລິ­ສັດ​ລົງ​ສຳ​ປະ­ທານ​ຂຸດ​ຄົ້ນ​ຢູ່​ເມືອງ​ຫາດ​ຊາຍ​ຟອງ ມີ​ທັງ​ໝົດ 19 ບໍ­ລິ­ສັດ ແບ່ງ​ອອກ​ເປັນ 4 ເຂດ​ຄື: ເຂດ​ບ້ານ​ຫາດ​ດອກ​ແກ້ວ ເຂດ​ຊາຍ​ຟອງ​ໃຕ້-ໂຄກ​ຊາຍ-ສີ​ຖານ​ໃຕ້ ເຂດ​ບ້ານ​ຖິ່ນ​ຕົມ-ຊຽງ​ຄວນ-ທ່າ​ພະ ແລະ ເຂດ​ບ້ານ​ຄວາຍ​ແດງ-ບ້ານ​ສິມ​ມະ­ໂນ​ໃຕ້ ໃນ​ນັ້ນ ທາງ​ກະ­ຊວງ ຍທຂ ໄດ້​ອອກ​ອະ­ນຸ­ຍາດ 3 ບໍ­ລິ­ສັດ ພະ​ແນກ ຍທຂ ອອກ​ອະ­ນຸ­ຍາດ 8 ບໍ­ລິ­ສັດ ແລະ ເມືອງ​ໄດ້​ອອກ​ອະ­ນຸ­ຍາດ 8 ບໍ­ລິ­ສັດ.

   ໃນ​ໄລ­ຍະ​ຜ່ານ​ມາ ການ­ຈັດ­ຕັ້ງ​ປະ­ຕິ­ບັດ​ອອກ​ອະ­ນຸ­ຍາດ​ການ​ຂຸດ​ຄົ້ນ​ຫີນ​ແຮ່-ຊາຍ ແມ່ນ​ໄດ້​ມີ​ນິ­ຕິ​ກຳ ດຳ­ລັດ ແລະ ກົດ­ໝາຍ​ກ່ຽວ­ຂ້ອງ ທີ່​ທາງ​ສູນ​ກາງ​ວາງ​ອອກ ເພື່ອ​ການ​ຄຸ້ມ​ຄອງ​ຢ່າງ​ຮັດ­ກຸມ ແລະ ເປັນ​ໄປ​ຕາມ​ລະ­ບຽບ​ການ​ທີ່​ວາງ​ໄວ້ ແຕ່​ກໍ່​ຍັງ​ມີ​ບາງ​ບໍ­ລິ­ສັດ​ທີ່​ຝ່າ­ຝືນ​ບໍ່​ປະ­ຕິ­ບັດ​ຕາມ​ລະ­ບຽບ​ກົດ­ໝາຍ ເປັນ­ຕົ້ນ ບັນ­ທຸກ​ນ້ຳ­ໜັກ​ເກີນ ບໍ່​ຫຸ້ມ​ຫໍ່​ຜ້າ​ປົກ​ປິດ​ໃຫ້​ແຈບ​ເຮັດ​ໃຫ້​ເສດ​ຫີນ​ແຮ່-ຊາຍ ຕົກ­ເຮ່ຍ​ຢູ່​ຕາມ​ແຄມ  ທາງ​ສ້າງ​ຄວາມ​ເປິ​ະ​ເປື້ອນ ເສັ້ນ­ທາງ​ເປ່​ເພ ແລະ   ເປັນ​ຂີ້­ຝຸ່ນ​ໄງ່​ສ້າງ​ຄວາມ​ລຳ­ບາກ​ໃຫ້​ແກ່​ປະ­ຊາ­ຊົນ​ທີ່​ອາ­ໄສ​ຢູ່​ບໍ­ລິ­ເວນ​ແຄມ​ທາງ ສ່ວນ​ບໍ­ລິ­ສັດ​ແມ່ນ​ໄດ້​ຮັບ​ຜົນ​ປະ­ໂຫຍດ ການ​ກຳ­ນົດ​ເຂດ​ເທ­ສະ​ບານ​ເມືອງ ຍົກ­ເວັ້ນ​ບໍ່​ໃຫ້​ລົດ​ບັນ­ທຸກ​ໜັກ​ຜ່ານ​ເສັ້ນ­ທາງ​ດັ່ງ­ກ່າວ​ແຕ່​ກໍ່​ຍັງ​ບໍ່​ປະ­ຕິ­ບັດ​ຕາມ ການ​ຖອກ​ງົບ­ປະ­ມານ​ຂອງ​ບໍ­ລິ­ສັດ​ຍັງ​ບໍ່​ໄດ້​ຕາມ​ກຳ­ນົດ​ໝາຍ ເຮັດ​ໃຫ້­ການ​ຈັດ​ເກັບ​ລາຍ​ຮັບ​ແມ່ນ​ບໍ່​ໄດ້​ຕາມ​ແຜນ ຕໍ່​ກັບ​ຂໍ້​ມູນ​ທີ່​ກ່າວ​ມາ​ນັ້ນ​ກອງ​ປະ­ຊຸມ​ກໍ່​ພ້ອມ​ກັນ​ເອົາ­ໃຈ­ໃສ່​ຄົ້ນ​ຄົ້ວ​ເພື່ອ​ຊອກ​ຫາ​ທາງ​ແກ້​ໄຂ ແລະ ໃຊ້​ມາດ​ຕະ­ການ​ໃນ​ການ­ຈັດ­ຕັ້ງ​ປະ­ຕິ­ບັດ​ຕໍ່​ຜູ້​ທີ່​ລະ­ເມີດ​ລະ­ບຽບ​ການ​ຈະ​ຖືກ​ສຶກ​ສາ​ອົບ­ຮົມ​ຕັກ­ເຕືອນ​ປັບ​ໃໝ​ແທນ​ຄ່າ​ເສຍ​ຫາຍ ບໍ­ລິ­ສັດ​ໃດ​ຫາກ​ຕໍ່​ອະ­ນຸ­ຍາດ​ຊ້າ ແລະ ຖອກ​ພັນ­ທະ​ຊ້າ​ຈະ​ຖືກ​ປັບ​ໃໝ 2% ຂອງ​ມູນ​ຄ່າ ບໍ່​ໃຫ້​ລົດ​ບັນ­ທຸກ​ຫີນ​ແຮ່-ຊາຍ ແລ່ນ​ຜ່ານ​ເສັ້ນ­ທາງ​ທ່າ​ເດື່ອ ໂພນ​ບົກ ຫາກ​ກໍ­ລະ­ນີ​ຈັບ​ໄດ້​ຈະ​ຖືກ​ປັບ​ໃໝ​ຢຶດ​ລົດ​ດຳ­ເນີນ​ຄະ­ດີ​ຕາມ​ກົດ­ໝາຍ ຫ້າມ​ບໍ່​ໃຫ້​ລົດ​ບັນ­ທຸກ​ທຸກ​ປະ­ເພດ​ແລ່ນ​ຜ່ານ​ເທ­ສະ​ບານ​ເມືອງ​ຢ່າງ​ເດັດ­ຂາດ ໃຫ້​ໄປ​ນຳ​ໃຊ້​ເສັ້ນ­ທາງ​ວົງ​ແຫວນ​ຮອບ​ໃນ ຖ້າ​ພົບ​ເຫັນ​ຈະ​ຖືກ​ປັບ​ໃໝ ຮອດ​ລະ­ດູ­ຝົນ​ການ​ບັນ­ທຸກ​ຕ້ອງ​ຫຼຸດ​ນ້ຳ­ໜັກ​ລົງ 20% ການ​ດູດ​ຫີນ​ແຮ່-ຊາຍ ຫ່າງ​ຈາກ​ແຄມ​ຝັ່ງ​ບໍ່​ເຖິງ 100 ແມັດ​ຈະ​ຖືກ​ກ່າວ​ເຕືອນ ພ້ອມ​ປັບ​ໃໝ​ຕາມ​ລະ­ບຽບ​ການ 7737 ຫາກ​ບໍ­ລິ­ສັດ​ໃດ​ມີ​ບັນ­ຫາ​ພາຍ​ໃນ​ສ້າງ​ຄວາມ​ຫຍຸ້ງ­ຍາກ​ໃຫ້​ຄະ­ນະ​ກຳ­ມະ­ການ​ແມ່ນ​ຈະ​ຖືກ​ປິດ​ກິດ­ຈະ­ການ​ທັນ­ທີ ຕໍ່​ກັບ​ບໍ­ລິ­ສັດ​ທີ່​ຈົກ​ເອົາ​ດິນ​ດຳ​ແຄມ​ຝັ່ງ​ອອກ​ຈະ​ຖືກ​ປັບ​ໃໝ​ແມັດ​ກ້ອນ​ລະ 100.000 ກີບ ພ້ອມ​ຢຶດ​ພາ­ຫະ­ນະ​ກົນ​ຈັກ ດັ່ງ­ນັ້ນ ເພື່ອ​ໃຫ້​ແຕ່​ລະ​ບໍ­ລິ­ສັດ​ທີ່​ຂຸດ​ຄົ້ນ​ຈົ່ງ​ພ້ອມ​ກັນ​ເອົາ​ໃສ່​ປະ­ຕິ­ບັດ​ລະ­ບຽບ​ການ​ຢ່າງ​ເຂັ້ມ​ງວດ ເພື່ອ​ປະ­ກອບ­ສ່ວນ​ໃນ​ການ​ສ້າງ­ສາ​ພັດ­ທະ­ນາ​ເມືອງ​ຫາດ​ຊາຍ​ຟອງ ໃຫ້​ຈະ­ເລີນ​ກ້າວ­ໜ້າ​ຕໍ່​ໄປ​ເລື້ອຍໆ.

ຂ່າວທີ່ກ່ຽວຂ້ອງ