ເຟຊບຸ໊ກ ທຸ່ມຄວ້າລິຂະສິດຖ່າຍທອດສົດພຣີເມຍລີກ

144 06 ກ.ກ. 2018 ວົງຈອນກີລາ
ເຟຊບຸ໊ກ ທຸ່ມຄວ້າລິຂະສິດຖ່າຍທອດສົດພຣີເມຍລີກ

        ເດິະ ທາມສ໌ ສື່ລະດັບໂລກ ຕີແຜ່ຂ່າວວ່າ ເຟຊບຸ໊ກ ເວັບໄຊຍອດນິຍົມ ໄດ້ເດີນໜ້າເອົາຈິງເອົາຈັງກັບວົງການເຕະບານ ຫຼ້າສຸດໄດ້ທຸ່ມເງິນມະຫາສານເຖິງ 200 ລ້ານປອນ ຄວ້າລິຂະສິດຖ່າຍທອດເກມພຣີເມຍລີກ ອັງກິດ ເປັນເວລາ 3 ປີ ຕັ້ງແຕ່ປີ 2019-2022 ຜ່ານໂລກອອນລາຍ ໃນຍ່ານອາຊຽນ.

          ເຟຊບຸ໊ກ ຄວ້າລິຂະສິດການຖ່າຍທອດສົດເກມແຂ່ງຂັນເຕະບານຍອດນິຍົມທີ່ສຸດໃນໂລກຈຳນວນ 380 ນັດ ຕະຫຼອດ 3 ລະດູການ ໂດຍຈະຖືກແຜ່ພາບຜ່ານຍັກໃຫຍ່ດ້ານສັງຄົມອອນລາຍ ທີ່ປະເທດໄທ, ຫວຽດນາມ, ກໍາປູເຈຍ ແລະ ສປປ ລາວ ແທນ ບີອິນ ສະປອດສ໌ (BeIN Sports) ຜູ້ຖືລິຂະສິດໃນປັດຈຸບັນ.

          ຂະນະດຽວກັນ ເດິະ ທາມສ໌ ລະບຸວ່າ ສື່ອອນລາຍທີ່ຜ່ານການກໍ່ຕັ້ງໂດຍ ມາກ ຊັກເກີເບິກ ເອົາຊະນະ ບີອິນ ສະປອດສ໌ ແລະ ຟັອກຊ໌ ສະປອດສ໌ ອາຊີ ຄວ້າລິຂະສິດຖ່າຍທອດສົດເປັນເວລາ 3 ປີ (2019-2022) ແລະ ພວກເຂົາມີຄວາມຕັ້ງໃຈທີ່ຈະບຸກຕະຫຼາດອາຊຽນ ຊຶ່ງກຳລັງເຕີບໂຕຢ່າງຕໍ່ເນື່ອງ ສົ່ງຜົນໃຫ້ຜູ້ບໍລິໂພກໄດ້ຮັບຜົນປະໂຫຍດເຕັມໆ ຈາກການຊົມເກມລີກສູງສຸດຂອງອັງກິດຜ່ານສື່ອິນເຕີເນັດ ນອກເໜືອຈາກການຊົມຜ່ານໜ້າຈໍໂທລະພາບ.

          ກ່ອນໜ້ານີ້ ເຟຊບຸ໊ກ ເຄີຍມີການຖ່າຍທອດສົດມາແລ້ວໃນການແຂ່ງຂັນເຕະບານເມເຈີລີກ ຊັອກເກີ ສະຫະລັດອາເມຣິກາ ແລະ ລາ ລີກາ ແອັດສະປາຍ ຂະນະດຽວກັນ ພຣີເມຍລີກ ກໍຈະໄດ້ຮັບປະໂຫຍດຈຳນວນມະຫາສານຈາກການຖ່າຍທອດສົດຜ່ານສື່ອອນລາຍ ນອກເໜືອຈາກການຖ່າຍທອດຜ່ານທາງໂທລະພາບຢ່າງທີ່ເຄີຍເຮັດເຊັ່ນດຽວກັນ.

          ທັ້ງນີ້ ໃນເດືອນກຸມພາທີ່ຜ່ານມາ "ສະກາຍ ສະປອດສ໌" (Sky Sports) ກັບ "ບີທີ ສະປອດສ໌" (BT Sports) ຈ່າຍເງິນຈຳນວນ 4,46 ຕື້ປອນ ສຳລັບການຖ່າຍທອດສົດຕັ້ງແຕ່ປີ 2019-2022 ໂດຍ ບີທີ ຈະໄດ້ຖ່າຍທອດສົດ 52 ເກມຕໍ່ລະດູການ ສ່ວນ ສະກາຍ ຍັງຄົງເປັນຜູ້ຖືລິຂະສິດລາຍໃຫຍ່ 128 ເກມ.

ຂ່າວທີ່ກ່ຽວຂ້ອງ