ພາກທຸລະກິດສະເໜີການສົ່ງເງິນຄືນ ອມພ ສຳລັບຜູ້ຜະລິດສົ່ງອອກ

189 09 ກ.ກ. 2018 ຂ່າວໜ້າ​ໜຶ່ງ
ພາກທຸລະກິດສະເໜີການສົ່ງເງິນຄືນ ອມພ ສຳລັບຜູ້ຜະລິດສົ່ງອອກ

   ທ່ານ​ນາງ ວາ­ລີ ເວດ​ສະ​ພົງ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ປະ­ທານ​ບໍ­ລິ­ສັດ ການ​ຢາ​ມິດ­ຕະ­ພາບ ຮອງ​ປະ­ທານ​ບໍ­ລິ­ສັດ BCI (ໂຮງ­ໝໍ​ກະ­ເສມ​ລາດ ອິນ​ເຕີ​ເນ​ຊັ່ນ​ນອລ ວຽງ​ຈັນ) ໄດ້​ຂຶ້ນ​ສະ­ເໜີ​ບັນ­ຫາທີ່​ຕິດ​ພັນ​ການ​ສົ່ງ​ຄືນ​ອາ­ກອນ​ມູນ​ຄ່າ​ເພີ່ມ (ອມພ) ຕໍ່​ພາກ​ລັດ­ຖະ­ບານ​ຢູ່​ໃນ​ກອງ​ປະ­ຊຸມ​ທຸ­ລະ​ກິດ​ລາວ ຄັ້ງ​ທີ 11 ຈັດ​ຂຶ້ນ ວັນ​ທີ 5 ກໍ­ລະ­ກົດ 2018 ວ່າ: ນັບ​ແຕ່​ປີ 2013 ເປັນ­ຕົ້ນ​ມາ ການ​ສົ່ງ​ຄືນ ອມພ ສຳ­ລັບ​ທຸ­ລະ​ກິດ​ທີ່​ຜະ­ລິດ​ສິນ­ຄ້າ​ເພື່ອສົ່ງ​ອອກ​ ແມ່ນ​ບໍ່​ສາ­ມາດ​ປະ­ຕິ­ບັດ​ໄດ້​ຢ່າງ​ເປັນ​ເອ­ກະ​ພາບ ແລະ ບໍ່​ເປັນ​ໄປ​ຕາມ​ຂໍ້​ກຳ­ນົດ​ກົດ­ໝາຍ ຕົວ­ຢ່າງ: ອີງ​ຕາມ​ກົດໝາຍ ອມພ ສະ­ບັບ​ປັດ­ຈຸ­ບັນ ແມ່ນ​ພາກ​ທຸ­ລະ​ກິດ​ສາ­ມາດ​ຍື່ນ​ເອ­ກະ­ສານ​ຂໍ​ຄືນ ອມພ ໄດ້​ພາຍ​ໃນ 30 ວັນ ແຕ່​ຕົວ​ຈິງ ຫຼາຍ​ກວ່າ​ກໍ­ລະ­ນີ ແມ່ນ​ໃຊ້​ເວ­ລາ​ແກ່­ຍາວ​ຫຼາຍ​ກວ່າ​ນັ້ນ ແລະ ບາງ​ກໍ­ລະ­ນີ​ກໍ່​ບໍ່​ສາ­ມາດ​ຂໍ​ຄືນ​ໄດ້​ເລີຍ ຂັ້ນ​ຕອນ​ການ​ຂໍ​ຄືນ ອມພ ໃນ​ປັດ­ຈຸ­ບັນ​ແມ່ນ​ຜູ້​ປະ­ກອບ​ການ​ຈະ​ຕ້ອງ​ໄດ້​ປະ­ກອບ​ເອ­ກະ­ສານ​ຫາ​ພະ​ແນກ​ສ່ວຍ​ສາ​ອາ­ກອນ​ຂັ້ນ​ແຂວງ ຫຼື ນະຄອນ​ຫຼວງ ແລະ ຫຼັງ​ຈາກ​ຂັ້ນ​ແຂວງ​ພິ­ຈາ­ລະ­ນາ​ແລ້ວ ເອ­ກະ­ສານ​ຈຶ່ງ​ຈະ​ຖືກ​ສົ່ງ​ມາ​ທີ່​ກົມ​ສ່ວຍ​ສາ​ອາ­ກອນ ​ເພື່ອ​ດຳ­ເນີນ​ຂັ້ນ​ຕອນ​ການ​ສົ່ງ​ຄືນ​ເງິນ ອມພ ເຊິ່ງ​ໃນ​ນີ້ ແຕ່​ລະ​ຂັ້ນ​ຕອນ​ກໍ່​ບໍ່​ມີ​ການ​ກຳ­ນົດ​ເວ­ລາ​ຊັດ​ເຈນ ບັນ­ຫາ​ນີ້​ນອກ­ຈາກ​ຈະ​ບໍ່​ເອື້ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ຜູ້​ສົ່ງ​ອອກ ແລະ ສົ່ງ​ຜົນ​ກະ­ທົບ​ໂດຍ​ກົງ​ຕໍ່​ທຶນ​ການ​ຜະ­ລິດ​ຂອງ​ຜູ້​ສົ່ງ​ອອກ​ແລ້ວ ຍັງ​ບໍ່​ເປັນ​ການ​ກະ​ຕຸ້ນ​ສົ່ງ­ເສີມ​ໃຫ້​ມີ​ການ​ລົງ­ທຶນ​ເພີ່ມ​ຂຶ້ນ​ ໃນ​ຂະ­ແໜງ­ການ​ຜະ­ລິດ​ສົ່ງ​ອອກ ແລະ ສົ່ງ​ຜົນ​ກະ­ທົບ​ຕໍ່​ຄວາມ​ສາ­ມາດ​ໃນ​ການ​ແຂ່ງ­ຂັນ​ຂອງ​ລາ­ຄາ​ສິນ­ຄ້າ ​ທີ່​ຜະ­ລິດ​ຈາກ​ລາວ​ໃນ​ຕະ­ຫຼາດ​ສາ­ກົນ​ນຳ​ອີກ.

   ສ່ວນ​ສາ­ເຫດ​ຫຼັກ​ທີ່​ບໍ່​ສາ­ມາດ​ຂໍ​ຄືນ ອມພ ໄດ້​ນັ້ນ ຜ່ານ​ມາ​ຜູ້​ປະ­ກອບ​ການ​ຜະ­ລິດ​ສົ່ງ​ອອກ​ຫຼາຍ​ບໍ­ລິ­ສັດ ​ກໍ່​ຍັງ​ບໍ່​ທັນ​ໄດ້​ຮັບ​ຄຳ​ຕອບ​ຢ່າງ​ຊັດ​ເຈນ​ຈາກ​ກົມ​ສ່ວຍ​ສາ​ອາ­ກອນ ບັນ­ຫາ​ນີ້​ເຄີຍ​ຖືກ​ສະ­ເໜີ​ຜ່ານ​ກອງ​ປະ­ຊຸມ​ທຸ­ລະ​ກິດ​ລາວ​ ຄັ້ງ​ທີ 10 ແລະ ຄວາມ​ຄືບ​ໜ້າ­ທີ່​ຜ່ານ​ມາ ​ແມ່ນ​ໄດ້​ມີ​ແຈ້ງ​ການ​ຈາກ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ລົງ​ວັນ​ທີ 9 ກໍ­ລະ­ກົດ 2017 ເລື່ອງ​ທິດ​ຊີ້​ນຳ​ການ​ແກ້​ໄຂ 4 ກຸ່ມ​ບັນ­ຫາ​ທີ່​ໄດ້​ຍົກ​ຂຶ້ນ​ໃນ​ກອງ​ປະ­ຊຸມ​ດັ່ງ­ກ່າວ ເຊິ່ງ​ບັນ­ຫາ​ນີ້​ໄດ້​ລະ­ບຸ​ຢ່າງ​ຊັດ​ເຈນ​ວ່າ ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ຮີບ​ຮ້ອນ​ຄົ້ນ­ຄວ້າ​ກົນ​ໄກ​ການ​ສົ່ງ​ຄືນ ອມພ ໂດຍ​ໃຫ້​ມີ​ການ​ກວດ­ກາ​ຄືນ​ເງື່ອນ­ໄຂ​ເອ­ກະ­ສານ ແລະ ຂອດ​ຂັ້ນ​ຕ່າງໆ​ທີ່​ເປັນ​ອຸ­ປະ­ສັກ​ໃນ​ການ​ແຈ້ງ​ຂໍ​ຄືນ ອມພ ແລະ ປັບ­ປຸງ​ນິ­ຕິ​ກຳ​ທີ່​ກ່ຽວ­ຂ້ອງ ເພື່ອ​ແນະ­ນຳ​ການ­ຈັດ­ຕັ້ງ​ປະ­ຕິ­ບັດ​ໃຫ້​ເປັນ​ເອ­ກະ​ພາບ​ທົ່ວ​ປະ­ເທດ ແຕ່​ມາ​ຮອດ​ປັດ­ຈຸ­ບັນ​ ແມ່ນ​ຍັງ​ບໍ່​ທັນ​ມີ​ຄວາມ​ຄືບ​ໜ້າ​ເທົ່າ​ທີ່​ຄວນ.

   ສະ­ນັ້ນ ພາກ​ທຸ­ລະ​ກິດ ໂດຍ​ສະ­ເພາະແມ່ນ​ຜູ້​ປະ­ກອບ​ການ​ຜະ­ລິດ​ເພື່ອ​ສົ່ງ​ອອກ ​ຈຶ່ງ​ສະ­ເໜີ​ບັນ­ຫາ​ນີ້​ມາ​ຍັງ​ລັດ​ຖະບານ ພິ­ຈາ­ລະ­ນາ​ແກ້​ໄຂ​ຢ່າງ​ຮີບ​ດ່ວນ ເພື່ອ​ໃຫ້​ຜູ້​ປະ­ກອບ​ການ​ສາ­ມາດ​ຂໍ​ຄືນ ອມພ ໄດ້​ຕາມ​ທີ່​ໄດ້​ລະ­ບຸ​ໄວ້​ຢ່າງ​ຊັດ​ເຈນໃນ​ກົດ­ໝາຍ ການ​ສ້າງ​ກົນ​ໄກ​ທີ່​ສະ­ດວກ​ໃນ​ການ​ຂໍ​ຄືນ ອມພ ນັ້ນ​ຈະ​ເປັນ​ການ​ຫຼຸດ­ຜ່ອນ​ຄ່າ​ໃຊ້​ຈ່າຍ​ຕ່າງໆ ໃນ​ການ­ຈັດ­ຕັ້ງປະ­ຕິ­ບັດ ແລະ ຫຼຸດ­ຜ່ອນ​ວຽກ​ງານ​ຕ່າງໆ​ຂອງ​ລັດ​ຖະ​ການ​ສ່ວຍ​ສາ​ອາ­ກອນ​ນຳ​ອີກ ນອກ­ຈາກ​ຈະ​ເປັນ​ການ​ຫຼຸດ­ຜ່ອນ​ຕົ້ນທຶນ​ການ​ຜະ­ລິດ​ເພື່ອ​ສົ່ງ​ອອກ​ແລ້ວ ການ​ສ້າງ​ກົນ​ໄກ​ທີ່​ສະ­ດວກ​ວ່ອງ­ໄວ​ໃນ​ການ​ຂໍ​ຄືນ ອມພ ຈະ​ເປັນ​ການ​ຊຸກ­ຍູ້​ສົ່ງ­ເສີມໃຫ້​ມີ​ການ​ລົງ­ທຶນ​ພາຍ​ໃນ ແລະ ດຶງ​ດູດ​ການ​ລົງ­ທຶນ​ຈາກ​ຕ່າງ­ປະ­ເທດ ເພື່ອ​ກະ​ຕຸ້ນ​ການ​ສົ່ງ​ອອກ​ເຊິ່ງ​ຈະ​ສົ່ງ​ຜົນ​ດີ​ຕໍ່​ການພັດ­ທະ­ນາ​ເສດ­ຖະ­ກິດ​ຂອງ​ຊາດ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ