ຂ່າວຫຼ້າສຸດ

4 ທີມສຸດທ້າຍ !

327 09 ກ.ກ. 2018 ວົງຈອນກີລາ
4 ທີມສຸດທ້າຍ  !

ເຮົາໄດ້ 4 ທີມສຸດທ້າຍໃນຮອບຮອງຊະນະເລີດ ເຕະບານໂລກ 2018 ຄົບແລ້ວ ອັນປະກອບໄປດ້ວຍ ຝຣັ່ງ ແບນຊິກ ອັງກິດ ແລະ ກຣົວຊີໂດຍ ຝຣັ່ງ ຈະພົບ ແບນຊິກ ໃນຄືນວັນອັງຄານທີ 10 ກໍລະກົດນີ້ ເວລາ 01.00 ໂມງ ຂະນະທີ່ຄູ່ ອັງກິດ ພົບ ກຣົວຊີ ເປັນຄືນວັນພຸດທີ 11 ກໍລະກົດເວລາ 01.00 ໂມງເຊ່ັນດຽວກັນ.

ນີ້ກໍຄືອັດຕາຕໍ່ລອງແຊັມຫຼ້າສຸດທີ່ ແລັດໂບຣັກ ເປິດເອົາໄວ້ ຝຣັ່ງ 2-1, ອັງກິດ 5-2, ແບນຊິກ 11-4 ແລະ ກຣົວຊີ 4-1 ຈະເຫັນໄດ້ວ່າໃກ້ຄຽງກັນຫຼາຍ ແຕ່ “ວົງຈອນກິລາຂອງວຽງຈັນໃໝ່” ຈະພາໄປເບິ່ງຈຸດອ່ອນ ຈຸດແຂງຂອງທັງ 4 ທີມກັນ.

ຝຣັ່ງ... ຝຣັ່ງມາຫຼິ້ນລາຍການນີ້ແບບມີຄວາມສາມາດເຕັມທີ່ ດີດິເຢ່ ເດຊັອງ ເປັນຜູ້ຈັດການທີ່ເນ້ັນຜົນການແຂ່ງຂັນ ແລະ ເຂົາໂຊກດີທີ່ມີຂຸມກຳລັງໃຫຍ່ໂຕ ຕົວເລືອກເຕັມໄປໝົດ ຕົວເຂ້ົາຍິງປະຕູຢ່າງ ອັອງຕວນ ກຣີຊມັນ ໄວ້ໃຈໄດ້ ແຖມ ຄິລິຢັນ ເອັມບັບເປ ດາວຮຸ່ງຈາກ ປາຣີສ ແຊງ-ແຊກແມງ ກໍຫຼິ້ນໄດ້ດີເກີນອາຍຸ ກໍເລີຍຍິ່ງເຮັດໃຫ້ ກຣີຊມັນ ກັບ ໂອລິວິເຢ່ ຊິຣູ ຫຼິ້ນງ່າຍ ການມີ ເອັນໂຄໂລ່ ກັອງເຕ ໃນແດນກາງ ຖືວ່າເປັນສິ່ງທີ່ປະເສີດຈິງໆ ກັອງເຕ ນີ້ແຫລະທີ່ເຮັດໃຫ້ ເລສເຕີ ກັບ ເຊວຊີ ເປັນແຊັມພຣີເມຍລີກມາແລ້ວ ສະພາບຈິຕໃຈຂອງທີມຊາດຝຣັ່ງ ກໍຖືວ່າໂດດເດັ່ນດ້ວຍ ການຖະຫຼົ່ມ ອາກຊັງຕິນ ກັບ ອຸຣຸກວັຍ 2 ທີມຈາກອາເມຣິກາໃຕ້ໃນຮອບກ່ອນໜ້ານີ້ ແລະ ຍິງໄດ້ລວມ 6 ປະຕູ ສົມຄວນຍົກໃຫ້ພວກເຂົາເປັນຕົວເກງອັນດັບ 1 ຈິງໆ ແຕ່ລູກແອັກທ່າຂອງ ປອນ ປັອກບາ ການໃຊ້ໂອກາດເປືອງຂອງ ຊິຣູ ແລະ ລູກເຜີຂອງ ອູໂກ ໂຢຣິສ ໃນບາງຄັ້ງ ເປັນສິ່ງທີ່ ຝຣັ່ງ ຈະຕ້ອງປ້ອງກັນບໍ່ໃຫ້ມັນເກີດຂຶ້ນ.

ແບນຊິກ... ຜ່ານຕົວເກງອັນດັບ 1  ຢ່າງບຣາຊິນ ມາໄດ້ ນາທີນີ້ ແບນຊິກຝັນເຖິງການເປັນແຊັມໂລກໄດ້ເລີຍ ວັນທີ່ຊະນະແຊັມໂລກ 5 ສະໄໝ ໂຣແບໂຕ ມາຕິເນຊ ໃຊ້ນັກເຕະທີ່ຫຼິ້ນໃນພຣີເມຍລີກເຖິງ 9 ຄົນ ເປັນ 11 ຄົນທໍາອິດ ຂຸມກໍາລັງຂອງພວກເຂົາເຫຼືອກິນເຫຼືອໃຊ້ຈິງໆ ແຜງຫຼັງຢ່າງ ໂທບີ ອັນເດີໄວເຣວ ແຢນ ແຟຕັອງເກນ ແລະ ແວັງຊັອງ ກອມປານີ ຖືວ່າແຂງແກ່ນ ເອແດັນ ອາຊາ ໄປກັບບານໄດ້ດີ ແລະ ທີເດັດຂອງພວກເຂົາກໍຄື ເຄວິນ ເດີ ບຣອຍ ທີ່ໂດ່ງບານໄດ້ສຽບຂາດເໜືອຊັ້ນເຫຼືອເກີນ ແຕ່ຈຸດອ່ອນຂອງພວກເຂົາ ເຫັນວ່າ ໂຣເມລູ ລູກາກູ ເວລາຫຼິ້ນເກມໃຫຍ່ແລ້ວມັກຈະຍິງປະຕູບໍ່ໄດ້ ນີ່ຄືສິ່ງທີ່ ລູກາກູ ຈະຕ້ອງພິສູດຕົວເອງ ແລະ ຍິງປະຕູໃນ 2 ນັດສໍາຄັນທີ່ເຫຼືອໃຫ້ໄດ້ ຊຶ່ງ ແບນຊິກມີໂຣແບໂຕ ມາຕິເນຊ ເປັນຜູ້ຈັດການທີມ ຊຶ່ງໃນອະດີດເຄີຍພາທີມນ້ອຍໆຢ່າງ ວີແກນ ເປັນແຊັມເອຟເອ ຄັບ ມາແລ້ວ ພວກເຂົາມີໂອກາດເປັນແຊັມໂລກບໍ່ໜ້ອຍເລີຍ ພົບກັບ ຝຣັ່ງ ຫຼາຍຄົນໃຫ້ໂອກາດຝຣັ່ງ ດີກວ່າພຽງແຕ່ 51-49 ເທົ່ານັ້ນ.

ອັງກິດ... ຫຼິ້ນດ້ວຍຄວາມໝັ້ນໃຈ ການທີ່ພວກເຂົາເອົາຊະນະຈຸດອ່ອນຕົວເອງດ້ວຍການດວນຈຸດໂທດຊະນະ ໂກໂລມບີ ໃນຮອບ 16 ທີມສຸດທ້າຍ ເປັນການຊຸກຍູ້ໃຫ້ທີມລະເບີດຟອມໃນຮອບ 8 ທີມກັບ ຊູແອັດ ໄດ້ ຊຶ່ງສິ່ງທີ່ ອັງກິດຕ້ອງການກໍຄື ເດເລ່ ອັນລີ່ ເຈສຊີ່ ລິນກາດ ແລະ ຣາຮິມ ສະເຕີລິງ ຈະຕ້ອງຊ່ວຍແບ່ງເບົາພາລະຂອງ ແຮຣີ່ ເຄນ ຊຶ່ງກັບ ຊູແອັດ ອັນລີ່ເປັນຄົນຍິງໄດ້ ເກມຮັບຂອງ ອັງກິດ ແຂງແກ່ນຈິງໆ ຄວາມໃຫຍ່ຂອງ ແຮຣີ່ ແມັກໄກວ ມີປະໂຫຍດຫຼາຍ ເຖິງແມ່ນຈະສຽວໆເວລາທີ່ ໄຄຼ ວອກເກີ ອອກເອົາບານແດ່ກໍຕາມ ບວກກັບການມີ ຈໍແດນ ພິກຟອດ ທີ່ປ້ອງກັນໄດ້ດີ ອັງກິດຊຸດນີ້ໄປເຖິງແຊັມໂລກໄດ້ເລີຍ ພວກເຂົາເບິ່ງແລ້ວໄດ້ປຽບ ກຣົວຊີ ເລັກນ້ອຍດ້ວຍ ເພາະ ກຣົວຊີຕ້ອງຫຼິ້ນ 120 ນາທີ 2 ເກມຕິດຕໍ່ກັນ ແຖມນັກເຕະແຫ້ງກອບເປັນເຂ້ົາຂຽບ ເຈັບກັນຫຼາຍຕົວດ້ວຍ ຈຸດທີ່ ອັງກີດຈະຕ້ອງລະວັງກໍຄືຢ່າໄປເນ້ັນຫຼິ້ນສວຍງາມ ຫຼືເໜືອຊັ້ນຫຼາຍເກີນໄປ ຫຼິ້ນບໍ່ຫ້າວຫັນບູຮານແບບນີ້ນີ່ແຫລະ ເນ້ັນລູກຕັ້ງເຕະ ໃຊ້ຄວາມແຂງແກ່ນໃຫ້ເປັນປະໂຫຍດ ແລະ ແກເຣດ ເຊົາເກດ ຄວນຈະກະຕຸ້ນ ຣາຮິມ ສະເຕີລິງ ໃຫ້ຫຼາຍໆດ້ວຍ ວ່າເຂົາຄວນຈະໄປເອງຫຼືສ່ົງໃຫ້ໝູ່ຄູ່ໃນຈັງຫວະໃດ ເຫັນນັກເຕະຄົນນີ່ຫຼິ້ນບານໂລກແລ້ວເຊັງເລີຍ ໃນຮອບຕັດເຊືອກໃຫ້ໂອກາດອັງກິດ 60-40.

ກຣົວຊີ... ຜ່ານເຈ້ົາພາບຣັດເຊຍມາແບບຫືດຈັບ ດ້ວຍການດວນຈຸດໂທດຊະນະ 4-3 ຫຼັງເສະເໝີໃນ 90 ນາທີ 1-1 ແລະ 120 ນາທີ 2-2 ຊຶ່ງທີມ ກຣົວຊີເປັນທີມທີ່ເຕັກນິກສູງ ຄອງບານໄດ້ດີ ມີ ລູກາ ໂມດຣິຊ ເປັນຈອມທັບ ບານອອກຈາກຕີນຂອງເຂົາລ້ວນມີຄວາມໝາຍ ຕົວນັກເຕະຢ່າງ ມາຣິໂອ ມານຊູຄິຊ  ອີວານ ຣາຄິຕິຊ  ອີວານ ເປຣິຊິຊ ຯລຯ ກໍປະສົບການສູງ ແລະ ອັນຕະລາຍເຫຼືອເກີນ ຊຶ່ງການທີ່ ກຣົວຊີ ຊະນະຈຸດໂທດມາ 2 ຮອບຕິດຕໍ່ກັນ ດ້ວຍການປາບ ດານມາກ ແລະ ຣັດເຊຍ ໄດ້ນັ້ນ ເປັນການບ່ົງບອກວ່າຫົວຈິດຫົວໃຈຂອງພວກເຂົາແຂງແກ່ນພຽງໃດ ແຕ່ກໍຢ່າງທີ່ເຫັນ ສະພາບທີມຂອງ ກຣົວຊີ ບອບຊໍ້າຫຼາຍ ຄວາມອິດອ່ອນນີ່ແຫລະທີ່ຈະເຮັດໃຫ້ ກຣົວຊີ ເບິ່ງແລ້ວເປັນຮອງອັງກິດ ຢ່າງໃດກໍຕາມ ຄວາມເປັນບານຂອງພວກເຂົາມີຫຼາຍກວ່າອັງກິດ ດັ່ງນັ້ນ ກຣົວຊີກໍມີໂອກາດທີ່ຈະເຂ້ົາຊິງບໍ່ໜ້ອຍ.

ນັກວິເຄາະຫຼາຍຄົນຢືນຢັນ ຄູ່ ຝຣັ່ງ vs ແບຮຊິກ ເລືອກຍາກຫຼາຍ ແຕ່ກັ້ນໃຈຊີ້ໄປທີ່ ແບນຊິກ ເພາະ ເຄວິນ ເດີ ບຣອຍ ຫຼິ້ນດີເຫຼືອເກິນ ສ່ວນຄູ່ ອັງກິດ vs ກຣົວຊີ ເລືອກ ອັງກິດ ເພາະວ່າສົດກວ່າເຫັນໆເລີຍ.

ຂ່າວທີ່ກ່ຽວຂ້ອງ