ລາວ-ຮົງກາຣີ ໃຫ້ການສະໜັບສະໜູນຮ່ວມມືຫຼາຍດ້ານ

263 09 ກ.ກ. 2018 ຂ່າວໜ້າ​ໜຶ່ງ
ລາວ-ຮົງກາຣີ ໃຫ້ການສະໜັບສະໜູນຮ່ວມມືຫຼາຍດ້ານ

   ວັນ​ທີ 6 ກໍ­ລະ­ກົດ 2018 ທີ່​ທຳ​ນຽບ​ປະ­ທານ​ປະ­ເທດ ທ່ານ ພັນ​ຄຳ ວິ­ພາ​ວັນ ຮອງ​ປະ­ທານ​ປະ­ເທດ ໄດ້​ໃຫ້​ກຽດ​ຕ້ອນ­ຮັບ​ການ​ເຂົ້າ​ຢ້ຽມ​ອຳ​ລາ​ຂອງ​ທ່ານ Peter JAKAB ເອກ​ອັກ​ຄະ​ລັດ​ຖະ​ທູດ​ຮົງ​ກາ​ຣີ ປະ­ຈຳລາວ ໃນ​ໂອ­ກາດ​ສຳ­ເລັດ​ໜ້າ­ທີ່​ການ​ທູດ​ຢູ່​ລາວ.

   ໃນ​ຊຸມ​ປີ 1992-1993 ສອງ​ປະ­ເທດ​ຕ່າງ​ຝ່າຍ​ກໍ່​ມີ​ຄວາມ​ຫຍຸ້ງ­ຍາກ​ທາງ​ດ້ານ​ເສດ­ຖະ­ກິດ ແລະ ການ​ເງິນ ຈຶ່ງ​ໄດ້​ປິດ​ສະ­ຖານ­ທູດ​ຂອງ​ຕົນ​ຢູ່​ປະ­ເທດ​ຂອງ​ກັນ ແລະ ກັນ ແຕ່​ການ​ພົວ­ພັນ​ສອງ​ຝ່າຍ​ຍັງ​ຮັກ­ສາ​ໄວ້​ຢູ່​ໃນ​ສະ­ພາບ​ປົກ­ກະ­ຕິ ເຊັ່ນ: ສອງ​ປະ­ເທດ​ສືບ­ຕໍ່​ສະ­ໜັບ­ສະ­ໜູນ​ເຊິ່ງ​ກັນ ແລະ ກັນ ໃນ​ພາກ​ພື້ນ ແລະ ສາ­ກົນ ມີ​ການ​ແລກ­ປ່ຽນ​ຢ້ຽມ­ຢາມ​ຂອງ​ຄະ­ນະ​ຜູ້​ແທນ​ຮ່ວມ​ກັນ​ຢ່າງ​ເປັນ​ປົກ­ກະ­ຕິ.

   ພ້ອມ​ນີ້ ມີ​ການ​ພົວ­ພັນ​ກັນ​ຢ່າງ​ສະ­ໜິດ​ແໜ້ນ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ກະ­ຊວງ​ກະ­ສິ­ກຳ ແລະ ພັດ­ທະ­ນາ​ຊົນ­ນະ­ບົດ ຮົງ​ກາ​ຣີ ເຊິ່ງ​ເລີ່ມ​ຈາກ​ການ​ແລກ­ປ່ຽນ​ຂໍ້​ມູນ​ຂ່າວ­ສານ ການ​ສົ່ງ​ຊ່ຽວ­ຊານ​ດ້ານ​ວິ­ຊາ​ການ​ໃຫ້​ແກ່​ລາວ ມີ​ທັດ­ສະ­ນະ​ສຶກ​ສາ​ວິ­ຊາ​ການ ແລະ ການ​ຢ້ຽມ­ຢາມ​ຂອງ​ການ​ນຳ​ຂັ້ນ​ສູງ​ຂອງ​ສອງ​ກະ­ຊວງ ແລະ ສອງ​ຝ່າຍ​ໄດ້​ມີ​ການ​ແລກ­ປ່ຽນ​ຖອດ​ຖອນ​ບົດ­ຮຽນ ໃນ​ການ​ຄົ້ນ­ຄວ້າ​ແນວ​ພັນ ແລະ ການ​ຜະ­ລິດ​ສັດ ການ​ປະ­ມົງ ແລະ ຊົນ­ລະ­ປະ­ທານ.

   ທັງ​ສອງ​ປະ­ເທດ​ໄດ້​ໃຫ້­ການ​ສະ­ໜັບ­ສະ­ໜູນ​ເຊິ່ງ​ກັນ ແລະ ກັນ ໃນ​ເວ­ທີ​ສາ­ກົນ ລັດ­ຖະ­ບານ​ລາວ ກໍ່​ໄດ້​ໃຫ້­ການ​ສະ­ໜັບ­ສະ­ໜູນ ຮົງ​ກາ​ຣີ ໃນ​ການ​ສະ­ໝັກ​ເປັນ​ສະ­ມາ­ຊິກ​ບໍ່​ຖາ­ວອນ​ຂອງ​ສະ­ຫະ­ພາບ​ຄວາມ​ໝັ້ນ­ຄົງ ສປຊ ສຳ­ລັບ​ໄລ­ຍະ​ປີ 2012-2013 ລັດ­ຖະ­ບານ​ຮົງ​ກາ​ຣີ ໄດ້​ໃຫ້­ການ​ສະ­ໜັບ­ສະ­ໜູນ​ລາວ ເຂົ້າ​ເປັນ​ສະ­ມາ­ຊິກ​ອົງ­ການ​ການ​ຄ້າ​ໂລກ ຮົງ​ກາ​ຣີ​ສະ­ເໜີ​ຂໍ​ໃຫ້​ລາວ​ສະ­ໜັບ­ສະ­ໜູນ​ຮົງ​ກາ​ຣີ ໃນ​ການ​ສະ­ໝັກ​ເຂົ້າ​ຢູ່​ໃນ​ຄະ­ນະ​ກຳ­ມາ​ທິ​ການ​ສິດ­ທິ​ຂອງ​ຄົນ​ພິ­ການ ໃນ​ສົກ​ປີ 2017-2020 ເຊິ່ງ​ຈັດ​ຂຶ້ນ​ທີ່ ນິວ​ຢອກ ເດືອນ​ມິ­ຖຸ­ນາ 2016 ລາວ ໄດ້​ໃຫ້­ການ​ສະ­ໜັບ­ສະ­ໜູນ ຮົງ​ກາ​ຣີ ໃນ​ການ​ສະ­ໝັກ​ເຂົ້າ​ເປັນ​ສະ­ມາ­ຊິກ ຄະ­ນະ​ກຳ­ມາ​ທິ​ການ​ວ່າ​ດ້ວຍ​ການ​ລົບ​ລ້າງ​ທຸກ​ຮູບ​ແບບ​ຂອງ​ການ​ຈຳ­ແນກ​ເຊື້ອ​ຊາດ ໃນ​ປີ 2018-2021 ເຊິ່ງ​ການ​ເລືອກ​ຕັ້ງ​ໄດ້​ຈັດ​ຕັ້ງ​ຂຶ້ນ​ວັນ​ທີ 22 ມິ­ຖຸ­ນາ ທີ່​ນິວ​ຢອກ.

ຂ່າວທີ່ກ່ຽວຂ້ອງ