ຂ່າວຫຼ້າສຸດ

ປກສ ເມືອງໄຊເຊດຖາ ມ້າງກຸ່ມລັກລົດຈັກລາຍໃຫຍ່

210 09 ກ.ກ. 2018 ຂ່າວໜ້າ​ໜຶ່ງ

   ເຈົ້າ​ໜ້າ­ທີ່ ປກສ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ໃຫ້​ຮູ້​ວ່າ: ວັນ​ທີ 28 ເມ­ສາ 2018 ທ້າວ ຈັນ​ພິມ ອາ­ຍຸ 49 ປີ ຢູ່​ບ້ານ​ໂພນ​ພະ​ເນົາ ເມືອງ​ໄຊ​ເຊດ​ຖາ ເຂົ້າ​ແຈ້ງ​ຄວາມ​ວ່າ: ມີ​ຄົນ​ຮ້າຍ 2 ຄົນ ເຂົ້າ​ມາ​ລັກ​ເອົາ​ລົດ­ຈັກ MSX ສີ­ດຳ ໝາຍ​ເລກ​ທະ­ບຽນ 5444 ກຳ­ແພງ​ນະ­ຄອນ ຢູ່​ໃນ​ເຮືອນ​ຂອງ​ຕົນ ພາຍ­ຫຼັງ​ໄດ້​ຮັບ​ການ​ແຈ້ງ​ຄວາມ ​ເຈົ້າ​ໜ້າ­ທີ່​ໄດ້​ແຕ່ງ­ຕັ້ງ​ພະ­ນັກ­ງານ​ລົງ​ເກັບ​ກຳ​ຂໍ້​ມູນ​ຫຼັກ​ຖານ​ຕ່າງໆ​ ຈາກ​ກ້ອງ​ວົງ​ຈອນ​ປິດ​ຢູ່​ຕາມ​ເຮືອນ​ປະ­ຊາ­ຊົນ​ເຂດ​ໃກ້​ຄຽງ ​ຈົນ​ສາ­ມາດ​ຮູ້​ໄດ້​ເປົ້າ​ໝາຍ​ທີ່​ຊັດ​ເຈນ.

   ວັນ​ທີ 4 ພຶດ­ສະ­ພາ 2018 ຈຶ່ງ​ໄດ້​ປະ­ສານ​ກັບ​ອຳ­ນາດ​ການ​ປົກ­ຄອງ​ບ້ານ​ໂພນ​ພະ​ເນົາ ເຂົ້າ​ກັກ​ຕົວ​ເປົ້າ​ໝາຍ​ຊື່​ທ້າວ ໜູ​ໄຊ ຫຼື ໜູ ອາ­ຍຸ 36 ປີ ຢູ່​ບ້ານ​ໂພນ​ພະ​ເນົາ ເມືອງ​ໄຊ​ເຊດ​ຖາ ໄປ​ສອບ​ສວນ​ຂະ­ຫຍາຍ​ຜົນ ໂດຍ​ຜູ້­ກ່ຽວ​ໄດ້​ຊັດ​ຖອດ​ຫາ​ກຸ່ມ​ແກ້ງ​ດຽວ​ກັນ​ອີກ 4 ຄົນ ຄື: ທ້າວ ວຽງ​ສະ­ຫວັນ ຫຼື ເລ້ ອາ­ຍຸ 36 ປີ ຢູ່​ບ້ານ​ໂພນ​ເຄັງ ເມືອງ​ໄຊ​ເຊດ​ຖາ ທ້າວ ໄພ​ວັນ ຫຼື ໂຈ້ ອາ­ຍຸ 25 ປີ ພັກ​ເຊົາ​ຢູ່​ບ້ານ​ຫ້ວຍ​ເຕີຍ ເມືອງ​ໄຊ​ທາ­ນີ ທ້າວ ມິ່ງ​ແກ້ວ ຫຼື ຊາຍ ອາ­ຍຸ 27 ປີ ຢູ່​ບ້ານ​ຫ້ວຍ​ຫົງ ເມືອງ​ຈັນ­ທະ​ບູ​ລີ ແລະ ທ້າວ ຂາວ ອາ­ຍຸ 25 ປີ ພັກ​ເຊົາ​ຢູ່​ບ້ານ​ດົງ​ຄຳ​ຊ້າງ ເມືອງ​ຫາດ​ຊາຍ​ຟອງ ພ້ອມ​ກັບ​ເກັບ​ກູ້​ລົດຈັກ​ມາ​ໄດ້ 8 ຄັນ.

   ຜ່ານ​ການ​ສອບ​ສວນ​ເບື້ອງ​ຕົ້ນ ທ້າວ ໜູ​ໄຊ ແລະ ທ້າວ ວຽງ​ສະ­ຫວັນ ໄດ້​ຮູ້­ຈັກ​ກັນ​ໃນ​ໄລ­ຍະ​ຖືກ​ບຳ­ບັດ​ຢາ​ເສບ​ຕິດ​ຢູ່​ສູນ​ບຳ­ບັດ​ຢາ​ເສບ​ຕິດ​ສາຍ​ນ້ຳ​ງື່ມ (ດອນ​ທ້າວ) ພາຍ­ຫຼັງ​ຖືກ​ປ່ອຍ​ຕົວ​ອອກ​ມາ​ໃນ​ເດືອນ​ເມ­ສາ 2017 ກໍ່​ໄດ້​ຕິດ­ຕໍ່​ພົວ­ພັນ​ກັນ​ຕະ­ຫຼອດ ແລະ ຮ່ວມ​ກັນ​ເຄື່ອນ​ໄຫວ​ລັກ​ລົດ­ຈັກທັງ​ໝົດ 13 ຄັ້ງ ໄດ້​ລົດ­ຈັກ 13 ຄັນ ແລ້ວ­ໄປ​ຂາຍ​ໃຫ້​ກັບ​ທ້າວ ຂາວ ຈາກ​ນັ້ນ​ທ້າວ ຂາວ ນຳ­ໄປ​ຂາຍ​ຕໍ່­ໃຫ້​ກັບ​ທ້າວ ໄພ​ວັນ ແລ້ວ​ນຳ­ໄປ​ຂາຍ​ຕໍ່­ໃຫ້​ກັບ​ທ້າວ ມິ່ງ​ແກ້ວ ເພື່ອ​ນຳ­ໄປ​ຂາຍ​ອອກ​ໄປ​ຕ່າງ​ແຂວງ ຄະ­ດີ​ດັ່ງ­ກ່າວ​ເຈົ້າ​ໜ້າ­ທີ່ ປກສ ເມືອງ​ໄຊ​ເຊດ​ຖາ ຍັງ​ສືບ­ຕໍ່​ສອບ​ສວນ​ຂະ­ຫຍາຍ​ຜົນ ເພື່ອ​ເກັບ​ກຳ​ຂໍ້​ມູນ​ໃນການ​ຕິດ­ຕາມ​ເກັບ​ກູ້​ລົດ­ຈັກ​ທີ່​ພວກ​ກ່ຽວ​ລັກ​ໄປ​ຂາຍ​ໃນ​ໄລ­ຍະ​ຜ່ານ​ມາ ​ເພື່ອ​ໄປ​ມອບ​ຄືນ​ໃຫ້​ເຈົ້າ​ຂອງ​ເດີມ.

ຂ່າວທີ່ກ່ຽວຂ້ອງ