ຂ່າວຫຼ້າສຸດ

ປັບປຸງຂອດການຜະລິດທີ່ມີຄວາມສ່ຽງ ການປົນເປື້ອນໃນອາຫານ

192 09 ກ.ກ. 2018 ຂ່າວໜ້າ​ໜຶ່ງ

   ພະ​ແນກ​ສາ­ທາ­ລະ­ນະ​ສຸກ ນະ­ຄອນ­ຫຼວງ​ວຽງ​ຈັນ ສົມ­ທົບ​ກັບ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນວ (ຖວ​ທ.ນວ) ຈັດ​ກອງ​ປະ­ຊຸມ​ຖອດ​ຖອນ​ບົດ­ຮຽນ​ວຽກ​ງານ​ອາ­ຫານ​ປອດ​ໄພ ຮ່ວມ​ກັບ​ຜູ້​ປະ­ກອບ​ການ​ໂຮງ­ແຮມ ຮ້ານ​ອາ­ຫານ ມິ​ນິ​ມາກ ໂຮງ­ງານ​ຜະ­ລິດ​ອາ­ຫານ ໂຮງ­ງານ​ນ້ຳ​ດື່ມ-ນ້ຳ­ກ້ອນ ໃນ ນວ ເພື່ອ​ຕ້ອນ­ຮັບ​ປີ​ທ່ອງ​ທ່ຽວ​ລາວ ຂຶ້ນ​ວັນ​ທີ 5 ກໍ­ລະ­ກົດ 2018 ຢູ່​ຫ້ອງ​ວ່າ­ການ​ປົກ­ຄອງ​ເມືອງ​ຈັນ­ທະ​ບູ​ລີ ໂດຍ​ມີ​ທ່ານ ດຣ ພອນ​ປະ­ເສີດ ອຸ​ນາ​ພົມ ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ນວ ທ່ານ ຄຳ​ຄູນ ໃບ​ລາ­ຕີ ຮອງ​ຫົວ­ໜ້າ​ພະ​ແນກ ຖວ​ທ.ນວ ພ້ອມ​ດ້ວຍ​ບັນ­ດາ​ກົມ ຂະ­ແໜງ­ການ​ກ່ຽວ­ຂ້ອງ ແລະ ບັນ­ດາ​ຜູ້​ປະ­ກອບ​ການ​ເຂົ້າ​ຮ່ວມ.

   ທ່ານ ດຣ ສົມ​ຈີນ ສິງ­ຫາ​ຣາ​ຊ ຫົວ­ໜ້າ​ຂະ­ແໜງ​ອາ­ຫານ ແລະ ຢາ ກ່າວ​ວ່າ: ເພື່ອ​ແນ­ໃສ່​ເຮັດ​ໃຫ້​ຜູ້​ປະກອບ​ການ​ໂຮງ­ແຮມ ຮ້ານ​ອາ­ຫານ ມິ​ນິ​ມາກ ໂຮງ­ງານ​ຜະ­ລິດ​ອາ­ຫານ ໂຮງ­ງານ​ນ້ຳ​ດື່ມ-ນ້ຳ­ກ້ອນ ໃນ ນວ ເຂົ້າ­ໃຈ ແລະ ເອົາ­ໃຈ­ໃສ່​ປັບ­ປຸງ​ທຸກ​ຂອດ​ການ​ຜະ­ລິດ ​ທີ່​ມີ​ຄວາມ​ສ່ຽງ​ໃນ​ການ​ປົນ​ເປື້ອນ​ເຊື້ອ​ພະ­ຍາດ​ໃສ່​ອາ­ຫານ ບັນ­ດາ​ຫຼັກ­ການຂໍ້​ແນະ­ນຳ​ຕ່າງໆ ເພື່ອ​ນຳ­ໄປ​ຈັດ​ຕັ້ງ​ປະ­ຕິ­ບັດ​ໃຫ້​ໄດ້​ຮັບ​ຜົນ​ດີ ທັງ​ເປັນ​ການ​ຮັບ­ປະ­ກັນ​ຄວາມ​ປອດ​ໄພ​ໃຫ້​ແກ່​ຜູ້​ບໍ­ລິ­ໂພກ​ພາຍ​ໃນ ແລະ ຕ່າງ­ປະ­ເທດ ທົ່ວ ນວ ມີ​ສະ­ຖານ​ປະ­ກອບ​ການ 812 ແຫ່ງ ໃນ​ນີ້​ໂຮງ­ງານ​ຜະ­ລິດ​ນ້ຳ​ດື່ມ 263 ແຫ່ງ ໂຮງ­ງານ​ຜະ­ລິດ​ນ້ຳ­ກ້ອນ 32 ແຫ່ງ ຕູ້​ຜະ­ລິດ​ນ້ຳ­ກ້ອນ 37 ແຫ່ງ ໂຮງ­ງານ​ຜະ­ລິດ​ອາ­ຫານ 82 ແຫ່ງ ຮ້ານ​ມິ​ນິ​ມາກ 73 ແຫ່ງ ໂຮງ­ແຮມ 207 ແຫ່ງ ຮ້ານ​ອາ­ຫານ 118 ແຫ່ງ ໄດ້​ລົງ​ກວດ­ກາ​ຕົວ​ຈິງ​ໂຮງ­ງານ​ນ້ຳ​ດື່ມ 222 ແຫ່ງ ມີ​ໃບ​ທະ­ບຽນ ອຢ 189 ແຫ່ງ ບໍ່​ມີ​ໃບ​ທະ­ບຽນ 65 ແຫ່ງ ທະ­ບຽນ​ໝົດ​ອາ­ຍຸ 22 ແຫ່ງ ໃບ​ດຳ­ເນີນ​ກິດ­ຈະ­ການ​ໝົດ​ອາ­ຍຸ 24 ແຫ່ງ ບັນ­ຫາ​ທີ່​ພົບ​ເຫັນ​ແມ່ນ​ໂຮງ­ງານ​ຜະ­ລິດ​ນ້ຳ​ດື່ມ​ຂາດ​ການ​ອະ­ນາ­ໄມ ບໍ່​ໃສ່​ຊຸດ​ກັນ​ເປື້ອນ​ເວ­ລາ​ທຳ​ການ​ຜະ­ລິດ ໃຊ້​ສາຍ​ຢາງ​ອັດ​ຮ່າຍ​ນ້ຳ​ດື່ມ ໂຮງ­ງານ​ນ້ຳ­ກ້ອນ 59 ແຫ່ງ ມີ​ທະ­ບຽນ ອຢ 2 ແຫ່ງ ບໍ່​ມີ​ທະ­ບຽນ ອຢ 57 ແຫ່ງ ບັນ­ຫາ​ທີ່​ພົບ​ເຫັນ​ແມ່ນ​ນ້ຳ​ກ່ອນ​ແທ່ງ​ໃຊ້​ເຄື່ອງ​ຈັກ​ເກົ່າ ໂຮງ­ງານ​ນ້ຳ­ກ້ອນ​ຂາດ​ການ​ອະ­ນາ­ໄມ ໂຮງ­ແຮມ ແລະ ຮ້ານ​ອາ­ຫານ 105 ແຫ່ງ ບັນ­ຫາ​ທີ່​ພົບ​ເຫັນ​ແມ່ນ​ພະ­ນັກ­ງານ​ຢູ່​ໂຮງ­ແຮມ ແລະ ຮ້ານ​ອາ­ຫານ​ຈຳ­ນວນ​ໜຶ່ງ​ບໍ່​ໄດ້​ກວດ​ສຸ­ຂະ­ພາບ ໃບ­ຢັ້ງ­ຢືນ​ສຸ­ຂະ­ພາບ​ໝົດ​ອາ­ຍຸ ຜູ້​ປຸງ​ແຕ່ງ­ອາ­ຫານ​ຈຳ­ນວນ​ໜຶ່ງ​ບໍ່​ໃສ່​ຜ້າ​ກັນ​ເປື້ອນ ໂຮງ­ງານ​ຜະ­ລິດ​ອາ­ຫານ 69 ແຫ່ງ ມີ​ໃບ​ທະ­ບຽນ ອຢ 7 ແຫ່ງ ບໍ່​ມີ​ໃບ​ທະ­ບຽນ 62 ແຫ່ງ ບັນ­ຫາ​ທີ່​ພົບ​ເຫັນ​ແມ່ນ​ກຳ­ມະ­ກອນ​ບໍ່​ໄດ້​ກວດ​ສຸ­ຂະ­ພາບ ໂຮງ­ງານ​ຂາດ​ການ​ອະ­ນາ­ໄມ ມີ​ສັດ­ລ້ຽງ​ຢູ່​ບໍ­ລິ­ເວນ​ທຳ​ການ​ຜະ­ລິດ ຮ້ານ​ມິ​ນິ​ມາກ 76 ແຫ່ງ ຮ້ານ​ຂາຍ­ເຄື່ອງ​ຍ່ອຍ 206 ຮ້ານ ບັນ­ຫາ​ທີ່​ພົບ​ເຫັນ​ແມ່ນ​ອາ­ຫານ​ໝົດ​ອາ­ຍຸ ບາງ​ຮ້ານ​ບໍ່​ໃຫ້­ການ​ຮ່ວມ​ມື ການ​ຈັດ​ວາງ​ບໍ່​ເປັນ​ລະ­ບຽບ.

   ສຳ­ລັບ​ທິດ​ທາງ​ໃນ­ຕໍ່­ໜ້າ ​ພວກ​ເຮົາ​ຈະ​ແກ້​ໄຂ​ບັນ­ຫາ​ຕ່າງໆ​ທີ່​ຍັງ​ຄົງ​ຄ້າງ​ນຳ​ຜູ້​ປະ­ກອບ​ການ​ແຕ່​ລະ​ແຫ່ງ ​ໃຫ້​ຫຼຸດ​ລົງ​ເທື່ອ​ລະ​ກ້າວ ແນະ­ນຳ​ຜູ້​ປະ­ກອບ​ການ​ໃຫ້​ເອົາ­ໃຈ­ໃສ່​ຫຼັກ­ການ​ສຸ​ຂະ​ອະ­ນາ­ໄມ​ທີ່​ດີ (GHP) ແລະ ຫຼັກ­ການ​ຜະ­ລິດ​ທີ່​ດີ (GMP) ຍົກ​ລະ­ດັບ​ຄວາມ​ຮູ້ ແລະ ຄວາມ​ສາ­ມາດ​ດ້ານ​ວຽກ​ງານ​ກວດ­ກາ​ອາ­ຫານ​ ໃຫ້​ພະ­ນັກ­ງານ​ກວດກາ​ຢ່າງ​ເປັນ​ລະ­ບົບ ແລະ ຕໍ່​ເນື່ອງ ເພື່ອ​ແນ­ໃສ່​ຮັບ­ປະ­ກັນ​ຄວາມ​ປອດ​ໄພ​ໃຫ້​ແກ່​ຜູ້​ບໍ­ລິ­ໂພກ.

ຂ່າວທີ່ກ່ຽວຂ້ອງ