ຂ່າວຫຼ້າສຸດ

ແຊມປຽນລີກ ປ່ຽນກົດໃໝ່ ເລີ່ມລະດູການໜ້າ

130 06 ກ.ກ. 2018 ວົງຈອນກີລາ
ແຊມປຽນລີກ ປ່ຽນກົດໃໝ່ ເລີ່ມລະດູການໜ້າ

        ເຕະບານ ຢູຟ່າ ແຊັມປຽນ ລີກ ກຽມນຳກົດປ່ຽນຕົວນັກເຕະຕົວສຳຮອງຄົນທີ່ 4 ໄດ້ໃນໄລຍະຕໍ່ເວລາພິເສດມາໃຊ້ຕັ້ງແຕ່ລະດູການໜ້າເປັນຕົ້ນໄປ.

          ສະຫະພັນເຕະບານເອີຣົບ (ຢູຟ່າ) ໄດ້ປະກາດຢືນຢັນເມື່ອວັນພະຫັດທີ່ 5 ກໍລະກົດທີ່ຜ່ານມາວ່າ ເຕະບານຢູຟ່າ ແຊັມປຽນ ລີກ ຈະປ່ຽນກົດໃຫ້ປ່ຽນຕົວນັກເຕະໄດ້ເປັນ 4 ຄົນ ຫາກຫຼິ້ນກັນເຖິງໄລຍະຕໍ່ເວລາພິເສດ ໂດຍຈະເລີ່ມຕັ້ງແຕ່ລະດູການ 2018/19 ເປັນຕົ້ນໄປ.

          ກ່ອນໜ້ານີ້ ໃນຂັນແຊັມປຽນ ລີກ ຈະອະນຸຍາດໃຫ້ປ່ຽນນັກເຕະສຳຮອງໄດ້ພຽງແຕ່ 3 ຄົນ ແຕ່ຕາມກົດໃໝ່ ຫາກເກມຮອບຕັດເຊືອກເປັນຕົ້ນໄປ ຕ້ອງຕໍ່ເວລາ ແຕ່ລະທີມສາມາດປ່ຽນຕົວເພີ່ມໄດ້ອີກ 1 ຄົນ ເທົ່າກັບວ່າລວມແລ້ວປ່ຽນໄດ້ 4 ຄົນ.

          ນອກຈາກນັ້ນ ຢູຟ່າຍັງຢືນຢັນວ່າ ກົດນີ້ຈະນຳໄປໃຊ້ໃນຊີງຂັນ ຢູໂຣປາ ລີກ, ຢູຟ່າ ຊູເປີ ຄັບ, ເຕະບານຊິງແຊັມແຫ່ງຊາດເອີຣົບ "ຢູໂຣ 2020" ແລະ ໃນການແຂ່ງຂັນເຕະບານເພດຍິງອີກດ້ວຍ.

          ທັ້ງນີ້ ກົດປ່ຽນຕົວນັກເຕະໄດ້ 4 ຄົນ ຫາກຕໍ່ເວລາພິເສດ ທາງສະຫະພັນເຕະບານນານາຊາດ (ຟີຟ່າ) ໄດ້ນຳມາໃຊ້ກ່ອນໜ້ານີ້ແລ້ວ ຢ່າງໃນເຕະບານໂລກ 2018 ທີ່ປະເທດຣັດເຊຍ ເປັນຕົ້ນ.

 

ຂ່າວທີ່ກ່ຽວຂ້ອງ